യുഎഇയിൽ സ്‌കൈപ്പ് സേവനങ്ങൾ നിരോധിച്ചു

അബുദാബി: യുഎഇയില്‍ സ്‌കൈപ്പ് ഉപയോഗിക്കുന്നത് നിരോധിച്ചു. ടെലികോം കമ്പനികളായ ഇത്തിസലാത്തും ഡുവുമാണ് സ്‌കൈപ്പ് നിരോധിച്ചത് ഔദ്യോഗികമായി അറിയിച്ചത്. പ്രവാസികളെ ഏറെ ആശങ്കയിലാഴ്ത്തുന്നതാണ് ഈ നടപടി.

അംഗീകൃതമല്ലാത്ത വോയ്‍പ് (വോയ്‌സ് ഓവര്‍ ഇന്‍റര്‍നെറ്റ് പ്രോട്ടോക്കോള്‍ സര്‍വീസ്) സേവനങ്ങള്‍ നല്‍കുന്നതിനാലാണ് സ്‌കൈപ്പ് യു.എ.ഇ.യില്‍ നിരോധിച്ചത്. സ്‌കൈപ്പ് കോള്‍ സേവനം ലഭിക്കുന്നില്ലെന്ന് സാമൂഹ്യമാധ്യമങ്ങളിലൂടെ ഉപഭോക്താക്കള്‍ പരാതിപ്പെട്ടതിനെ തുടര്‍ന്നാണ് ടെലികോം കമ്പനികള്‍ നയം വ്യക്തമാക്കിയത്. ഇത്തിസലാത്തിനും ഡുവിനും വോയ്പ് സേവനങ്ങള്‍ ലഭ്യമാക്കുന്ന പ്രത്യേകം ആപ്ലിക്കേഷനുകളുണ്ട്. പ്രതിമാസം നിശ്ചിതതുക നല്‍കി ഈ ആപ്പുകള്‍ വഴി സേവനങ്ങള്‍ ലഭ്യമാക്കാമെന്നും കമ്പനികള്‍ വ്യക്തമാക്കി.