ക്രോം തുറക്കുമ്പോള്‍ പരസ്യ വീഡിയോ? പരിഹാരവുമായി ഗൂഗിള്‍

അത്യാവശ്യമായി വിവരങ്ങള്‍ സെര്‍ച്ച് ചെയ്യാനോ മറ്റോ വെബ്‌സൈറ്റുകള്‍ തുറക്കുമ്പോള്‍ ശബ്ദമായും ദൃശ്യമായും വരുന്ന പരസ്യ വീഡിയോകള്‍ ബുദ്ധിമുട്ട് ഉണ്ടാക്കുന്നത് പതിവാണ്. ഇതിന് പരിഹാരവുമായി എത്തിയിരിക്കുകയാണ് ഗൂഗിള്‍. ഡസ്ക്ടോപ്പുകള്‍ക്കായി കമ്പനി ഗൂഗിള്‍ ക്രോം 66 അവതരിപ്പിച്ചു.

ഉപഭോക്താക്കളുടെ വിവിധ വെബ്സൈറ്റുകളുടെ ദീര്‍ഘകാല ഉപയോഗം ശ്രദ്ധിച്ച് അതിനനുസരിച്ച് പരസ്യങ്ങള്‍ ക്രമീകരിക്കുകയാണ് ചെയ്യുക. വീഡിയോ, ഓഡിയോ രൂപത്തിലുള്ള പരസ്യങ്ങള്‍ മുഴുവനും ബ്ലോക്ക് ചെയ്യുന്നുണ്ട് ഇതില്‍.

ഓരോ തവണയും വെബ്സൈറ്റുകള്‍ തുറക്കുമ്പോള്‍ വരുന്ന പരസ്യങ്ങള്‍ ഉപഭോക്താക്കള്‍ ആദ്യ ആറു സെക്കന്റുകള്‍ക്കുള്ളില്‍ ക്ലോസ് ചെയ്യുന്നതായി ഗൂഗിള്‍ പ്രോഡക്റ്റ് മാനേജര്‍ ജോണ്‍ പാലറ്റ് പറയുന്നു. ഇങ്ങനെ ഓരോ തവണയും ക്ലോസ് ചെയ്യുക എന്ന ബുദ്ധിമുട്ട് ഒഴിവാക്കി 'ബ്ലോക്ക് അണ്‍വാണ്ടഡ് ഓട്ടോ പ്ലേയ്സ്' എന്ന ഒറ്റ ഫീച്ചര്‍ ആണ് ഗൂഗിള്‍ ഇതിലൂടെ അവതരിപ്പിക്കുന്നത്. ഗൂഗിള്‍ അപ്ഡേറ്റ് ചെയ്യുന്നതിലൂടെ ഉപഭോക്താക്കള്‍ക്ക് ഈ സൗകര്യം ലഭിക്കും