മിമോജിയെത്തുന്നു, ഇമോജിയെ കടത്തി വെട്ടാന്‍!

ഐഫോണിലും ഐപാഡിലും ഉപഭോക്താക്കളുടെ മുഖങ്ങളുടെ ത്രീഡി ഇമോജി ഫീച്ചര്‍ അവതരിപ്പിക്കാന്‍ ഒരുങ്ങുകയാണ് ആപ്പിള്‍. കമ്പനി ഇതിനു പേരിട്ടിരിക്കുന്നത് 'മിമോജി' എന്നാണ്. ആപ്പിള്‍ ഐഓസ്‌ 12 സോഫ്റ്റ്‌വെയര്‍ അപ്ഡേറ്റില്‍ ഐ മെസേജിനുള്ളില്‍ അവതരിപ്പിച്ച 'അനിമോജി'യുടെ ഒരു പരിഷ്കരിച്ച രൂപം എന്ന് പറയാം.

അവതാറുകളുടെ അടുത്ത തലമുറ വേര്‍ഷനാണ് മിമോജി. മറ്റുള്ളവരുമായി ചാറ്റ് ചെയ്യുമ്പോള്‍ അനുഭവപ്പെടുന്നത് അതേപടി പകര്‍ത്തി അയച്ചു കൊടുക്കാന്‍ സാധിക്കും എന്നത് രസകരമായ കാര്യമാണ്.

സാംസങ്ങ് ഇക്കാര്യത്തില്‍ കുറച്ചു മുന്നേ തന്നെ മുന്നോട്ടു പോയിരുന്നു. ഗാലക്സി എസ് 9 ഫോണുകളിലെ എ ആര്‍ ഇമോജി അവതരിപ്പിച്ചെങ്കിലും ഇത് ഉപഭോക്താക്കള്‍ക്ക് അത്ര പിടിച്ചില്ല എന്നാണ് പൊതുവേയുള്ള റിപ്പോര്‍ട്ട്. ഇതിനേക്കാള്‍ എത്ര മികച്ചതാണ് ആപ്പിളിന്‍റെ മിമോജി എന്ന് കാത്തിരുന്നു കണ്ടേ പറ്റൂ.

പുറത്തിറങ്ങിയില്ലെങ്കിലും മിമോജിയുടെ ചില പ്രത്യേകതകള്‍ ആദ്യമേ ഉറപ്പിച്ചു പറയാന്‍ പറ്റുമെന്നാണ് വിദഗ്ധര്‍ പറയുന്നത്. ഇതില്‍ ഒന്നാമത്തെ കാര്യം എ ആര്‍ ഇമോജിയെക്കാളും കൂടുതല്‍ കസ്റ്റമൈസേഷന്‍ ഓപ്ഷനുകള്‍ ലഭ്യമാണ് എന്നത് തന്നെയാണ്. ഗാലക്സി എസ് 9 ഫോണില്‍ ചുരുണ്ട മുടിക്കും വ്യത്യസ്ത തൊലി നിറങ്ങള്‍ക്കുമുള്ള ഓപ്ഷനുകള്‍ ഇല്ല തന്നെ. എന്നാല്‍ മിമോജിയില്‍ ഇവയെല്ലാം ലഭ്യമാണ്. കൃഷ്ണമണിയുടെ നിറം, കണ്ണട തുടങ്ങിയവയെല്ലാം മാറ്റാന്‍ സാധിക്കും.

എന്നാല്‍ ഷെയറിംഗ് ഓപ്ഷനുകള്‍ കുറവാണ് എന്നൊരു പ്രശ്നമുണ്ട് മിമോജിക്ക്. ഐമെസേജ്, ഫേസ്ടൈം തുടങ്ങിയവയില്‍ മാത്രമേ മിമോജി അയച്ചു കളിക്കാന്‍ പറ്റൂ. എന്നാല്‍, എ ആര്‍ ഇമോജിയാകട്ടെ, അനിമേറ്റഡ് ജിഫ് സ്വീകരിക്കുന്ന ഏതൊരു പ്ലാറ്റ്ഫോമിലും അയക്കാന്‍ പറ്റും