ഫിറ്റ്‌നസ് പ്രേമികള്‍ക്കായി ഷവോമിയുടെ പുതിയ എം ഐ ബാന്‍ഡ് 3 ഉടന്‍!

ഷവോമിയുടെ വിപണിയില്‍ ഇറങ്ങാന്‍ പോകുന്ന ഫിറ്റ്നസ് ബാന്‍ഡ് എംഐ ബാന്‍ഡ് 3യ്ക്ക് ബ്ലൂടൂത്ത് സൗകര്യവും ഉണ്ടായിരിക്കും. ട്വിറ്ററിലൂടെയാണ് കമ്പനി ഇക്കാര്യം അറിയിച്ചത്. ഈ വര്‍ഷം ഉടനെ തന്നെ ഇത് ഇറങ്ങും.

ഷവോമിയുടെ തന്നെ എംഐ ബാന്‍ഡ് 2 ഇപ്പോള്‍ വിപണിയില്‍ നന്നായി വിറ്റഴിയുന്ന ഫിറ്റ്നസ് ബാന്‍ഡുകളിലൊന്നാണ്. 2016 ജൂണിലായിരുന്നു ഇത് വിപണിയില്‍ എത്തിയത്. ആപ്പിള്‍ വാച്ചിന് ശേഷം വിപണിയില്‍ ഏറ്റവും കൂടുതല്‍ വിറ്റഴിഞ്ഞ ബാന്‍ഡ് ആയിരുന്നു ഇത് കഴിഞ്ഞ വര്‍ഷം. കൂടാതെ നടന്‍ ഹൃത്വിക് റോഷന്‍റെ എച്ച് ആര്‍ എക്സ് ബ്രാന്‍ഡുമായി ചേര്‍ന്ന് എച്ച് ആര്‍ എക്സ് എഡിഷന്‍ ബാന്‍ഡ് 2 ഇറക്കാനും ഷവോമി കരാര്‍ ഉണ്ടാക്കിയിരുന്നു. കഴിഞ്ഞ സെപ്റ്റംബറിലായിരുന്നു ഇത്.

രൂപത്തില്‍ ബാന്‍ഡ് 2വിന്‍റെ പോലെതന്നെയായിരിക്കും ബാന്‍ഡ് 3 യും. ഒഎല്‍ഇഡി ഡിസ്പ്ലേ, കപ്പാസിറ്റീവ് ബട്ടന്‍ എന്നിവ ഇതിനും കാണും. എന്നാല്‍ കുറച്ചുകൂടി വലിയ സ്ക്രീന്‍ ആയിരിക്കും ഇതിനുണ്ടാവുക എന്ന് കരുതുന്നു.

സോണിയും സാംസങും എച്ച്.ടി.സിയുമടക്കമുള്ള മുന്‍നിര സ്മാര്‍ട്‌ഫോണ്‍ കമ്പനികളെല്ലാം ഫിറ്റ്‌നസ് ബാന്‍ഡുകളും വിപണിയിലെത്തിച്ചിട്ടുണ്ട്. അയ്യായിരത്തിന് മേല്‌പ്പോട്ടാണ് ഇവയുടെയൊക്കെ വില. അതുകൊണ്ട് തന്നെ ഫിറ്റ്‌നസ് കാത്തുസൂക്ഷിക്കാന്‍ ഇഷ്ടപ്പെടുന്ന എല്ലാവര്‍ക്കും ഫിറ്റ്‌നസ് ബാന്‍ഡ് വാങ്ങാന്‍ കഴിയുന്നില്ല. ഇവിടെയാണ് വിലക്കുറവുകൊണ്ട് ഇന്ത്യന്‍ വിപണിയില്‍ തരംഗം തീര്‍ത്ത ചൈനീസ് കമ്പനിയായ ഷവോമി രക്ഷയ്‌ക്കെത്തുന്നത്.