ആപ്പിൾ ആരാധകരുടെ കാത്തിരിപ്പിന് വിരാമമായി ഐഫോൺ 12 വില്പനക്കെത്തുകയാണ്. സാധാരണ ഗതിയിൽ സെപ്റ്റംബറിൽ പുത്തൻ ഐഫോൺ മോഡൽ വില്പനക്കെത്തുമെങ്കിലും കൊറോണ വൈറസ് മൂലം നിർമ്മാണ ശാലകൾ അടച്ചിടേണ്ടി വന്നത് ഒരു പക്ഷെ ഐഫോൺ 12-ന്റെ ലോഞ്ച് ഒക്ടോബർ മാസത്തേക്ക് നീട്ടിയേക്കാം. അതെ സമയം ഐഫോൺ 12 വരവ് സ്ഥിരം ആപ്പിൾ ഫോണിന്റെ വരവ് പോലെയാകില്ല എന്നാണ് റിപോർട്ടുകൾ.
5ജി കണക്ടിവിറ്റിയോടെയാണ് ഐഫോൺ 12, ഐഫോൺ 12 മാക്സ്, ഐഫോൺ 12 പ്രോ, ഐഫോൺ 12 പ്രോ മാക്സ് എന്നിങ്ങനെ നാല് ഫോണുകളുള്ള ഐഫോൺ 12 ശ്രേണി വില്പനക്കെത്തുക. 5ജി കണക്ടിവിറ്റിയിലേക്കുള്ള മാറ്റത്തിന്റെ ഭാഗമായുള്ള ഭീമയായ ചിലവ് ഫോണിന്റെ വിലയിൽ നേരിട്ട് പ്രതിഫലിക്കാതിരിക്കാൻ ചില ചിലവുചുരുക്കൽ നീക്കങ്ങൾക്കാണ് ആപ്പിൾ മുതിരുന്നത്. ഈ നീക്കത്തിന്റെ ഭാഗമായി ഐഫോൺ 12-ന്റെ ബോക്സിൽ ചാർജറും ഹെഡ്‍ഫോണും ഉണ്ടായിരിക്കില്ല ട്രെൻഡ്ഫോഴ്സ് റിപ്പോർട്ട് ചെയ്യുന്നു.
മാത്രമല്ല പുത്തൻ ഐഫോൺ 12 നിർമ്മിക്കാൻ ഘടകങ്ങൾ നൽകുന്നവർക്ക് വിലക്കുറവിൽ അവ എത്തിക്കാൻ ആപ്പിൾ നിർദേശം നൽകിയിട്ടുണ്ട് എന്ന് ആപ്പിൾ അനലിസ്റ്റ് ആയ മിങ്-ചി കൂ (മാക്റുമേഴ്‌സ്/ആപ്പിൾഇൻസൈഡർ) റിപ്പോർട്ട് ചെയ്യുന്നു. മദർ ബോർഡിലായിരിക്കും പ്രധാന മാറ്റം. ഐഫോൺ 12-ന്റെ മദർ ബോർഡ് ഐഫോൺ 11-ന്റെ മദർ ബോർഡിനേക്കാൾ ഏകദേശം 40-50 ശതമാനം വിലക്കുറവുള്ളതായിരിക്കും എന്നാണ് മിങ്-ചി കൂ വ്യക്തമാക്കുന്നത്.
വൺപ്ലസ് നോർഡ് vs ഐഫോൺ SE; 'വിലക്കുറവുള്ള' സ്മാർഫോണുകളിൽ ആരാണ് കേമൻ?
ഐഫോൺ 12-ന് 749 ഡോളർ (56,205 രൂപ), ഐഫോൺ 12 മാക്സിന് 799 ഡോളർ (59,957 രൂപ), ഐഫോൺ 12 പ്രോയ്ക്ക് 1049 ഡോളർ (78,717 രൂപ), ഐഫോൺ 12 പ്രോ മാക്സിന് 1149 ഡോളർ (86221 രൂപ) എന്നിങ്ങനെയാണ് ഏറ്റവും കുറഞ്ഞ വില പ്രതീക്ഷിക്കുന്നത്. മേല്പറഞ്ഞതിനേക്കാൾ വില ഒരല്പം കൂടാനാണ് സാധ്യത. അങ്ങനെയെങ്കിൽ ഇപ്പോൾ വില്പനയിലുള്ള ഐഫോൺ 11 ശ്രേണിയിലുള്ള ഫോണുകളെക്കാൾ വില കൂടുതൽ ആയിരിക്കും ഐഫോൺ 12 മോഡലുകൾക്ക്.
ഐഫോൺ 12
ഐഫോൺ 5-ന് സമാനമായി മെറ്റൽ എഡ്ജ് ഡിസൈനിലേക്കുള്ള മടങ്ങിപ്പോക്കാവും ഐഫോൺ 12 എന്നാണ് ഏറ്റവും പുതിയ റിപ്പോർട്ടുകൾ. ഇൻഫ്രാറെഡ് കാമറ, ഫ്ളഡ് ഇല്ല്യൂമിനേറ്റർ, ആമ്പിയന്റ് ലൈറ്റ് സെൻസർ, ഇൻഫ്രാറെഡ് കാമറ, ഡോട്ട് പ്രൊജക്ടർ എന്നിവയും പുത്തൻ ഐഫോൺ 12 ഫോണുകൾക്കുണ്ടാകും. 2,227mAh മുതൽ 3,687mAh വരെയുള്ള ബാറ്ററി കപ്പാസിറ്റി ആയിരിക്കും വിവിധ ഐഫോൺ 12 മോഡലുകൾക്ക്.
നൂബിയ റെഡ് മാജിക് 5S, ഗെയിമിങ് ഫോൺ നിരയിലെ പുത്തൻ താരം
ആപ്പിളിന്റെ പുറത്തിറങ്ങാനിരിക്കുന്ന A14 ബയോണിക് പ്രോസസ്സർ ആയിരിക്കും ഐഫോൺ 12 ശ്രേണിയുടെ കരുത്ത്. ക്വാൽകോം സ്നാപ്പ്ഡ്രാഗൺ 865+ പ്രോസസറിനോട് കിടപിടിക്കും വിധമാണ് ഈ പ്രോസസ്സർ തയ്യാറാക്കിയിരിക്കുന്നത്. 4 ജിബി/ 6 ജിബി ആയിരിക്കും റാം. ഐഫോൺ 12, ഐഫോൺ 12 മാക്സ് ഫോണുകൾക്ക് ഡ്യുവൽ-കാമറ സെറ്റപ്പും, ഐഫോൺ 12 പ്രോ, ഐഫോൺ 12 പ്രോ മാക്സ് ഫോണുകൾക്ക് ട്രിപ്പിൾ-കാമറ സെറ്റപ്പും ആയിരിക്കും. ലിഡാർ സ്കാനർ 3D കാമറ സംവിധാനം ഐഫോൺ 12 ഫോണുകൾക്കുണ്ടാകും എന്നും റിപ്പോർട്ടുകളുണ്ട്.