കോവിഡ്-19 പ്രതിസന്ധിയിൽ ബുദ്ധിമുട്ട് അനുഭവിക്കുന്ന ചെറിയ വരുമാനക്കാരായ ഉപയോക്താക്കൾക്ക് വേണ്ടി പുതിയ ആനുകൂല്യങ്ങളുമായി ഭാരതി എയർടെൽ. കൊറോണ വൈറസ് വ്യാപനത്തെത്തുടർന്ന് ഏർപ്പെടുത്തിയ ലോക്ക് ഡൗണിന്റെ പശ്ചാത്തലത്തിൽ എൺപത് മില്യണിലധികം വരിക്കാരുടെ പ്രീപെയ്ഡ് പാക്കിന്റെ വാലിഡിറ്റിയാണ് കമ്പനി ഏപ്രിൽ 17 വരെ നീട്ടിയിരിക്കുന്നത്.
ഇതിനുമുൻപ് തങ്ങളുടെ പാക്കിന്റെ വാലിഡിറ്റി അവസാനിച്ചാലും ഈ വരിക്കാർക്കെല്ലാം ഏപ്രിൽ 17 വരെ തങ്ങളുടെ എയർടെൽ നമ്പറിൽ ഇൻകമിങ് കോളുകൾ ലഭിക്കും.
ഇതിനുപുറമെ ഈ എൺപത് മില്യണിലധികം ആളുകൾക്ക് വേണ്ടപ്പെട്ടവരുമായി കോളിലൂടെയും എസ്എംഎസിലൂടെയും ബന്ധപ്പെടാൻ എയർടെൽ അഡീഷണലായി 10 രൂപ ടോക്ക് ടൈമും ഈ വരിക്കാരുടെ പ്രീപെയ്ഡ് അക്കൗണ്ടിലേക്ക് ക്രെഡിറ്റ് ചെയ്യും.
Extra Data: ജിയോ, എയർടെൽ, വൊഡാഫോൺ അധിക ഡാറ്റ പാക്കുകളിൽ മികച്ചതേത്?
ലോക്ക് ഡൗൺ കാരണം പ്രശ്നങ്ങൾ അനുഭവിക്കുന്ന ദിവസക്കൂലിക്കാരായ ജോലിക്കാരെയും കുടിയേറ്റ തൊഴിലാളികളെയും സഹായിക്കാനാണ് ഈ പ്ലാനിലൂടെ എയർടെൽ ലക്ഷ്യം വെയ്ക്കുന്നത്. എയർടെല്ലിന്റെ നെറ്റ്വർക്കിലെ മറ്റെല്ലാ ഉപയോക്താക്കൾക്കും ഓൺലൈൻ പ്ലാറ്റ്ഫോമുകളിലൂടെ നമ്പർ റീചാർജ് ചെയ്യാനാവും.
മാർച്ച് 24-നാണ് കൊറോണ വൈറസ് വ്യാപനം തടയാനായി ഇന്ത്യയിൽ അടുത്ത 21 ദിവസത്തേക്ക് പ്രധാനമന്ത്രി നരേന്ദ്ര മോഡി ലോക്ക് ഡൗൺ പ്രഖ്യാപിച്ചത്.