ഇനി കാണാം പ്രകാശം പരത്തുന്ന ചെടികളേയും

രാത്രിയാകുമ്പോള്‍ വൈദ്യുതി വിളക്കുകള്‍ പോലെ പ്രകാശിക്കുന്ന ചെടികള്‍. ജയിംസ് കാമറൂണിന്റെ ഇതിഹാസ സയന്‍സ് ഫിക്ഷന്‍ സിനിമയായ 'അവതാര്‍' (2009) കണ്ടിട്ടുള്ളവര്‍ക്ക് 'പന്‍ഡോര' ( Pandora ) എന്ന വിദൂര ഉപഗ്രഹത്തിലെ വനങ്ങളും ചെടികളുമാകും ഇത് കേള്‍ക്കുമ്പോള്‍ ഓര്‍മ്മയിൽ വരുന്നത്. എന്നാല്‍ അമേരിക്കയില്‍ 'മസാച്യൂസെറ്റ്‌സ് ഇന്‍സ്റ്റിട്ട്യൂട്ട് ഓഫ് ടെക്‌നോളജി'യിലെ ( MIT ) കെമിക്കല്‍ എന്‍ജിനിയറിങ് ഗവേഷകര്‍ അടുത്തയിടെ പുറത്തുവിട്ട ഒരു പഠനം, ഇത് സാധ്യമാകും എന്നതിന്‍റെ സൂചനതരുന്നതാണ്.

പ്രത്യേക നാനോകണങ്ങള്‍ കടത്തിവിട്ട്, ഒരു മഷിത്തണ്ട് ചെടിയെ ഏതാണ്ട് നാലുമണിക്കൂര്‍ നേരം പ്രകാശിപ്പിക്കാന്‍ അവര്‍ക്ക് കഴിഞ്ഞു. ഈ വിദ്യ കൂടുതല്‍ മെച്ചപ്പെടുത്തിയാല്‍, ടേബില്‍ ലാമ്പായും ജോലിസ്ഥലത്തെ വെട്ടത്തിനുമൊക്കെ ഇത്തരം ചെടികള്‍ മതിയാകും. സ്ട്രീറ്റ് ലൈറ്റായി മാറാനും ചെടികള്‍ക്കാകുന്ന കാലം വിദൂരവുമല്ല. 'നാനോ ലെറ്റേഴ്‌സ്' ജേര്‍ണലില്‍ പ്രസിദ്ധീകരിച്ച പഠനറിപ്പോര്‍ട്ടിന്റെ മുഖ്യരചയിതാവ്, എം.ഐ.ടിയിലെ ഗവേഷക വിദ്യാര്‍ഥി സിയോണ്‍-യിയോങ് ക്വാക്ക് ആണ്.

കടപ്പാട് - മാതൃഭൂമി