ടിവി വാങ്ങുമ്പോൾ സ്മാർട്ട്ഫോൺ ഫ്രീ! ഉത്സവകാല ഓഫറുമായി സാംസങ്

ദക്ഷിണ കൊറിയൻ കൺസ്യുമർ ഇലക്‌ട്രോണിക്‌സ് ഭീമനായ സാംസങ് ഉത്സവ സീസൺ പ്രമാണിച്ച് 'ഹോം, ഫെസ്റ്റിവൽ ഹോം' എന്ന പേരിൽ പുതിയ ഓഫറുകൾ പ്രഖ്യാപിച്ചു. ആകർഷകമായ ഫൈനാൻസ് സ്കീമുകൾ, 20000 രൂപ വരെ ക്യാഷ്ബാക്ക്, 990 രൂപയിൽ താഴെ തുടങ്ങുന്ന വിലക്കുറവുള്ള ഇഎംഐ ഘടന എന്നിവയാണ് നവംബർ 20 വരെ നീണ്ടു നിൽക്കുന്ന പുത്തൻ ഓഫറിന്റെ ആകർഷണങ്ങൾ എന്ന് സാംസങ് വ്യക്തമാക്കി.

സാംസങ് ക്യുഎൽഇഡി, ക്യുഎൽഇഡി 8K ടിവികൾ, യുഎച്ച്ഡി ടിവികൾ, സ്മാർട്ട് ടിവികൾ, സ്പേസ്മാക്സ് ഫാമിലി ഹബ് റഫ്രിജറേറ്ററുകൾ, കർഡ് മാസ്ട്രോ റഫ്രിജറേറ്ററുകൾ, ഫ്രോസ്റ്റ് ഫ്രീ റഫ്രിജറേറ്ററുകൾ, വാഷിംഗ് മെഷീനുകൾ, വാഷർ ഡ്രയർ, മൈക്രോവേവ് ഓവനുകൾ, വിൻഡ് ഫ്രീ എയർ കണ്ടീഷണറുകൾ എന്നിവയ്‌ക്കെല്ലാം 'ഹോം, ഫെസ്റ്റിവൽ ഹോം' പദ്ധതിയിൽ ഓഫറുകളുണ്ട്. അതെ സമയം ചില ടിവി മോഡലുകളോടൊപ്പം ഗാലക്‌സി ഫോൾഡ്, ഗാലക്‌സി S20 അൾട്രാ, ഗാലക്‌സി A21s, ഗാലക്‌സി A31 തുടങ്ങിയ പ്രീമിയം ഫോണുകളാണ് സാംസങ് സൗജന്യമായി നൽകുന്നത്.

സാംസങ് ക്യുഎൽഇഡി 8K ടിവി ശ്രേണിയിലെ 85-ഇഞ്ച്, 82-ഇഞ്ച്, 75-ഇഞ്ച് ടിവികൾ വാങ്ങുന്ന ഉപഭോക്താക്കൾക്ക് 1.74 ലക്ഷം രൂപ വിലയുള്ള സാംസങ് ഗാലക്‌സി ഫോൾഡ് ഫോൺ ആണ് സൗജന്യമായി ലഭിക്കുക. അതെ സമയം 75-അഞ്ചിന് മുകളിൽ സ്ക്രീൻ സൈസുള്ള ക്യുഎൽഇഡി ടിവി മോഡലുകൾ വാങ്ങുമ്പോൾ 97,999 രൂപ വിലയുള്ള ഗാലക്‌സി S20 അൾട്രാ ആണ് സൗജന്യം.

85 ഇഞ്ച് ഡിസ്പ്ലേ, 14 ലക്ഷം രൂപ; സോണിയുടെ അഡാറ് ടിവി Z8H ഇന്ത്യയിൽ

55-ഇഞ്ച് ക്യുഎൽഇഡി, 65-ഇഞ്ച് യുഎച്ഡി ടിവി വാങ്ങുന്നവർക്ക് 14,999 രൂപ വിലയുള്ള ഗാലക്‌സി A21s-ഉം 65-ഇഞ്ച് ക്യുഎൽഇഡി, ക്യുഎൽഇഡി 8K, 70-അഞ്ചോ അതിൽ കൂടുതൽ വലിപ്പമുള്ള ക്രിസ്റ്റൽ 4K യുഎച്ഡി ടിവി വാങ്ങുന്നവർക്ക് 19,999 രൂപ വിലയുള്ള ഗാലക്‌സി A31 ഫോണുമാണ് സൗജന്യമായി ലഭിക്കുക.

ഇത് കൂടാതെ ടിവിയുടെ പാനലുകൾക്ക് 3 വർഷം വാറന്റിയും (1+2 എക്സ്റ്റൻഡഡ്‌ വാറന്റി), ക്യുഎൽഇഡി മോഡലുകൾക്ക് 10 വർഷത്തേക്ക് നോ സ്ക്രീൻ ബേൺ-ഇൻ വാറന്റിയുമുണ്ട്.

6 പുത്തൻ സ്മാർട്ട് ടിവികളുമായി നോക്കിയ; വില 12,999 രൂപ മുതൽ
സ്മാർട്ട് ടിവിയ്ക്കൊപ്പം മാത്രമല്ല സ്മാർട്ട് ഫോൺ സൗജന്യമായി ലഭിക്കുക. സ്പേസ്മാക്സ് ഫാമിലി ഹബ് റഫ്രിജറേറ്ററുകൾ 37,999 രൂപ വിലയുള്ള ഗാലക്‌സി നോട്ട് 10 ലൈറ്റ് ആണ് സൗജന്യമായി ലഭിക്കുക.