'റെഡ്മി 5എ' സ്മാർട്ട്ഫോണിന് ക്യാഷ്ബാക്കും 199 രൂപയുടെ ജിയോ ഓഫറും

'ദേശ് കി സ്മാർട്ട്ഫോൺ' എന്ന പേരിൽ കഴിഞ്ഞ ദിവസമായിരുന്നു ഷവോമിയുടെ പുതിയ ബജറ്റ് സ്മാർട്ട്ഫോൺ 'റെഡ്മി 5എ' വിപണിയിലെത്തിയത്. 2ജിബി, 3 ജിബി റാം വേരിയന്‍റുകളായി എത്തിയ റെഡ്മി 5എ സ്മാർട്ട്ഫോണിന് യഥാക്രമം 5,999 രൂപ, 6,999 രൂപ നിരക്കിലാണ് വില. റിലയൻസ് ജിയോയുമായി ചേർന്ന് ഈ ഫോണുകൾക്ക് 1000 രൂപയുടെ ഇളവ് ഏർപ്പെടുത്തിയിരിക്കുകയാണ് ഷവോമി.

കൂടാതെ റെഡ്മി 5എ വാങ്ങുന്ന എല്ലാ ഉപഭോക്താക്കൾക്കും ജിയോയുടെ ഈ ഓഫറും ലഭ്യമാക്കാവുന്നതാണ്. 199 രൂപയ്ക്ക് റീചാർജ് ചെയ്യുന്നവർക്ക് 28 ദിവസത്തേക്ക് അൺലിമിറ്റഡ് കോൾ, എസ്എംഎസ്, 1ജിബി ഡാറ്റയാണ് ജിയോ ഓഫർ ചെയ്തിരിക്കുന്നത്. മാത്രമല്ല ജിയോ ആപ്പിലെ സേവനങ്ങളും സൗജന്യമായി ലഭിക്കുന്നതായിരിക്കും.

ഇതുകൂടാതെ 199 രൂപയ്ക്ക് 12 മാസം തുടർച്ചയായി റീചാർജ് ചെയ്യുന്ന റെഡ്മി 5എ ഉപഭോക്താക്കൾക്ക് 1000 രൂപ ക്യാഷ്ബാക്കും ജിയോ ഓഫർ ചെയ്തിട്ടുണ്ട്. 100 രൂപയുടെ പത്ത് വൗച്ചറുകളായാണ് ക്യാഷ്ബാക്ക് ലഭ്യമാക്കാൻ കഴിയുക. മൈജിയോ ആപ്പിലേക്കായിരിക്കും തുക ക്രെഡിറ്റാവുക.