പച്ചക്കറികള്‍ രണ്ടു മണിക്കൂറില്‍ വീട്ടിലെത്തിക്കാന്‍ ആമസോണ്‍

ബംഗലൂരു: അടുക്കളയിലേക്ക് വേണ്ട പലചരക്ക്, പച്ചക്കറി, ഇറച്ചി തുടങ്ങി എല്ലാ ഉല്‍പ്പന്നങ്ങളും ഉല്‍പന്നങ്ങള്‍ രണ്ടു മണിക്കൂറിനകം വീട്ടിലെത്തിക്കുന്ന പദ്ധതി ഇന്ത്യയിലും നടപ്പാക്കാന്‍ ആമസോണ്‍. ഇതുവഴി ഇന്ത്യയില്‍ എവിടേക്കും ഓണ്‍ലൈന്‍ ഓര്‍ഡറുകള്‍ വഴി ഗ്രോസറി ഉല്‍പന്നങ്ങള്‍ എത്തിച്ചു നല്‍കും. 'ആമസോണ്‍ ഫ്രഷ്' എന്ന് പേരുള്ള പദ്ധതി അഞ്ച് വര്‍ഷത്തിനുള്ളില്‍ പൂര്‍ത്തിയാവും.

പലചരക്കു ഉത്പന്നങ്ങള്‍, പച്ചക്കറി, ഇറച്ചി, പഴങ്ങള്‍ തുടങ്ങി ഏത് സാധനങ്ങളും രണ്ട് മണിക്കൂര്‍ കൊണ്ട് വീടുകളിലെത്തിക്കുന്ന പദ്ധതിയാണ് ആമസോണ്‍ ഫ്രഷ് എന്ന് ആമസോണ്‍ ഇന്ത്യ തലവന്‍ അമിത് അഗര്‍വാള്‍ പറഞ്ഞു.

യു.എസില്‍ മുന്‍പേ തന്നെ പരീക്ഷിച്ച്‌ വിജയിച്ച പദ്ധതിയാണ് ആമസോണ്‍ ഫ്രഷ്. നിലവില്‍ ഇന്ത്യയില്‍ പാന്‍ട്രി എന്ന പേരില്‍ ആമസോണ്‍ ചെറിയ തോതില്‍ ഗ്രോസറി ഡെലിവറി സേവനങ്ങള്‍ നടത്തുന്നുണ്ട്. ഇത് വിപുലീകരിച്ച്‌ പ്രാദേശിക കച്ചവടക്കാരുമായി ചേര്‍ന്ന് ആമസോണ്‍ ഫ്രഷ് ആക്കിമാറ്റാനാണ് തീരുമാനം.

ഇന്ത്യയുടെ ഇ-കൊമേഴ്‌സ് മാര്‍ക്കറ്റ് കഴിഞ്ഞ പത്ത് വര്‍ഷത്തിനിടെ 200 ബില്യണ്‍ ഡോളര്‍ കടന്ന സാഹചര്യത്തില്‍ രാജ്യത്ത് വലിയ സാധ്യതയാണ് ആമസോണ്‍ കാണുന്നത്. ആമസോണിന്‍റെ ഏറ്റവും വലിയ രണ്ടാമത്തെ വിപണിയാണ് ഇന്ത്യ.