ഏരിയ 51 ലെ ഏലിയന്‍ സാന്നിധ്യം; യുഎസ് മിലിട്ടറി ബേസ് തകര്‍ക്കാന്‍ സമ്മതമറിയിച്ചെത്തിയത് നാല് ലക്ഷത്തോളം ആളുകള്‍

കുറച്ചു ദിവസങ്ങളായി സോഷ്യല്‍ മീഡിയയില്‍ ട്രെന്‍ഡിംഗാണ് ഏരിയ 51 എന്ന വാക്ക്. ട്രോള്‍ പേജുകളിലും സോഷ്യല്‍ മീഡിയ ഗ്രൂപ്പുകളിലും സജീവ ചര്‍ച്ചയ്ക്ക് വഴി വച്ച ഏരിയ 51 എന്താണെന്ന് എല്ലാവര്‍ക്കും പിടികിട്ടികാണില്ല. അമേരിക്കയിലെ നെവാദയില്‍ സ്ഥിതി ചെയ്യുന്ന യുഎസ് ആര്‍മിയുടെ നിയന്ത്രണത്തിലുളള തന്ത്രപ്രധാനമായ ഇടമാണ് ഏരിയ 51. എന്നാല്‍ ഇവിടമെങ്ങനെയാണ് അപ്രതീക്ഷിതമായി സോഷ്യല്‍ മീഡിയയില്‍ വൈറലായതെന്നാകും സംശയം.

ഒരാള്‍ ഫെയ്സ്ബുക്കില്‍ തുടങ്ങിവച്ച പ്രാങ്ക് മെസേജാണ് സംഭവങ്ങളുടെ തുടക്കം. സെപ്റ്റമ്പര്‍ 20ന് നെവാദയിലെ ഏരിയ 51 മിലിട്ടറി ക്യാമ്പ് തകര്‍ത്ത് ഏലിയന്‍സിനെ രക്ഷിക്കാം എന്നതായിരുന്നു സന്ദേശം. ഇയാള്‍ സോഷ്യല്‍ മീഡിയയില്‍ പോസ്റ്റ് ചെയ്ത ഇവന്‍റ് ഇന്‍വൈറ്റ് അതിവേഗം ഇന്‍റര്‍നെറ്റില്‍ വൈറലായി. ഏരിയ 51ല്‍ എത്താന്‍ സമ്മതറിയിച്ച് നാല് ലക്ഷത്തോളം ആളുകളാണ് ഇന്‍വൈറ്റ് സ്വീകരിച്ചത്.

ഏലിയന്‍ സാന്നിധ്യമുണ്ടെന്ന് കോണ്‍സ്പിരന്‍സി തിയറികള്‍ പറയുന്ന ഇടമാണ് ഏരിയ 51. മുന്‍പും ഇവിടം വാര്‍ത്തകളില്‍ നിറഞ്ഞിട്ടുണ്ട്. ആദ്യകാലത്ത് ഏരിയ 51 തികച്ചും നിഗൂഢമായൊരു ഇടമായിരുന്നെങ്കിലും പിന്നീട് ഈ പ്രദേശം തങ്ങളുടെ നിയന്ത്രണത്തിലാണെന്ന് അമേരിക്ക വെളിപ്പെടുത്തിയിരുന്നു. അമേരിക്കന്‍ വ്യോമസേനയുടെ പൂര്‍ണ്ണ നിയന്ത്രണത്തിലുള്ള പ്രദേശത്തിന്‍റെ ഔദ്യോഗിക നാമം നെവാദ ടെസ്റ്റ് ആൻഡ് ട്രെയിനിങ് റേഞ്ച് എന്നാണ്. എഡ്വാർഡ് എയർഫോഴ്സ് ബേസിന്റെ ഭാഗമാണ് ഈ കേന്ദ്രം.


