ലെനോവോ Z5 ചൈനയില്‍ ഇന്ന് അവതരിപ്പിക്കും

ലെനോവോയുടെ പുതിയ പ്രീമിയം സ്മാർട്ട്ഫോണ്‍ ആയ Z5 ഇന്ന് പുറത്തിറങ്ങും. ചൈന ഫിലിം ഡയറക്ടര്‍ സെന്‍ററില്‍ വച്ച് ഇന്ത്യന്‍ സമയം രാവിലെ 11.30 നായിരിക്കും പരിപാടി നടക്കുക.

കൂടുതല്‍ മികച്ച ഫീച്ചറുകളുമായാണ് പുതിയ Z5 എത്തുന്നത്. നേരിയ ബെസലുകളോട് കൂടിയ ഫുൾ സ്ക്രീൻ ഡിസ്പ്ലെ ഫോൺ ആയിരിക്കും Z5. ഫോണിന്‍റെ 90 ശതമാനവും സ്ക്രീൻ ആയിരിക്കും എന്നതാണ് പ്രധാന ഹൈലൈറ്റ്. Z5ന്റേത് എന്നു പറഞ്ഞ് പ്രചരിക്കുന്ന ചിത്രങ്ങളിലും ക്യാമറകളോ, സെൻസറുകളോ ഒന്നും കാണാനില്ല. സ്ക്രീൻ മാത്രമായ ഈ സ്മാർട്ട്ഫോണായിരിക്കും ഈ വർഷത്തെ ഏറ്റവും പുതുമയേറിയ സ്മാർട്ട്ഫോൺ.

മറ്റൊരു ഞെട്ടിക്കുന്ന സവിശേഷത എന്നുപറയുന്നത് ഇതിലെ സംഭരണശേഷിയാണ്. Z5 ന് 4TB സംഭരണശേഷിയുണ്ടെന്നാണ് കമ്പനി അവകാശപ്പെടുന്നത്. ഈ ഫോണിൽ ഏതാണ്ട് 10 ലക്ഷം ഫോട്ടോകളും 2,000 എച്ച്ഡി സിനിമകളും, 150,000 ലോസ്ലെസ് മ്യൂസിക് ഫയലുകളും സ്റ്റോർ ചെയ്യാമെന്നാണ് പറയുന്നത്. വ്യത്യസ്തമായ ഫീച്ചറുകൾ അവതരിപ്പിച്ചാൽ മാത്രമെ ഉപഭോക്താക്കളുടെ ശ്രദ്ധയാകർഷിക്കാൻ കഴിയുള്ളൂ എന്നതുകൊണ്ട് ഭീമൻ സംഭരണ ശേഷിയും ഫുൾ സ്ക്രീൻ ഡിസ്പ്ലെയുമായാണ് ലെനോവോ എത്തുന്നത്.

വില സംബന്ധിച്ചുള്ള വിവരങ്ങളൊന്നും കമ്പനി ഇതുവരെ പുറത്തുവിട്ടിട്ടില്ല. വിപണിയിലെത്തി കഴിഞ്ഞാൽ പ്രീമിയം വിഭാഗത്തിലെ എല്ലാ സ്മാർട്ട്ഫോണുകൾക്കും വലിയ ഒരു വെല്ലുവിളി തന്നെയായിരിക്കും ലെനോവോയുടെ Z5 സ്മാർട്ട്ഫോൺ എന്നാണ് കരുതുന്നത്.