എംഐ സ്മാർട്ട് ബാന്‍റ് 4 ഇന്ത്യയിലെത്തി: വില അറിയേണ്ടേ?

ചൈനീസ് വിപണിയിൽ വില്പനയാരംഭിച്ച ഷവോമിയുടെ എംഐ സ്മാർട്ട്ബാന്‍റ് 4 ചൊവ്വാഴ്ച ഇന്ത്യയിൽ പുറത്തിറങ്ങി. 2,299 രൂപയാണ് ബാൻഡിന്റെ വില.സ്മാര്‍ട്ടര്‍ ലിവിംഗ് 2020 എന്ന് പേരിട്ട ഇവന്റിലാണ് കമ്പനി എംഐ ബാൻഡ് 3 യുടെ പിൻഗാമിയെ അവതരിപ്പിച്ചത്.

120 × 240 പിക്‌സൽ റസല്യൂഷനുള്ള 0.95 ഇഞ്ച് കളർ അമോലെഡ് 2.5 ഡി ടച്ച് ഡിസ്‌പ്ലേയാണ് എംഐ സ്മാർട്ട് ബാൻഡ് 4ന്റേത്. മി ബാൻഡ് 3 ലേതിനേക്കാൾ 39.9 ശതമാനം വലുതാണ് ഈ ടച്ച് ഡിസ്പ്ലേ. എന്നാലും മൊത്തത്തിലുള്ള ഫോം ഫാക്ടർ പഴയത് തന്നെയാണ്. എംഐ ബാൻഡ് 3 ഉപയോഗിക്കുന്ന ആളാണ് നിങ്ങളെങ്കിൽ ആ ബാൻഡിനായി വാങ്ങിയ എല്ലാ സ്ട്രാപ്പുകളും ഈ പുത്തൻ ബാൻഡിനും ഉപയോഗിക്കാം.

ശരീരത്തിന്റെ പ്രവർത്തനം നിരീക്ഷിക്കാനായി ആറ് ആക്സിസ് ആക്‌സലറോമീറ്റർ സെൻസറുകളാണുള്ളത്. ഓടുന്നതും നടക്കുന്നതും, സൈക്ലിങും, നീന്തലും, വ്യായാമവുമെല്ലാം ഇതിലുൾപ്പെടും. 5 ATM റേറ്റിങ്ങും എംഐ 4 സ്മാർട്ട് ബാൻഡിനുണ്ട്. ഫ്രീസ്റ്റൈൽ, മിക്സഡ് സ്റ്റൈൽ, ബട്ടർഫ്‌ളൈ തുടങ്ങി ഒട്ടേറെ നീന്തൽ രീതികളെയും ബാൻഡ് തിരിച്ചറിയും.

ബാൻഡിന്റെ RAM 512KBയാണ്. ഇത് 16MB വരെ വികസിപ്പിക്കാനാവും. 135 mAh ബാറ്ററി ഇരുപത് ദിവസം വരെ നീണ്ടു നിൽക്കും എന്നാണ് ഷവോമി അവകാശപ്പെടുന്നത്. രണ്ട് മണിക്കൂറിൽ താഴെ സമയം മാത്രമേ ബാൻഡ് മുഴുവനായി ചാർജ് ചെയ്യാനായി ആവശ്യമുള്ളു. വോയ്‌സ് കമാൻഡുകൾ പ്രവർത്തനക്ഷമമാക്കുന്നതിന് ഒരു ബിൽറ്റ്-ഇൻ മൈക്രോഫോണും ബാൻഡിലുണ്ട്. ഈ മൈക്രോഫോൺ ബ്ലൂടൂത്ത് 5.0 BLE ഉപയോഗിച്ച് സ്മാർട്ട്‌ഫോണുകളിലേക്ക് കണക്റ്റുചെയ്യുന്നു. കൂടാതെ ആൻഡ്രോയ്ഡ് 4.4 അല്ലെങ്കിൽ iOS 9നും അതിനു മുകളിലും പ്രവർത്തിക്കുന്ന സ്മാർട്ഫോണുകൾക്കും ഇത് അനുയോജ്യമാണ്.

ഓറഞ്ച്, പർപ്പിൾ, ബ്ലാക്ക്, ബർഗണ്ടി, ബീജ് എന്നിങ്ങനെ അഞ്ചു നിറങ്ങളിലാണ് ബാൻഡ് ഇറക്കിയിട്ടുള്ളത്. ഇ-കോമേഴ്‌സ് വെബ്സൈറ്റ് ആയ ഫ്ലിപ്കാർട് വഴിയായിരിക്കും എംഐ 4 ബാന്‍റിന്‍റെ വില്‍പ്പന നടക്കുക. സെപ്റ്റംബർ 19 മുതൽ ബാൻഡ് വാങ്ങാനാവും. ഇതിന് മുന്‍പുള്ള ഷവോമി എംഐ ബാന്‍റ് 3 ഇന്ത്യയില്‍ പുറത്തിറക്കിയത് 1999 രൂപയ്ക്കായിരുന്നു.

എംഐ സ്മാർട്ട്ബാൻഡ് 4 കൂടാതെ എംഐ 4K എൽഇഡി ടിവി, എംഐ സ്മാർട്ട് വാട്ടർ പ്യൂരിഫൈർ, എംഐ സൗണ്ട്ബാർ, എംഐ മോഷൻ ആക്ടിവേറ്റഡ് നൈറ്റ് ലൈറ്റ് 2 എന്നീ ഉൽപ്പന്നങ്ങളും ഇന്നത്തെ ഇവന്റിൽ കമ്പനി അവതരിപ്പിച്ചിട്ടുണ്ട്.

ബ്ലാക്ക് കളർ വാരിയന്റിൽ വരുന്ന എംഐ സൗണ്ട്ബാറിന്റെ വില 4,999 രൂപയാണ്. എംഐ ടിവി 4 എക്‌സിന് (65 ഇഞ്ച്) വില 54,999 രൂപയാണ്. എംഐ ടിവി 4 എക്‌സിന്റെ (50 ഇഞ്ച്) വില 29,999 രൂപയും എംഐ ടിവി 4 എക്‌സിന് (43 ഇഞ്ച്) 24,999 രൂപയും എംഐ ടിവി 4 എക്ക് (40 ഇഞ്ച്) വില 17,999 രൂപയുമാണ്. ഇവയെല്ലാം സെപ്റ്റംബർ 29 മുതൽ ഫ്ലിപ്കാർട്ടിലൂടെ വാങ്ങാൻ ലഭ്യമാവും.

11,999 രൂപ വിലയുള്ള എംഐ സ്മാർട്ട് വാട്ടർ പ്യൂരിഫയറിന്റെ വിൽപ്പന സെപ്റ്റംബർ 29 ന് ഉച്ചക്ക് 12 മണിക്ക് ആരംഭിക്കും. എംഐ മോഷൻ ആക്റ്റിവേറ്റഡ് നൈറ്റ് ലൈറ്റ് 2 സെപ്റ്റംബർ 18 ന് 500 രൂപ പ്രത്യേക വിലയ്ക്ക് ക്രൗഡ് ഫണ്ടിംഗ് വിൽപ്പനയ്‌ക്കെത്തും.