വാനാക്രൈ ആക്രമണത്തിനു പിന്നില്‍ ഉത്തരകൊറിയയെന്ന് വെളിപ്പെടുത്തി മൈക്രോസോഫ്റ്റ്

സൈബര്‍ ലോകത്തെ വിറപ്പിച്ച വാനാക്രൈ ആക്രമണത്തിനു പിന്നിൽ ഉത്തരകൊറിയയെന്നു വെളിപ്പെടുത്തി മൈക്രോസോഫ്റ്റ് പ്രസിഡൻ്റ് ബ്രാഡ് സ്മിത്ത്. ഇക്കഴിഞ്ഞ മെയിൽ 150 ഓളം രാജ്യങ്ങളിലെ കമ്പ്യൂട്ടറുകളെ ബാധിച്ച വാനാക്രൈ ആക്രമണത്തിനു പിന്നിൽ ഉത്തര കൊറിയയാണെന്ന് മുൻപേ റിപ്പോര്‍ട്ടുകളുണ്ടെങ്കിലും ഇപ്പോഴാണ് മൈക്രോസോഫ്റ്റ് വാര്‍ത്ത സ്ഥിരീകരിക്കുന്നത്.

കമ്പ്യൂട്ടറിലെ വിവരങ്ങള്‍ ഉപയോഗിക്കാനാവാത്ത വിധത്തിലാക്കി മോചനദ്രവ്യം ചോദിക്കുന്ന കുരുക്കായിരുന്നു വാനാക്രൈയുടേത്. അമേരിക്കയുടെ ദേശീയസുരക്ഷാ ഏജൻസിയിൽ നിന്ന് സൈബര്‍ ടൂളുകള്‍ ഹാക്ക് ചെയ്തെടുത്താണ് ഉത്തരകൊറിയ വാനാക്രൈ രൂപപ്പെടുത്തിയത് എന്ന് ബ്രാഡ് സ്മിത്ത് പറഞ്ഞു.

അപ്ഡേഷൻ നടത്താതിരുന്ന പഴയ വിൻഡോസ് സോഫ്റ്റ്‍‍വെയറുകളെയാണ് വാനാക്രൈ ബാധിച്ചതെന്നും മൈക്രോസോഫ്റ്റിന് ഇതിൽ ഉത്തരവാദിത്തമില്ലെന്നും സ്മിത്ത് പറഞ്ഞു. കുറച്ചു നാളുകളായി പുതിയ രീതിയിലുള്ള സൈബര്‍ ആക്രമണങ്ങളാണ് നടക്കുന്നതെന്നും ഇതിനെതിരെ നയം രൂപപ്പെടുത്തേണ്ടതുണ്ടെന്നും സ്മിത്ത് കൂട്ടിച്ചേര്‍ത്തു.

Microsoft confirms who is behind Wannacry

Microsoft president Brad Smith confirmed that it was North Korea behind wannacry cyber attack.