നാലാം പാദത്തില്‍ 9,435 കോടി ലാഭവുമായി റിലയന്‍സ്

മുംബൈ: മുകേഷ് അംബാനിയുടെ ഉടമസ്ഥതയിലുള്ള റിലയന്‍സ് ഇന്‍ഡസ്ട്രീസിന്‍റെ ലാഭത്തില്‍ 17.26 ശതമാനം വര്‍ധന. മാര്‍ച്ച്‌ 31ന് അവസാനിച്ച സാമ്പത്തിക വര്‍ഷത്തിന്‍റെ നാലാം പാദത്തില്‍ 9,435 കോടിയാണ് റിലയന്‍സിന്‍റെ ലാഭം. കഴിഞ്ഞ വര്‍ഷം ഇത് 8,046 കോടിയായിരുന്നു. റിലയന്‍സ് ജിയോയുടെ ലാഭം 510 കോടിയാണ്.

9,350 കോടി വരെയായിരുന്നു റിലയന്‍സിന്‍റെ ലാഭപ്രതീക്ഷ.എന്നാല്‍ പ്രതീക്ഷിച്ചതില്‍ കൂടുതല്‍ റിലയന്‍സ് ലാഭമുണ്ടാക്കുകയായിരുന്നു. വില്‍പനയില്‍ 29.34 ശതമാനം വര്‍ധനയുണ്ടായതാണ് റിലയന്‍സിന് അനുകൂലമായത്. 1.2 ലക്ഷം കോടി രൂപയുടെ വില്‍പനയാണ് റിലയന്‍സിന് ഉണ്ടായത്. പെട്രോകെമിക്കല്‍സ് ബിസിനസില്‍ നേട്ടമുണ്ടാക്കാന്‍ കഴിഞ്ഞതും കമ്പനിക്ക് ഗുണമായി.

മൂന്നാം പാദവുമായി താരത്മ്യം ചെയ്യുമ്പോള്‍ ജിയയോയുടെ ലാഭത്തില്‍ ആറ് കോടിയാണ് വര്‍ധന. മൂന്നാം പാദത്തില്‍ ജിയോയുടെ ലാഭം 504 കോടിയായിരുന്നു. ജിയോയുടെ വരുമാനം 6,879 കോടിയില്‍ നിന്ന് 7,128 കോടിയായി വര്‍ധിച്ചിട്ടുണ്ട്.