Amazon Great Indian Festival: വൺപ്ലസ് ടിവി എങ്ങിനെ വാങ്ങാം?

മുൻനിര സ്മാർട്ഫോൺ നിർമ്മാതാക്കളായ വൺപ്ലസ് തങ്ങളുടെ ആദ്യത്തെ സ്മാർട്ട് ടിവിയും പുതിയ ഫോണും ഇന്ന് പുറത്തിറക്കി. വൺപ്ലസ് Q1 പ്രൊ, വൺപ്ലസ് Q1 എന്നീ രണ്ട് പതിപ്പുകളിലായാണ് വൺപ്ലസ് ടിവി പുറത്തിറക്കിയത്.

Q1 55-ഇഞ്ച് പതിപ്പിന് 69,900 രൂപയും Q1 Pro 55-ഇഞ്ച് പതിപ്പിന് 99,900 രൂപയുമാണ് വില. QLED സ്ക്രീൻ, ഡോൾബി വിഷൻ, 50 വാട്ട്സ് പവറുള്ള എട്ട് സ്പീക്കറുകൾ, ആന്റി ഗ്ലെയറുള്ള ഡിസ്പ്ലേ, ഗാമ കളർ പ്രോസസ്സർ എന്നിവയാണ് വൺപ്ലസ് ടിവിയുടെ പ്രധാന സവിശേഷതകൾ. ആൻഡ്രോയിഡ് ടിവിയിൽ പ്രവർത്തിക്കുന്ന ടിവിക്ക് കുറഞ്ഞത് മൂന്ന് വർഷത്തേക്കെങ്കിലും അപ്ഡേറ്റുകൾ ലഭിക്കും.

ട്രിപ്പിൾ ക്യാമറയോട് കൂടി വരുന്ന വൺപ്ലസ് 7 ടി സ്മാർട്ഫോണിന് 90Hz ഡിസ്‌പ്ലേയാണുള്ളത്. ഈ വർഷം മേയിൽ വൺപ്ലസ് അവതരിപ്പിച്ച വൺപ്ലസ് 7 എന്ന മോഡലിന്റെ അപ്ഡേറ്റഡ് വേർഷനാണ് വൺപ്ലസ് 7 ടി. സ്മാർട്ട് ടിവിക്ക് സമാനമായി രണ്ട് പതിപ്പുകളിലാണ് വണ്‍പ്ലസ് 7 ടി ഫോൺ അവതരിപ്പിച്ചിരിക്കുന്നത്. 8 ജിബി+128 ജിബി പതിപ്പിന് 37,999 രൂപയാണ് വില.8 ജിബി + 256 ജിബി മോഡലിന് 38,999 രൂപയാണ്.

വൺപ്ലസ് 7 ടി സ്മാർട്ഫോണും വൺപ്ലസ് ടിവിയും സെപ്റ്റംബർ 29 മുതൽ ഇ-കോമേഴ്‌സ് വെബ്സൈറ്റായ ആമസോണിന്റെ ആമസോൺ ഗ്രേറ്റ് ഇന്ത്യൻ ഫെസ്റ്റിവലിൽ വാങ്ങാൻ കഴിയും.ആമസോൺ പ്രൈം മെമ്പർഷിപ് ഉള്ളവർക്ക് ഒരു ദിവസം മുൻപേ, അതായത് സെപ്റ്റംബർ 28 ഉച്ചയ്ക്ക് 12 മണി മുതൽ വൺപ്ലസ് ടിവി വാങ്ങാൻ കഴിയും.

കൂടാതെ വൺപ്ലസ് സ്റ്റോറുകളിൽ വൺപ്ലസ് ടിവി നേരിട്ട് കാണാനും പരിശോധിക്കാനുമുള്ള സൗകര്യം ലഭിക്കും. ഇതിന്പുറമെ എട്ട് നഗരങ്ങളിലായി പോപ്പ് അപ്പ് ഇവന്റുകൾ വൺപ്ലസ് സംഘടിപ്പിക്കുന്നുണ്ട്. ഇതിലൂടെയും ഉപഭോക്താക്കൾക്ക് വൺപ്ലസ് ടിവിയിലെ കാഴ്ചാനുഭവം പരീക്ഷിക്കാം. ബെംഗളൂരു, മുംബൈ, ഡൽഹി, ഹൈദരാബാദ്, ചെന്നൈ, പുണെ, കൊൽക്കത്ത, അഹമ്മദാബാദ് എന്നിവിടങ്ങളിൽ സെപ്റ്റംബർ 27 ന് ഉച്ചയ്ക്ക് രണ്ട് മണി മുതലാണ് ഇത് നടക്കുക.