ചൈനീസ് പ്രീമിയം സ്മാർട്ട്ഫോൺ നിർമ്മാതാക്കളായ വൺപ്ലസ് രണ്ടും കൽപ്പിച്ചാണ്. കഴിഞ്ഞ മാസം വിലക്കുറവുള്ള തങ്ങളുടെ ആദ്യ ഫോൺ നോർഡ് വില്പനക്കെത്തിച്ച വൺപ്ലസ് ബഡ്ജറ്റ് സ്മാർട്ട്ഫോൺ ശ്രേണിയുടെ താഴെത്തട്ടിൽ ഇറങ്ങാനാണ് പ്ലാൻ. 25,000 രൂപ മുതൽ വില ആരംഭിക്കുന്ന നോർഡിന് താഴെയായി 18,000 രൂപയ്ക്ക് താഴെ വില വരുന്ന മറ്റൊരു ഫോണിന്റെ പണിപ്പുരയിലാണ് വൺപ്ലസ്.
ചൈനീസ് മാധ്യമങ്ങൾ റിപ്പോർട്ട് ചെയ്യുന്നതനുസരിച്ച് ക്ലോവർ എന്നാവും ഈ പുത്തൻ ഫോണിന്റെ പേര്. 6,000mAh ബാറ്ററി, എച്ഡി+ ഡിസ്പ്ലേ, ക്വാൽകോം സ്നാപ്ഡ്രാഗൺ 460 SoC പ്രോസസ്സർ എന്നിവ സഹിതമെത്തുന്ന വൺപ്ലസ് ക്ലോവറിന്റെ വില ഏകദേശം 200 ഡോളറിൽ (ഏകദേശം 14,700 രൂപ) ആരംഭിക്കും എന്നാണ് ആൻഡ്രോയിഡ് സെൻട്രൽ റിപ്പോർട്ട് ചെയ്യുന്നത്. വൺപ്ലസ് നോർഡ് ലഭ്യമല്ലാത്ത അമേരിക്കൻ വിപണിയിലും മിഡ്-റേഞ്ച് സ്മാർട്ട്ഫോണുകൾക്ക് ഏറെ വളക്കൂറുള്ള ഇന്ത്യ പോലുള്ള വിപണികളും ലക്ഷ്യമിട്ടാണ് വൺപ്ലസ് ക്ലോവർ തയ്യാറാവുന്നത് എന്ന് റിപ്പോർട്ട് കൂട്ടിച്ചേർക്കുന്നു.
അടുത്ത മാസം തന്നെ അവതരിപ്പിക്കും എന്ന് കരുതുന്ന വൺപ്ലസ് ക്ലോവറിന് 6.52-ഇഞ്ച് എച്ഡി+ (720x1,560 പിക്സൽ) ഡിസ്പ്ലേ ആയിരിക്കും. ക്വാൽകോം സ്നാപ്ഡ്രാഗൺ 460 SoC പ്രോസസ്സർ 4 ജിബി റാമുമായാവും ബന്ധിപ്പിക്കുക. 64 ജിബി ഓൺബോർഡ് മെമ്മറി ഒരു മൈക്രോ എസ്ഡി കാർഡിന്റെ സഹായത്തോടെ വർദ്ധിപ്പിക്കാം.
Also read: വൺപ്ലസ്സിന്റെ വിലക്കുറവുള്ള സ്മാർട്ട്ഫോൺ, നോർഡ് എത്തി; 24,999 രൂപ മുതൽ
13-മെഗാപിക്സൽ പ്രൈമറി കാമറ (എഫ്/2.2 ലെൻസ്), രണ്ട് 2-മെഗാപിക്സൽ സെൻസറുകൾ (എഫ്/2.4 ലെൻസ്) എന്നിവ ചേർന്ന ട്രിപ്പിൾ കാമറ ആയിരിക്കും വൺപ്ലസ് ക്ലോവറിന്. കാമറ ക്ലസ്റ്ററിൽ തന്നെ ഫിംഗർപ്രിന്റ് സെൻസറുമുണ്ടാവും. 18W ഫാസ്റ്റ് ചാർജിങ് സപ്പോർട്ടുള്ള 6,000mAh ബാറ്ററിയാവും വൺപ്ലസ് ക്ലോവറിന്റെ മറ്റൊരു ഹൈലൈറ്റ്. ചുരുക്കത്തിൽ റിയൽമി C15 മോഡലിനോട് കിട പിടിക്കും രീതിയിലാകും വൺപ്ലസ് ക്ലോവറിന്റെ നിർമ്മിതി.
ഇന്ത്യയിലെത്തുന്ന വൺപ്ലസ് ക്ലോവറിൽ പക്ഷെ ക്വാൽകോം സ്നാപ്ഡ്രാഗൺ 460 SoC പ്രോസസറിന് പകരം കൂടുതൽ മികച്ച ഒക്ടകോർ സ്നാപ്ഡ്രാഗൺ 662 SoC പ്രോസസ്സർ ഇടം പിടിച്ചേക്കും എന്നും റിപ്പോർട്ടുകളുണ്ട്. ഇതാണ് ഇന്ത്യൻ വിപണിയിൽ ക്ലോവറിന്റെ വില 18,000 രൂപയ്ക്കടുത്തേക്കെത്തിക്കുന്ന ഘടകം. ഈ വർഷം ജനുവരിയിൽ അവതരിപ്പിച്ച ഈ പ്രോസസ്സർ അടുത്തിടെ ലോഞ്ച് ചെയ്ത മോട്ടോ ജി9 സ്മാർട്ട്ഫോണിലൂടെ ഇന്ത്യയിൽ അരങ്ങേറിക്കഴിഞ്ഞു.