ഭൂമിയ്ക്കു സമാനമായ മറ്റൊരു ഗ്രഹം കൂടി; അതും ഭൂമിയ്ക്ക് തൊട്ടടുത്ത്

ഭൂമിയ്ക്കു സമാനമായി ജീവനുണ്ടാകാൻ സാധ്യതയുള്ള മറ്റൊരു ഗ്രഹം കൂടി കണ്ടെത്തുന്നത് ഇതാദ്യമല്ല. ഭൂമിയിൽ നിന്നും 40 പ്രകാശവര്‍ഷം അകലെ ട്രാപ്പിസ്റ്റ് - 1 എന്ന ചുവന്ന ഗ്രഹത്തിനെ വലംവയ്ക്കുന്ന ഏതാണ്ട് ഭൂമിയുടെ വലുപ്പമുള്ള ഏഴു ഗ്രഹങ്ങള്‍ ശാസ്ത്രജ്ഞര്‍ അടുത്തിടെ കണ്ടെത്തിയിരുന്നു. എന്നാൽ ഇപ്പോള്‍ കണ്ടെത്തിയിരിക്കുന്ന പുതിയ ഗ്രഹം വലം വയ്ക്കുന്നത് ഭൂമിയിൽ നിന്നു പതിനൊന്നു പ്രകാശവര്‍ഷം മാത്രം അകലെയുള്ള റോസ് - 128 എന്ന നക്ഷത്രത്തെയാണ്.

ബഹളക്കാരനല്ലാത്ത ശാന്തമായൊരു ഗ്രഹമാണ് റോസ് 128 എന്നാണ് ശാസ്ത്രജ്ഞരുടെ നിഗമനം. ദ്രാവകരൂപത്തിൽ ജലം കാണപ്പെടാൻ സാധ്യതയുള്ള ഗ്രഹത്തിൽ ജീവനുണ്ടാകാനുള്ള സാധ്യതകളെയും ശാസ്ത്രലോകം ഏറെ പ്രതീക്ഷയോടെയാണ് ഉറ്റുനോക്കുന്നത്. ആസ്ട്രണമി ആന്‍റ് ആസ്ട്രോഫിസിക്സ് ജേണലിലാണ് പുതിയ ഗ്രഹത്തെപ്പറ്റിയുള്ള വിവരങ്ങളും ഇടം പിടിച്ചിരിക്കുന്നത്.

പുതിയ ഗ്രഹത്തിൽ ജീവനുണ്ടാകാനുള്ള എല്ലാ സാധ്യതകളുമുണ്ടെന്നും എന്നാൽ അത് ഉറപ്പിക്കാറായിട്ടില്ലെന്നും ബഹിരാകാശശാസ്ത്രജ്ഞനും ലേഖകനുമായ വില്യം സി ഡാഞ്ചി പറയുന്നു.

ഭൂമിയെക്കാളും 35 ശതമാനം അധികം വലുപ്പമുള്ളതാണ് പുതിയ ഗ്രഹമെന്നാണ് അനുമാനം. സൂര്യനും ഭൂമിയും തമ്മിലുള്ള അകലത്തെക്കാള്‍ വളരെക്കുറവാണ് റോസ് 128 നക്ഷത്രവും പുതിയ ഗ്രഹവും തമ്മിലുളള ദൂരം. 4.5 മില്യണ്‍ മൈൽ മാത്രമാണ് ഇവ തമ്മിലുള്ള അകലം. സൂര്യനോട് ഏറ്റവും ചേര്‍ന്ന് ഭ്രമണം ചെയ്യുന്ന ബുധനിലേയ്ക്കു പോലും സൂര്യനിൽ നിന്നും ശരാശരി 36 മില്യണ്‍ അകലമുണ്ട്.

സൂര്യനിൽ നിന്ന് എട്ടുമിനിട്ടെടുത്ത് ഭൂമിയിലെത്തുന്ന പ്രകാശം ഒരു വര്‍ഷ കൊണ്ട് സഞ്ചരിക്കുന്ന ദൂരമാണ് ഒരു പ്രകാശവര്‍ഷം. എന്നാൽ റോസ് 128 നക്ഷത്രത്തിലേയ്ക്ക് പതിനൊന്നു പ്രകാശവര്‍ഷം അകലമുണ്ടെങ്കിലും സൂര്യന്‍റെ ഏറ്റവും അടുത്ത് സ്ഥിതി ചെയ്യുന്ന നക്ഷത്രങ്ങളിലൊന്നിൽ ജീവനു സാധ്യതയുള്ള ഗ്രഹം കണ്ടെത്തിയത് ചെറിയ നേട്ടമല്ല.