ബിഎസ്എൻഎലിൽ 1,999 രൂപ പ്ലാൻ, 200Mbps സ്പീഡിൽ ഡാറ്റ

ബിഎസ്എന്‍എല്‍ വരിക്കാർക്ക് സന്തോഷവാര്‍ത്ത. സർക്കാർ ഉടമസ്ഥതയിലുള്ള ടെലികോം കമ്പനിയായ ബിഎസ്എൻഎൽ (ഭാരത് സഞ്ചാർ നിഗം ലിമിറ്റഡ്) പുതിയ ബ്രോഡ്ബാൻഡ് പ്ലാൻ അവതരിപ്പിച്ചു. 1,999 രൂപയുടെ ഭാരത് ഫൈബർ ബ്രോഡ്ബാൻഡ് കോംബോ പ്ലാൻ ഇപ്പോൾ ഏതാനും തിരഞ്ഞെടുത്ത സർക്കിളുകളിൽ മാത്രമേ ബിഎസ്എൻഎൽ അവതരിപ്പിച്ചിട്ടുള്ളു. 200Mbps സ്പീഡ് നൽകുന്ന പ്ലാനിന്‌ 90 ദിവസത്തെ വാലിഡിറ്റിയാണുള്ളത്.

1500 ജിബി അല്ലെങ്കിൽ 1.5 ടിബി FUP ഡാറ്റ ലിമിറ്റന് ഈ ബ്രോഡ്ബാൻഡ് പ്ലാനിനുള്ളത്. ഈ ലിമിറ്റ് കഴിഞ്ഞാൽ സ്പീഡ് 2Mbps ആയി കുറയും. പക്ഷേ അതിനുശേഷവും അണ്‍ലിമിറ്റഡ് ആയി ഡൗണ്‍ലോഡും അപ്ലോഡും ചെയ്യാം.

ഏത് നെറ്റ്‌വർക്കിലേക്കും അൺലിമിറ്റഡ് വോയിസ് കോളും ഈ പ്ലാനെടുക്കുന്ന വരിക്കാർക്ക് ലഭിക്കും. ഒരുമാസമാണ് ഈ ബ്രോഡ്ബാൻഡ് പ്ലാനിന്റെ ഏറ്റവും കുറഞ്ഞ വാടക കാലാവധി. വരിക്കാർ സെക്യൂരിറ്റി ഡെപ്പോസിറ്റായി ഒരു മാസത്തെ ചാർജും നൽകണം. ഇപ്പോൾ ബിഎസ്എൻഎലിന്റെ വെബ്സൈറ്റിൽ ഈ ബ്രോഡ്ബാൻഡ് പ്ലാൻ ലൈവാണ്. ഏപ്രിൽ 6 വരെ പ്ലാൻ സബ്സ്ക്രൈബ് ചെയ്യാൻ സാധിക്കും. കൂടുതല്‍ വാലിഡിറ്റി ലഭ്യമാകുന്ന പ്ലാനുകള്‍ എപ്പോഴാണ് അവതരിപ്പിക്കുന്നത് എന്ന കാര്യം ബിഎസ്എന്‍എല്‍ അറിയിച്ചിട്ടില്ല. പ്ലാനിന്റെ കൂടുതല്‍ വിശദാശംങ്ങള്‍ ബിഎസ്എന്‍എല്‍ വെബ് സൈറ്റിലും അറിയാം.

നിങ്ങളുടെ ഫോണേതാ? 2019-ൽ തരംഗമായത് ഈ സ്മാർട്ഫോണുകൾ

നിലവിൽ തെലങ്കാനയിലും ചെന്നൈയിലുമാണ് ഈ പ്ലാൻ ലഭിക്കുക. അധികം വൈകാതെ മറ്റ് സർക്കിളുകളിലും ബിഎസ്എൻഎൽ ഇത് അവതരിപ്പിക്കും എന്നാണ് കരുതുന്നത്. മറ്റ് ബിഎസ്എൻഎൽ ഭാരത് ഫൈബർ പ്ലാനുകൾ എടുക്കുമ്പോൾ 999 രൂപ വിലയുള്ള ആമസോൺ പ്രൈം സബ്‌സ്‌ക്രിപ്‌ഷൻ സൗജന്യമായി ലഭിക്കും. പക്ഷെ ഈ പുതിയ പ്ലാനിലും ഈ ഓഫറുണ്ടോ എന്ന കാര്യം ബിഎസ്എൻഎൽ ഇതുവരെ വ്യക്തമാക്കിയിട്ടില്ല.

റീചാർജ് പ്ലാൻ: ജിയോ, എയർടെൽ, വൊഡാഫോൺ-ഐഡിയ ഏതാണ് ബെസ്റ്റ്?

ജിയോയുടെ 2,499 രൂപയുടെ ബ്രോഡ്ബാൻഡ് പ്ലാനിനോട് മത്സരിക്കാനാണ് ബിഎസ്എൻഎൽ ഈ പുതിയ പ്ലാൻ അവതരിപ്പിച്ചിരിക്കുന്നത് എന്നാണ് കരുതുന്നത്. 500Mbps സ്പീഡിലാണ് ഈ പ്ലാനിൽ ഡാറ്റ ലഭിക്കുക. 1.25 ടിബിയാണ് ജിയോ പ്ലാനിന്റെ FUP.