വാട്സ്ആപ്പിൽ പുതിയ ഫീച്ചർ
കോൺടാക്റ്റ് സെക്ഷനിലേക്ക് പോകാതെ തന്നെ വാട്സ്ആപ്പ് ആപ്പിനുള്ളിൽ വച്ച് കോൺടാക്റ്റുകൾ സേവ് ചെയ്യാനും നിലവിലുള്ള കോൺടാക്റ്റുകൾ എഡിറ്റ് ചെയ്യാനും ഉപയോക്താക്കളെ സഹായിക്കുന്ന രീതിയിലുള്ള പുതിയ ഫീച്ചർ വൈകാതെ ലഭ്യമാകും. സേവ് ചെയ്യാത്ത നമ്പരുകളിൽ നിന്ന് മെസേജ് വന്നാൽ ഈ നമ്പരുകൾ എളുപ്പത്തിൽ സേവ് ചെയ്യുന്നതിന് സഹായിക്കുന്ന ഫീച്ചറാണ് വരാൻ പോകുന്നത്. നിലവിൽ നിങ്ങൾ ഇത്തരത്തിൽ സേവ് ഓപ്ഷൻ കൊടുത്താൽ കോൺടാറ്റ്സ് ആപ്പ് ഓപ്പൺ ആയി അവിടെ വച്ചാണ് സേവിങ് നടക്കുന്നത്.
Read More: 181 രൂപയ്ക്ക് 30 ദിവസം വാലിഡിറ്റിയുള്ള പുതിയ പ്രീപെയ്ഡ് പ്ലാനുമായി വോഡാഫോൺ ഐഡിയ
ബീറ്റ ടെസ്റ്റിങ്
വാട്സ്ആപ്പിന്റെ പ്രവർത്തനങ്ങൾ ട്രാക്ക് ചെയ്യുന്ന വെബ്‌സൈറ്റായ വാബെറ്റഇൻഫോ പുറത്ത് വിട്ട റിപ്പോർട്ട് അനുസരിച്ച് പുതിയ ഫീച്ചർ നിലവിൽ ആൻഡ്രോയിഡ് ബീറ്റ ടെസ്റ്റർമാർക്ക് ലഭ്യമാക്കിയിട്ടുണ്ട്. ആൻഡ്രോയിഡ് ഉപയോക്താക്കൾക്കായി വാട്സ്ആപ്പ് നടത്തുന്ന ബീറ്റ പ്രോഗ്രാമിൽ രജിസ്റ്റർ ചെയ്തിട്ടുള്ള ആളുകൾക്ക് പുതിയ അപ്ഡേറ്റിലെ ഫീച്ചറുകൾ ഔദ്യോഗികമായി പുറത്തിറങ്ങുന്നതിന് മുമ്പ് പരീക്ഷിക്കാൻ ലഭിക്കുന്ന സംവിധാനമണ് ഇത്. പുതിയ ഫീച്ചർ ആക്‌സസ് ചെയ്യാൻ ആഗ്രഹിക്കുന്ന ഉപയോക്താക്കൾക്ക് വാട്സ്ആപ്പ് ബീറ്റയിൽ രജിസ്റ്റർ ചെയ്ത് ആപ്പ് അപ്ഡേറ്റ് നേടാം.
കോൺടാക്റ്റ് സേവ് ചെയ്യാൻ എളുപ്പം
പുതിയ ഫീച്ചർ ഉപയോക്താക്കൾക്ക് ആപ്പ് ഉപേക്ഷിക്കാതെ തന്നെ കോൺടാക്റ്റുകൾ എഡിറ്റ് ചെയ്യാനും സേവ് ചെയ്യാനും സഹായിക്കുന്നതാണ് എന്ന് റിപ്പോർട്ടുകൾ സൂചിപ്പിക്കുന്നു. വാട്സ്ആപ്പിൽ നിന്നുള്ള കോൺടാക്റ്റുകൾ സേവ് ചെയ്യാൻ ഉപയോക്താക്കളെ സഹായിക്കുന്ന ഒരു ഫീച്ചർ നിലവിലുണ്ടെങ്കിലും പുതിയ ഫീച്ചർ ഈ പ്രക്രിയ വളരെ ലളിതമാക്കും. ഉപയോക്താക്കൾക്ക് ആപ്പിൽ നിന്ന് നേരിട്ട് പുതിയ കോൺടാക്റ്റുകൾ സേവ് ചെയ്യാനും എഡിറ്റ് ചെയ്യാനും ഇതിലൂടെ സാധിക്കും.
