വ്യാജവാർത്തകളാണ് കൊറോണക്കാലത്ത് ഇന്റർനെറ്റിലൂടെ ഏറെയും പ്രചരിക്കുന്നത്. ആളുകൾ പുറത്തിറങ്ങാത്തതുകൊണ്ടുതന്നെ കൂടുതൽ പേരും വാട്സാപ്പ്, ഫേസ്ബുക്ക് തുടങ്ങിയ സോഷ്യൽ മീഡിയ പ്ലാറ്റ്ഫോമുകളിലൂടെയുള്ള വ്യാജസന്ദേശങ്ങൾ വിശ്വസിക്കാൻ നിർബന്ധിതരായിരിക്കുകയാണ്. പല ആരോഗ്യ സംഘടനകളുടെയും പേരിലാണ് ഇത്തരത്തിൽ വ്യാജവാർത്തകൾ പടച്ചുവിടുന്നതും. ഇത്തരം ഒരു സാഹചര്യത്തിൽ വാട്സാപ്പിലൂടെ എത്തുന്ന പല വാർത്തകളും സന്ദേശങ്ങളും സത്യമാണോ എന്ന് പരിശോധിക്കാൻ പുതിയ സംവിധാനം അവതരിപ്പിക്കാൻ ഒരുങ്ങുകയാണ് ഇൻസ്റ്റന്റ് മെസേജിങ് പ്ലാറ്റ്ഫോമായ വാട്സാപ്പ്.
ഫോർവേഡ് മെസേജുകളുടെ യാഥാർഥ്യം കണ്ടുപിടിക്കാൻ ഗൂഗിൾ സെർച്ച് ഉപയോഗിക്കാനുള്ള എളുപ്പവഴിയാണ് വാട്സാപ്പിന്റെ പുതിയ അപ്ഡേറ്റിലുള്ളത് എന്നാണ് സൂചന. ഫോർവേഡ് മെസേജുകളുടെ വലത് വശത്തായി കാണുന്ന സെർച്ച് ഐക്കൺ ആണ് പുതിയതായി കമ്പനി അവതരിപ്പിച്ചരിക്കുന്നത്. ഈ ഐക്കൺ ടാപ്പ് ചെയ്താൽ ഈ മെസേജ് നിങ്ങൾക്ക് ഗൂഗിളിൽ അപ്ലോഡ് ചെയ്യണോ എന്ന് വാട്സാപ്പ് ചോദിക്കും, ക്യാൻസൽ, സെർച്ച് വെബ് എന്നിങ്ങനെ രണ്ട് ഓപ്ഷനുകളാണുള്ളത്. ഇതിൽ നിന്നും സെർച്ച് വെബ് എന്ന ഓപ്ഷൻ തിരഞ്ഞെടുത്താൽ ആ സെലക്ട് ചെയ്ത മെസേജ് ഗൂഗിളിൽ സെർച്ച് ചെയ്യുകയും അതുമായി ബന്ധപ്പെട്ട സെർച്ച് റിസൾട്ടുകൾ കാണാവുകയും ചെയ്യും.
കൊറോണയെക്കുറിച്ച് വിവരങ്ങൾ അറിയാം വാട്സാപ്പിലൂടെ
ഈ ഫീച്ചർ വാട്സാപ്പ് ഇപ്പോഴും വികസിപ്പിച്ചുകൊണ്ടിരിക്കുകയാണ് എന്നാണ് വാട്സാപ്പിലെ ഏറ്റവും പുതിയ അപ്ഡേറ്റുകളെക്കുറിച്ചുള്ള റിപ്പോർട്ടുകൾ പുറത്തുവിടുന്ന വാബീറ്റാഇൻഫോ പറയുന്നത്. വാട്സാപ്പ് ആദ്യം ആൻഡ്രോയിഡ് ഉപയോക്താക്കൾക്കായി ഈ സവിശേഷത പുറത്തിറക്കും, തുടർന്നാണ് ഇത് ഐഒഎസ് ഉപയോക്താക്കൾക്ക് ലഭ്യമാവുക.
പഴയ ഫോൺ വാങ്ങുന്നുണ്ടോ? ഇതാ പോലീസിന്റെ മുന്നറിയിപ്പ്
നേരത്തെ കൊറോണ വൈറസിനെ സംബന്ധിച്ചുള്ള സംശയങ്ങൾക്ക് ഉത്തരം കണ്ടെത്താൽ ലോകാരോഗ്യസംഘടനയുമായി സഹകരിച്ച് ഒരു ചാറ്റ്ബോട്ട് വാട്സാപ്പ് അവതരിപ്പിച്ചിരുന്നു. +41798931892 എന്ന നമ്പർ ആണ് ചാറ്റ്ബോട്ടായി പ്രവർത്തിക്കുന്നത്. ഈ നമ്പർ ഫോണിൽ സേവ് ചെയ്ത് ഇതിലേക്ക് വാട്സാപ്പിലൂടെ സംശയങ്ങൾ മെസേജുകളായി അയയ്ക്കാനാവും. ഇതിനുപുറമെ വൈറസുമായി ബന്ധപ്പെട്ട വിവരങ്ങള് നല്കുന്നതിന് വാട്സാപ്പ് കൊറോണ വൈറസ് ഇന്ഫര്മേഷന് ഹബ് ആരംഭിച്ചിരുന്നു. WHO, യുനിസെഫ്, യുനൈറ്റഡ് നേഷന്സ് ഡെവലപ്പ്മെന്റ് പ്രോഗ്രാം എന്നിവയുമായി സഹകരിച്ചാണ് കോറോണ വൈറസ് ഇന്ഫര്മേഷന് ഹബ് ആരംഭിച്ചത്.