സെറീനയെ അട്ടിമറിച്ച ഒസാക്കയ്ക്ക് കിരീടം

ഇതിഹാസ താരത്തെ വീഴ്ത്തി യുഎസ് ഓപ്പണ്‍ കിരീടം നേടി ജപ്പാന്‍റെ നവോമി ഒസാക്ക. നേരിട്ടുള്ള സെറ്റുകള്‍ക്കായിരുന്നു ഒസാക്കയുടെ ജയം. നാടകീയമായ രംഗങ്ങള്‍ക്കൊടുവിലാണ് ഒസാക്ക തന്‍റെ ആദ്യ ഗ്രാന്‍ഡ്‌സ്ലാം കിരീടം ചൂടിയത്. 24-ാം ഗ്രാൻഡ്സ്ലാം കിരീടം എന്ന റെക്കോര്‍ഡ് നേട്ടം സ്വന്തമാക്കാനിരുന്ന സെറീനയുടെ പരാജയം ആരാധകര്‍ക്ക് ഉള്‍ക്കൊള്ളാനാവുന്നതായിരുന്നില്ല. സെറീനയെ പിന്തുണച്ചുള്ള ആരാധകരുടെ ആര്‍പ്പുവിളികള്‍ക്കിടയില്‍ വിതുമ്പിയാണ് ഒസാക്ക കിരീടം ഉയര്‍ത്തിയത്‌.

'എല്ലാവരും സെറീനയ്ക്ക് വേണ്ടിയാണ് ശബ്ദം ഉയര്‍ത്തുന്നതെന്ന് അറിയാം. ഇതുപോലെ അവസാനിപ്പിക്കേണ്ടി വന്നതില്‍ ഞാന്‍ ക്ഷമ ചോദിക്കുന്നു'- എന്ന് പറഞ്ഞാണ് നവോമി ഒസാക്ക കിരീടമേറ്റുവാങ്ങിയത്. 24-ാം ഗ്രാൻഡ്സ്ലാം കിരീടം എന്ന റെക്കോര്‍ഡ് നേട്ടം സ്വന്തമാക്കാനിരുന്ന സെറീനയുടെ പരാജയം ആരാധകര്‍ക്ക് ഉള്‍ക്കൊള്ളാനാവുന്നതായിരുന്നില്ല. മത്സരത്തിനിടെ ചെയർ അംപയറുമായി സെറീന വില്യംസിന്‍റെ തര്‍ക്കവുമുണ്ടായി.

ആദ്യ സെറ്റിൽ സെറീനക്ക് ഒരവസരവും നൽകാതെയായിരുന്നു ജപ്പാൻ താരത്തിന്റെ മുന്നേറ്റം. സെറീനയുടെ പിഴവുകൾ കൂടി ആയപ്പോൾ ആ സെറ്റ് 6-2ന് ഒസാക്ക സ്വന്തമാക്കി. രണ്ടാം സെറ്റിൽ ആദ്യം മുന്നിട്ട് നിന്നത് സെറീന. പിന്നീട് തിരിച്ച് വരവില്‍ 6-4ന് കിരീടം നേടി ഇരുപതുകാരി ഒസാക്ക ചാമ്പ്യനായി.