ഫുട്ബോൾ അരങ്ങേറ്റത്തിന് ഒരുങ്ങി ഉസൈൻ ബോൾട്ട്

മെൽബൺ: ട്രാക്കിലെ രാജാവ് ഉസൈൻ ബോൾട്ട് ഫുട്ബോളിൽ കരിയർ തുടങ്ങുന്നു. ഓസ്ട്രേലിയൻ ക്ലബ്ബായ സെൻട്രൽ കോസ്റ്റ് മറൈനേഴ്സിന് വേണ്ടി വെള്ളിയാഴ്ചയാണ് ബോൾട്ട് ആദ്യമത്സരത്തിന് ഇറങ്ങുന്നത്. സൗഹൃദ മത്സരത്തിലാണ് ബോൾട്ട് ക്ലബ്ബിന് വേണ്ടി ആദ്യമായി ഇറങ്ങുന്നത്.

സെൻട്രൽ കോസ്റ്റ് സ്റ്റേഡിയത്തിൽ നടക്കുന്ന മത്സരം ലൈവായി തന്നെ ടിവി ചാനലുകൾ സംപ്രേഷണം ചെയ്യും. രാജ്യാന്തര തലത്തിൽ ശ്രദ്ധിക്കപ്പെടുന്ന ഒരു ഫുട്ബോൾ മത്സരത്തിൽ ആദ്യമായി കളിക്കാനിറങ്ങുന്നതിൻെറ സമ്മർദ്ദം ഉണ്ടെന്ന് ബോൾട്ട് പറഞ്ഞു.

ഒരു പ്രൊഫഷണല്‍ ഫുട്ബോള്‍ താരമാകുകയെന്നതാണ് തന്‍റെ അത്യന്തികമായ സ്വപ്നമെന്ന് ഉസൈന്‍ ബോള്‍ട്ട് നേരത്തെ വ്യക്തമാക്കിയിരുന്നു. ഇതിനായി വലിയ കഠിനാധ്വാനം അത്യാവശ്യമാണ്. തന്‍റെ ഫുട്ബോള്‍ ജീവിതത്തിന് ഇവിടെ തുടക്കമാവുകയാണെന്നും സെന്‍ട്രല്‍ കോസ്റ്റ് മറൈനേഴ്സിനോട് നന്ദിയുണ്ടെന്നും താരം പറഞ്ഞു.

ജര്‍മ്മന്‍ ക്ലബ് ബൊറൂസിയ ഡോര്‍ട്മുണ്ട്, ദക്ഷിണാഫ്രിക്കന്‍ ക്ലബ് മാമെലോഡി സണ്‍ഡൗണ്‍സ്, നോര്‍വെ ക്ലബ്ബ് സ്റ്റോംസ് ഗോഡ്സെറ്റ് എന്നിവിടങ്ങളില്‍ നിന്നും നേരത്തേ താരം പരിശീലനം നേടിയിരുന്നു. ഫുട്ബോളിലേക്ക് കാലെടുത്തു വെക്കുന്നതോടെ ഇനി വേഗമേറിയ ഫുട്ബോള്‍ താരമെന്ന ബഹുമതിയും താരത്തിന് സ്വന്തമാകും. ആര്യന്‍ റോബന്‍, ഗാരെത് ബെയ്ല്‍, ക്രിസ്റ്റ്യാനോ റൊണാള്‍ഡോ എന്നിവരാണ് നിലവില്‍ ഫുട്ബോളിലെ വേഗമേറിയ താരങ്ങള്‍.