ഷവോമി റെഡ്മി എസ്2 ഉടൻ അവതരിക്കും; ടീസർ പുറത്ത്

ഷവോമി എസ് സീരീസ് ഉടൻ പുറത്തിറങ്ങുമെന്ന റിപ്പോർട്ടിന് പിന്നാലെ പുതിയ റെഡ്മി എസ്2 സ്മാർട്ട്ഫോണിന്‍റെ ടീസർ പുറത്തുവിട്ടിരിക്കുകയാണ് കമ്പനി. ഷവോമിയുടെ ഔദ്യോഗിക വീബോ ഹാൻഡലിലാണ് പുതിയ എസ് സീരീസിന്‍റെ ടീസർ പ്രത്യക്ഷപ്പെട്ടത്. എംഐ ലോഗോയ്ക്കൊപ്പം എസ് എന്ന അക്ഷരവും രേഖപ്പെടുത്തിയാണ് ടീസർ ഇറങ്ങിയിരിക്കുന്നത്.

സ്മാർട്ട്ഫോൺ രംഗത്ത് ഏറെക്കാലമായി ചർച്ചയായിരുന്ന ഷവോമിയുടെ ഈ മോഡൽ കഴിഞ്ഞ ദിവസം ചെക്ക് റിപ്പബ്ലിക്കിലെ മി സ്റ്റോറിൽ കണ്ടതായി റിപ്പോർട്ടുകളുണ്ടായിരുന്നു. ചിത്രങ്ങൾ വ്യക്തമാക്കുന്നതിന് അനുസരിച്ച് ഫോണിന്‍റെ മധ്യഭാഗത്തായി ഫിംഗർ പ്രിന്‍റ് സെൻസർ കാണാൻ സാധിക്കും. റോഡ് ഗോൾഡ് നിറത്തിലുള്ള മോഡലാണ് വെബ്സൈറ്റ് വഴി പുറത്തുവിട്ടിരിക്കുന്നത്. 5.99 ഇഞ്ച് ഡിസ്പ്ലെയുള്ള ഈ സ്മാർട്ട്ഫോൺ ആൻഡ്രോയിഡ് ഓറിയോയെ അടിസ്ഥാനപ്പെടുത്തിയാണ് പ്രവർത്തിക്കുന്നത്.

12MP, 5MP ഡ്യുവൽ റിയർ ക്യാമറകൾ സ്ഥാനംപിടിച്ചിട്ടുണ്ട്. 16 മെഗാപിക്സൽ ആണ് മുൻവശത്തെ ക്യാമറ. 3080mAh ബാറ്ററിയാണ് ഇതിലെ പവർ ഹൗസ്. 3ജിബി റാം, 32ജിബി സ്റ്റോറേജാണ് റെഡ്മി എസ്2 വാഗ്ദാനം ചെയ്യുന്നത്. ഈ മോഡലിന് 11,700 രൂപയായിരിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.