Samsung Galaxy Fold: ഇനി ഫോൺ ബുക്ക് പോലെ മടക്കാം തുറക്കാം പക്ഷേ വില കയ്യിലൊതുങ്ങില്ല

ടെക് ലോകം ഏറെ പ്രതീക്ഷയോടെ കാത്തിരുന്ന സാംസങ്ങിന്‍റെ ഫോള്‍ഡബിള്‍ സ്‌ക്രീന്‍ സ്മാര്‍ട്‌ഫോണ്‍ സാംസങ് ഗാലക്സി ഫോൾഡ് (Samsung Galaxy Fold) ഇന്ത്യയിലെത്തി. 1,64,999 രൂപ വിലയുള്ള ഫോണിന്റെ പരിമിതമായ യൂണിറ്റുകളെ ഇപ്പോൾ രാജ്യത്ത് ലഭിക്കുള്ളൂ.

മടങ്ങിയിരിക്കുമ്പോള്‍ 4.6-ഇഞ്ച് വലുപ്പവും തുറക്കുമ്പോള്‍ 7.3-ഇഞ്ച് വലുപ്പത്തിലുള്ള ടാബ്‌ലെറ്റായി വിടരാൻ കഴിയുന്ന ഫോണിന്റെ പ്രധാന സ്ക്രീൻ മടക്കി വെച്ചിരിക്കുമ്പോഴും മറ്റൊരു സ്ക്രീൻ യൂസർക്ക് ഉപയോഗിക്കാം. ഗാലക്സി ഫോൾഡ് ഒക്ടോബർ 4 മുതലാണ് ഇന്ത്യയിൽ വാങ്ങാൻ കഴിയുക. ഒക്ടോബർ 20 മുതൽ ഡെലിവറി ആരംഭിക്കും.

ഗാലക്സി ബഡ് ഇയർഫോണുകളും ഗാലക്സി ഫോൾഡ് ഫോണിനൊപ്പം ലഭിക്കും. ഇതുവരെ ഉപയോക്താക്കൾ അനുഭവിക്കാത്ത 24x7 പ്രീമിയം കസ്റ്റമർ കെയർ സൗകര്യമാണ് സാംസങ് ഗാലക്സി ഫോൾഡ് ഉപയോക്താക്കൾക്ക് ഒരുക്കിയിട്ടുള്ളതെന്ന് കമ്പനി അറിയിച്ചു. ഒരു വർഷത്തേക്കുള്ള ആക്സിഡന്റ് ഡാമേജ് സുരക്ഷയും വൺ ടൈം സ്ക്രീൻ റീപ്ലേസ്‌മെന്റ് സൗകര്യവും സാംസങ് നൽകുന്നുണ്ട്.

മടക്കി വെക്കുമ്പോൾ സാധാരണ ഹാൻഡ്‌സെറ്റുകൾ പോലെ തോന്നിപ്പിക്കുന്ന ഗാലക്സി ഫോൾഡിനുള്ളത് അമോലെഡ് പാനലാണ്. Exynos 9825 പ്രോസസറാണ് ഫോണിന് ശക്തി നൽകുന്നത്, 12 ജിബി റാമും, 512 ജിബി സ്റ്റോറേജുമുള്ള ഫോൺ രണ്ട് സിം കാർഡുകൾ സപ്പോർട് ചെയ്യും. ഫോണിൽ ആകെ ആറ് ക്യാമറകളാണുള്ളത്.

16-മെഗാപിക്സൽ അൾട്രാ വൈഡ് ക്യാമറ, 12-മെഗാപിക്സൽ റഗുലർ ക്യാമറ, 12-മെഗാപിക്സൽ ടെലിഫോട്ടോ അഥവാ സൂം ക്യാമറ എന്നീ ക്യാമറകളാണ് പിൻഭാഗത്തുള്ളത്. ഫോൺ തുറക്കുമ്പോൾ രണ്ട് മുൻ ക്യാമറകളും കാണാം. 10 -മെഗാപിക്സൽ സെൽഫി ക്യാമറയും 8 - മെഗാപിക്സൽ ഡെപ്ത് സെൻസിംഗ് ക്യാമെറയുമാണ് മുന്ഭാഗത്തുള്ളത്. ഇതിനുപുറമെ ഫോൺ മടക്കിവെക്കുമ്പോൾ മറ്റൊരു ക്യാമറ കൂടിയുണ്ട്. 4.5 ഇഞ്ച് സ്‌ക്രീനിലായുള്ള ഈ ക്യാമറയ്ക്ക് 10 മെഗാപിക്സൽ സെൻസറാണുള്ളത്.

