ടെന്നീസ് ചരിത്രത്തിലെ വ്യത്യസ്തമായ പ്രതിഷേധപ്രകടനം

വിംബിള്‍ഡണ്‍ ടെന്നീസ് ടൂര്‍ണ്ണമെന്റിനിടെ നാടകീയ സംഭവങ്ങള്‍. ചൊവ്വാഴ്ച നടന്ന മൂന്നാം റൗണ്ട് പുരുഷ ഡബ്ബിള്‍സ് മത്സരത്തിനിടെ ടോയ്ലറ്റ് ബ്രേക്ക് ആവശ്യപ്പെട്ട താരത്തിന് അനുമതി നിഷേധിച്ചിരുന്നു. ഇതിനെതിരെ ടെന്നീസ് ടൂര്‍ണ്ണമെന്റ് ചരിത്രത്തില്‍ കേട്ടുകേള്‍വിയില്ലാത്ത പ്രതിഷേധപ്രകടനങ്ങള്‍ നടന്നു.

വിംബിള്‍ഡണ്‍ പുരുഷ ഡബ്ബിള്‍സ് മത്സരത്തില്‍ പാബ്ലോ കുയേവസും മാര്‍സല്‍ ഗ്രാനോലസും ചേര്‍ന്ന സംഖ്യം ജോണി മറെയും ആദില്‍ ഷംസുദ്ദീനും ചേര്‍ന്ന സംഖ്യത്തെ നേരിടുന്നതിനിടയിലാണ് നിര്‍ണ്ണായക സംഭവങ്ങൾ നടന്നത്.

കുയേവസ് മത്സരം നിയന്ത്രിക്കുന്ന അ മ്പയറോട് ടോയ്ലെറ്റ് ബ്രേക്ക് വേണമെന്ന് ആവശ്യപ്പെട്ടു. എന്നാല്‍ മാച്ച്‌ റഫറി ആവശ്യം നിരസിച്ചു. കുപിതനായ താരം ബോള്‍ കാനില്‍ കാര്യം സാധിക്കുമെന്ന് ഭീഷണിപ്പെടുത്തി. എന്നിട്ടും അരിശം തീരാതെ താരം ബോള്‍ കോര്‍ട്ടിന് പുറത്തേക്ക് മനപൂര്‍വ്വം അടിച്ചു പറത്തുകയും ചെയ്തു.

ഇതില്‍ പ്രതിഷേധിച്ച്‌ ഇരു താരങ്ങളും അവസാന ഗെയിം കളിക്കാതെ ഗ്രൗണ്ടില്‍ കുത്തിയിരുപ്പ് സമരം നടത്തുകയും ചെയ്തു. ഒടുവില്‍ ഇരുവരേയും അനുനയിപ്പിച്ച്‌ മത്സരം തുടര്‍ന്നു .