Read More: 10,999 രൂപയ്ക്ക് സൂപ്പർവൂക്ക് ഫാസ്റ്റ് ചാർജിങ് സപ്പോർട്ടുമായി റിയൽമി നാർസോ എൻ55 ഇന്ത്യയിലെത്തി
ന്യൂ കോൺടാക്റ്റ് ഓപ്ഷൻ
വാട്സ്ആപ്പിൽ വരുന്ന പുതിയ ഫീച്ചറിലൂടെ സേവ് ചെയ്യുന്ന പുതിയ കോൺടാക്റ്റ് അവരുടെ ഫോണിലേക്കാണോ ഗൂഗിൾ അക്കൗണ്ടിലേക്കാണോ സേവ് ചെയ്യേണ്ടത് എന്ന് തിരഞ്ഞെടുക്കാനുള്ള ഓപ്ഷനും ഉണ്ടായിരിക്കുമെന്ന് പ്രതീക്ഷിക്കുന്നു. "ന്യൂ കോൺടാക്റ്റ്" എന്ന ഓപ്‌ഷനിലൂടെയാണ് കോൺടാക്റ്റുകൾ സേവ് ചെയ്യാൻ സാധിക്കുന്നതെന്ന് റിപ്പോർട്ടിൽ പറയുന്നു. എല്ലാ ഉപഭോക്താക്കൾക്കുമായി ഈ ഫീച്ചർ വൈകാതെ ലഭ്യമാകുമെന്ന് പ്രതീക്ഷിക്കുന്നു, ഐഒഎസ് ബീറ്റ ടെസ്റ്റിങ് ആരംഭിക്കാത്തതിനാൽ ആപ്പിൾ ഫോണുകളിൽ ഇത് വൈകിയായിരിക്കും വരുന്നത്.
വാട്സ്ആപ്പ് യുഐ മാറുന്നു
വാട്സ്ആപ്പിന്റെ യൂസർ ഇന്റർഫേസ് വലിയ തോതിൽ മാറാൻ പോകുന്നുവെന്ന റിപ്പോർട്ടുകൾ കുറച്ച് ദിവസങ്ങൾക്ക് മുമ്പ് പുറത്ത് വന്നിരുന്നു. ആപ്പിലെ ചാറ്റുകൾ, കോളുകൾ, കമ്മ്യൂണിറ്റീസ്, സ്റ്റാറ്റസ് തുടങ്ങിയ ടാബുകളുടെ സ്ഥാനം തന്നെ മാറുമെന്ന് സൂചനകളുണ്ട്. ഈ ടാബുകൾക്ക് പുതിയ വിഷ്വൽ അപ്പിയറൻസും ലഭിക്കും. ഇവയെല്ലാം നിലവിൽ മുകൾ ഭാഗത്താണുള്ളത്. വൈകാതെ ആപ്പിന്റെ താഴത്തെ ഭാഗത്തേക്ക് ഈ ടാബുകൾ മാറും. ഇത് ഒരു കൈയ്യിൽ വലിയ സ്ക്രീനുള്ള ഫോൺ ഉപയോഗിക്കുന്നവർക്കും സഹായകരമാകും.
Read More: ഏറ്റവും വില കുറഞ്ഞ മടക്കാവുന്ന ഫോൺ; ടെക്നോ ഫാന്റം വി ഫോൾഡ് ഇന്ത്യയിലെത്തി