Asus ROG Phone-2: ഗെയിം സ്മാർട്ഫോണിന്റെ വിലയും സവിശേഷതകളും

സാംസങിന്റെ ആൻഡ്രോയ്ഡ് 9 ആൽബിറ്റിൽ പ്രവർത്തിക്കുന്ന ഗാലക്സി ഫോൾഡിനകത്ത് രണ്ട് ബാറ്ററികളുണ്ട്. ബാറ്ററികളുടെ ആകെ കപ്പാസിറ്റി 4380 mAh ആണ്. 4G LTE, വൈഫൈ 6, ബ്ലൂടൂത്ത് v5.0, ജിപിഎസ്/ A-ജിപിഎസ്, എൻഎഫ്‍സി USB ടൈപ്-C പോർട്ട് എന്നീ കണക്ടിവിറ്റി സൗകര്യങ്ങളും ഫോണിലുണ്ട്.

ഈ വർഷം ഫെബ്രുവരിയിൽ എസ്10 അവതരിപ്പിച്ച വേദിയിലാണ് സാംസങ് ഗ്യാലക്‌സി ഫോള്‍ഡ് ആദ്യം പ്രദര്‍ശിപ്പിച്ചത്. ഗ്യാലക്‌സി സീരിസിന്റെ പത്താം വാര്‍ഷികത്തില്‍ സാന്‍ ഫ്രാന്‍സിസ്‌കോയിലെ ബില്‍ ഗ്രഹാം ഓഡിറ്റോറിയത്തില്‍ നടന്ന ചടങ്ങിലായിരുന്നു പുതിയ ഫോണിനെ പരിചയപ്പെടുത്തിയത്.

ഏപ്രിലിൽ ഫോൺ ഉപയോക്താക്കളുടെ കയ്യിലെത്തിക്കുമെന്ന് സാംസങ് പറഞ്ഞെങ്കിലും ഫോൺ റിവ്യൂ ചെയ്യാൻ നൽകിയപ്പോഴാണ് ഫോണിന്‍റെ സ്ക്രീന്‍ പ്രശ്നം ഉയര്‍ന്ന് വന്നത്. ഡിസ്‌പ്ലേയിലും ഹിഞ്ജിലും ചില കുറവുകൾ റിവ്യൂവേഴ്സ് ചൂണ്ടിക്കാണിച്ച ശേഷം സാംസങ് ഫോൺ തിരിച്ചു വിളിക്കുകയായിരുന്നു. കമ്പനിയുടെ ആദ്യത്തെ ഫോള്‍ഡബിള്‍ ഫോണ്‍, ടെസ്റ്റ് ലോഞ്ചില്‍ പ്രശ്‌നങ്ങള്‍ കാണിച്ചത് സൗത്ത് കൊറിയൻ കമ്പനിയായ സാംസങ്ങിന് വിപണിയിൽ കനത്ത തിരിച്ചടിയായിരുന്നു.

സാംസങ് ഗ്യാലക്‌സി എം30എസ്: ഒറ്റനോട്ടത്തിൽ

ടെക് ലോകത്ത് സംഭവം വലിയ ചർച്ചയായി മാറി. സ്‌ക്രീനുകളെ ബന്ധിപ്പിക്കുന്ന ഭാഗം ചുരുങ്ങിയ ദിവസത്തെ ഉപയോഗം കൊണ്ടുതന്നെ പൊട്ടുന്നതായും റിപ്പോർട്ടുകൾ വന്നിരുന്നു. ഇപ്പോൾ ഇൻ ഹൗസ് ട്രീറ്റ്മെന്റിലൂടെ ഹാൻഡ്‌സെറ്റിന്റെ പ്രശ്നങ്ങൾ പൂർണമായും പരിഹരിച്ചതിനു ശേഷമാണു സാംസങ് ഗാലക്സി ഫോൾഡ് വിപണിയിലെത്തിക്കുന്നത്. സാംസങ് ഗാലക്സി ഫോൾഡിന്റെ ഔദ്യോഗിക ലോഞ്ചിംഗ് കഴിഞ്ഞ ആഴ്ചയാണ് അമേരിക്കയില്‍ നടന്നത്.

സാംസങ് ഇഷോപ്പിലൂടെയും 35 സിറ്റികളിലുള്ള 315 സാംസങ് ഔട്ലെറ്റുകളിലൂടെയും പുതിയ ഫോൺ വാങ്ങാനാകും. സാംസങിന്റെ ബെംഗളുരുവിലുള്ള ഒപേറാ ഹൗസിലും സാംസങ് ഗാലക്സി ഫോൾഡ് ലഭ്യമാണ്.