ഫോണ്‍നമ്പറുകള്‍ പരസ്യക്കാര്‍ക്ക് കൈമാറുന്നുണ്ട്: ഫേസ്‍ബുക്ക്

സാന്‍ ഫ്രാന്‍സിസ്‍കോ: സുരക്ഷയുടെ ഭാഗമായി ഉപയോക്താക്കള്‍ കൈമാറുന്ന ഫോണ്‍ നമ്പറുകള്‍ പരസ്യക്കമ്പനികള്‍ക്കും നല്‍കാറുണ്ടെന്ന് സോഷ്യല്‍ മീഡിയ കമ്പനി ഫേസ്‍ബുക്ക്. അമേരിക്കയിലെ രണ്ട് സര്‍വകലാശാലകള്‍ നടത്തിയ പഠനത്തിലാണ് ഇത് തെളിഞ്ഞത് - ടെക്നോളജി വെബ്‍സൈറ്റ് ഗിസ്‍മോഡോ റിപ്പോര്‍ട്ട് ചെയ്‍തു.

സുരക്ഷയുടെ പേരില്‍ രണ്ട് ഘട്ടമായി ഉപയോക്താക്കളെ ലോഗിന്‍ ചെയ്യാന്‍ അനുവദിക്കുന്ന സംവിധാനം ഫേസ്‍ബുക്കിലുണ്ട്. ഉപയോക്താവിന്‍റെ ഫോണിലേക്ക് ഒരു രഹസ്യ കോഡ്‍ അയച്ചു തരികയും അത് കൃത്യമായാല്‍ മാത്രം ലോഗിന്‍ അനുവദിക്കുകയും ചെയ്യുന്നതാണ് ഈ രീതി.

ഈ ഫോണ്‍ നമ്പര്‍ ആണ് ഫേസ്‍ബുക്ക് പരസ്യദാതാക്കള്‍ക്ക് കൈമാറിയതായി കുറ്റസമ്മതം നടത്തിയത് - വാര്‍ത്ത ഏജന്‍സി എഎഫ്‍പി റിപ്പോര്‍ട്ട് ചെയ്‍തു.

ഫോണിലെ കോണ്‍ടാക്റ്റ് ഫേസ്‍ബുക്കുമായി സിങ്ക് ചെയ്യുന്നവരും സത്യത്തില്‍ പരസ്യക്കാരെ സഹായിക്കുന്നുണ്ട്. ഉപയോക്താവ് അറിയാതെ ഈ വിവരങ്ങളും ഫേസ്‍ബുക്ക് ഉപയോഗിക്കുകയാണ് - പഠനത്തില്‍ വ്യക്തമായി.

കൂടുതല്‍ വ്യക്തിഗതമായ പരിചരണം ഉപയോക്താക്കള്‍ക്ക് നല്‍കുന്നതിനാണ് നമ്പറുകള്‍ ഉപയോഗപ്പെടുത്തുന്നതെന്നാണ് ഫേസ്‍ബുക്ക് വാദിക്കുന്നത്. അമേരിക്കയിലെ ബോസ്റ്റണ്‍ നഗരത്തിലുള്ള നോര്‍ത്തീസ്റ്റേണ്‍ യൂണിവേഴ്‍സിറ്റി, ന്യൂ ജഴ്‍സിയിലെ പ്രിന്‍സ്‍ടണ്‍ യൂണിവേഴ്‍സിറ്റി എന്നിവിടങ്ങളിലാണ് പഠനം നടന്നത്.