വൺപ്ലസ് 5ടി 'സ്റ്റാർവാർസ് ലിമിറ്റഡ് എഡിഷൻ' ഉടൻ ഇന്ത്യയിൽ

വൺപ്ലസ് 5ടിക്ക് പ്രത്യേക പതിപ്പ് എത്തുന്നു. 'സ്റ്റാർവാർസ് ലിമിറ്റഡ് എഡിഷൻ' എന്ന പേരിലാണ് ഈ പ്രത്യേക പതിപ്പിനെ വൺപ്ലസ് അവതരിപ്പിക്കുന്നത്. 'സ്റ്റാർവാർസ് ദി ലാസ്റ്റ് ജേഡി' എന്ന ഹോളിവുഡ് ചിത്രത്തിന്‍റെ റിലീസിനോടനുബന്ധിച്ചാണ് ഈ സ്പെഷ്യൽ പതിപ്പിനെ അവതരിപ്പിക്കുന്നത്.

ബെംഗലൂരുവിൽ നടന്ന കോമിക് കോൺ പരിപാടിയിലാണ് ഫോണിന്‍റെ പോസ്റ്റർ പുറത്തിറക്കിയത്. നിലവിൽ ലഭ്യമായിട്ടുള്ള വൺപ്ലസ് 5ടി ഫോണുകളിൽ നിന്നും തികച്ചും വ്യത്യസ്തമായിരിക്കും ഈ സ്പെഷ്യൽ എഡിഷൻ. സ്റ്റാർവാർസ് ലോഗോയുള്ള വൈറ്റ് ബാക്ക് കവറാണ് ഈ സ്പെഷ്യൽ പതിപ്പിനുള്ളത്. ബ്ലാക്ക് നിറമാണ് മുൻഭാഗത്തിനുള്ളത്. സ്ലൈഡർ ബട്ടൺ ചുവന്ന നിറത്തിലും നൽകിയിട്ടുണ്ട്. പിൻവശത്ത് ഫിംഗർ പ്രിൻഡ് സ്കാനറിന് താഴെയായിട്ടാണ് വൺപ്ലസ് ലോഗോയുടെ സ്ഥാനം.

സ്റ്റാർവാർസ് തീമുകൾ, റിങ് ടോണുകൾ, ഇഫക്ടുകൾ എന്നിവ ഈ ഫോണിൽ ലഭ്യമാക്കിയിട്ടുണ്ട്. ഈ സ്മാർട്ട്ഫോണിന്‍റെ അവതരണം എന്നാണെന്ന് കമ്പനി വ്യക്തമാക്കിയിട്ടില്ല. ഏതാണ്ട് 15000ത്തോളം ഫോണുകളാണ് ഈ വിഭാഗത്തിൽ വൺപ്ലസ് പുറത്തിറക്കുക. ഇന്ത്യയിലേക്കുള്ള എക്സ്ക്ലൂസീവ് ലിമിറ്റഡ് എഡിഷനായിരിക്കാം ഈ ഫോണെന്നാണ് റിപ്പോർട്ടുകൾ സൂചിപ്പിക്കുന്നത്.