മിലിട്ടറി ആവശ്യങ്ങള്‍ക്കു വേണ്ടിയാണ് ഇവിടം ഉപയോഗിക്കുന്നതെന്ന് അമേരിക്ക പറയുമ്പോള്‍ അമേരിക്കയുടെ കൈവശമുളള യുഎഫ്ഒകള്‍ സൂക്ഷിക്കുന്ന ഇടമാണെന്നാണ് കോണ്‍സ്പിറസി തിയറിസ്റ്റുകളുടെ വാദം. അന്യഗ്രഹ ജീവികളുടെ സാങ്കേതികവിദ്യകളെ കുറിച്ച് മനസിലാക്കാനുള്ള പഠനങ്ങളും ഇവിടെ രഹസ്യമായി നടക്കുന്നുണ്ടെന്നും വാദമുണ്ട്. എന്നാല്‍ കിലോമീറ്ററുകളോളം അതീവ സുരക്ഷാ നിയന്ത്രണത്തിലുളള ഇവിടേക്ക് അതിക്രമിച്ച് കടന്ന് ഏലിയന്‍സിനെ മോചിപ്പിക്കണമെന്നാണ് സോഷ്യല്‍ മീഡിയയില്‍ ഒരു വിഭാഗം ആളുകള്‍ പറയുന്നത്. സംഗതി വലിയ തമാശയാണെങ്കിലും യുഎസ് പെന്‍റഗണ്‍ ഒഫീഷ്യല്‍സ് തന്നെ പറക്കും തളികകളുടെ സാന്നിധ്യം ഇവിടെ സ്ഥിരീകരിച്ചിട്ടുണ്ടെന്ന നിലയ്ക്ക് അല്‍പ്പം കാര്യമുണ്ടെന്നും വേണം പറയാന്‍.

പറക്കും തളികകളേപ്പറ്റിയും ഏലിയന്‍ സാന്നിധ്യത്തെപ്പറ്റിയും കൗതുകമുളള ആളുകളാണ് ഏരിയ 51ലേക്ക് പോകാന്‍ സമ്മതമറിയിച്ചിരിക്കുന്നത്. തീവ്ര സുരക്ഷാ മേഖലയാണെങ്കിലും ലക്ഷക്കണക്കിനു വരുന്ന ആളുകളെ തടയാന്‍ അവര്‍ക്കാകില്ല എന്നാണ് ഇവന്‍റ് ഇന്‍വിറ്റേഷന്‍ പോസ്റ്റ് ചെയ്തവര്‍ പറയുന്നത്. കൂടാതെ സെപ്റ്റമ്പര്‍ 20 വരെയുളള സമയത്തിനിടയില്‍ കൂടുതല്‍ പേര്‍ ഐക്യദാര്‍ഢ്യവുമായി എത്താനുളള സാധ്യതയുമുണ്ട്. ഏതായാലും തമാശയ്ക്ക് ആരോ സോഷ്യല്‍ മീഡിയയില്‍ പോസ്റ്റ് ചെയ്ത കാര്യം യുഎസ് മിലിട്ടറിക്ക് ചില്ലറ തലവേദനയല്ല ഉണ്ടാക്കിയിരിക്കുന്നത്.

ഇതിനിടെ ഏരിയ 51നെ ട്രോളന്‍മാരും വെറുതെ വിട്ടില്ല. മലയാള സിനിമയിലെ ഫാന്‍റസി സങ്കല്‍പ്പങ്ങളെയും ഏലിയന്‍ ആശയങ്ങളെയെല്ലാം കൂട്ടിക്കുഴച്ച് ട്രോളുകളും പുറത്തിറങ്ങി. ഒരുകാലത്തെ മലയാള സിനിമയിലെ സാങ്കല്‍പ്പിക കഥാപാത്രങ്ങളുടെ സൃഷ്ടാവായിരുന്ന സംവിധായകന്‍ വിനയനേയും വിനയന്‍റെ അതിശയനെയുമെല്ലാം ട്രോളന്‍മാര്‍ ഏരിയ 51ല്‍ എത്തിച്ചു. എന്തായാലും ചുരുങ്ങിയ സമയത്തിനുളളിലാണ് ഏരിയ 51ഉം യുഎസ് മിലിട്ടറിലയും ലോകത്തുടനീളം സോഷ്യല്‍ മീഡിയയില്‍ ചര്‍ച്ചാവിഷയമായി മാറിയത്.