'കട്ട ലോക്കല്‍' വിവരങ്ങള്‍ ഇനി ഈസി, ഗൂഗിള്‍ 'നെയ്‌ബര്‍ലി' എത്തി!

ഗൂഗിളിന്‍റെ ഏറ്റവും പുതിയ നെയ്‌ബര്‍ലി ആപ്പ് ഇന്ത്യയില്‍ എത്തി. ഇന്ന് മുംബൈയില്‍ വച്ചു നടന്ന പരിപാടിയിലാണ് ഗൂഗിള്‍ ഇത് അവതരിപ്പിച്ചത്. പ്രാദേശിക വിവരങ്ങള്‍ കൈമാറുന്നതിനായുള്ള ഈ ആപ്പ് ഇപ്പോള്‍ ആന്‍ഡ്രോയ്ഡ് ഉപഭോക്താക്കള്‍ക്ക് മാത്രമേ ഉപയോഗിക്കാനാവൂ.

ഒരു പ്രദേശത്തെ സംബന്ധിക്കുന്ന കൂടുതല്‍ വിവരങ്ങള്‍ അറിയാന്‍ ആണ് ഈ ആപ്പ് ഉപയോഗിക്കുന്നത്. ആളുകള്‍ക്ക് ചോദ്യങ്ങള്‍ ചോദിക്കാം. ഉത്തരം പറയാം. പ്രാദേശിക വിവരങ്ങള്‍ എപ്പോഴും മാറിക്കൊണ്ടിരിക്കുന്നതിനാല്‍ ഇങ്ങനെയുള്ള ചോദ്യങ്ങള്‍ക്ക് ഗൂഗിളില്‍ കൃത്യമായ ഉത്തരം കിട്ടാന്‍ പ്രയാസമാണ്.

ഈ ആപ്പില്‍ ഒരാള്‍ ഒരു ചോദ്യം ചോദിക്കുമ്പോള്‍ അത് തൊട്ടടുത്തുള്ള പ്രാദേശിക വിദഗ്ധന്‍മാരുടെ അടുത്തേയ്ക്ക് എത്തും. ഗൂഗിള്‍ വോയ്സ് ഉപയോഗിച്ച് ചോദ്യം ചോദിക്കുകയുമാവാം. ഇംഗ്ലീഷ് കൂടാതെ മറ്റു എട്ടു ഇന്ത്യന്‍ ഭാഷകളിലും ഈ ആപ്പ് പ്രവര്‍ത്തിക്കും

കൂടാതെ അറിയാവുന്ന പ്രാദേശിക വിവരങ്ങള്‍ പങ്കു വയ്ക്കുകയുമാവാം. ഗൂഗിള്‍ മാപ്പിലെ ലോക്കല്‍ ഗൈഡ് പോലെ ഇവിടെ ഏറ്റവും നന്നായി വിവരങ്ങള്‍ നല്‍കുന്ന 'അയല്‍ക്കാര'ന് ഗൂഗിളിന്‍റെ വക ബാഡ്ജൂകളും കമ്മ്യൂണിറ്റി ഇവന്റുകളില്‍ പങ്കെടുക്കാനുള്ള അവസരവുമെല്ലാം ലഭിക്കും

വിവരങ്ങള്‍ നല്‍കാനായി വ്യക്തിഗത വിവരങ്ങള്‍ പങ്കുവയ്ക്കണം എന്നില്ല. ഇപ്പോള്‍ ആപ്പിന്‍റെ ബീറ്റ വേര്‍ഷന്‍ ആണ് പുറത്തിറക്കിയിരിക്കുന്നത്. ആന്‍ഡ്രോയ്ഡ് 4.3 ജെല്ലിബീനോ അതിനു മുകളിലോ ഉള്ള ആന്‍ഡ്രോയ്ഡ് വേര്‍ഷന്‍ ഉപയോഗിക്കുന്നവര്‍ക്ക് ഇപ്പോള്‍ ഈ ആപ്പ് ഉപയോഗിക്കാന്‍ സാധിക്കും. ഗൂഗിള്‍ പ്ലേയില്‍ നിന്നും ഡൌണ്‍ലോഡ് ചെയ്യാവുന്നതാണ്.

ഓഫ്ലൈനിലും പ്രവര്‍ത്തിക്കുന്ന ഈ ആപ്പിന്‍റെ വലുപ്പം 7 എംബിയാണ്.