സ്ട്രാറ്റോലോഞ്ചിന്‍റെ പരീക്ഷണ പറക്കൽ വിജയകരം

ലോകത്തിലെ ഏറ്റവും വലിയ വിമാനമെന്ന് വിശേഷിപ്പിക്കാവുന്ന സ്ട്രാറ്റോലോഞ്ചിന്‍റെ കന്നിയാത്ര വിജയകരമായി പൂർത്തീകരിച്ചു. കാലിഫോര്‍ണിയയിലെ മൊജാവേ എയര്‍ ആന്‍റ് സ്‌പേസ് പോര്‍ട്ടില്‍ വെച്ചാണ് സ്ട്രാറ്റോലോഞ്ചിന്‍റെ പരീക്ഷണ പറക്കൽ നടത്തിയത്. കുറഞ്ഞ ചെലവിലും അതിവേഗത്തിലും ബഹിരാകാശ യാത്രകള്‍ സാധ്യമാക്കുക എന്ന ലക്ഷ്യമാണ് സ്ട്രാറ്റോലോഞ്ച് നിറവേറുന്നത്. നിലവിൽ ഉപഗ്രഹങ്ങളെ വഹിക്കുന്ന റോക്കറ്റുകളെ ഭൂമിയില്‍ നിന്നും വിക്ഷേപിക്കുന്നതിന് വലിയ തോതില്‍ ഇന്ധനവും ചിലവും ആവശ്യമാണ്.



ആകാശമധ്യത്തില്‍ നിന്ന് റോക്കറ്റുകളെ വിക്ഷേപിക്കുകയെന്ന ദൗത്യമാണ് സ്ട്രാറ്റോലോഞ്ചിനുള്ളത്. ഭൂമിക്ക് മുകളിലെ രണ്ടാമത്തെ അന്തരീക്ഷ പാളിയായ സ്ട്രാറ്റോസ്ഫിയറിലേക്കാണ് സ്ട്രാറ്റോലോഞ്ച് റോക്കറ്റുകളെ എത്തിക്കുക. ഒരു ഫുട്‌ബോള്‍ മൈതാനത്തേക്കാൾ വലിപ്പമാണ് ഈ ഭീമൻ വിമാനത്തിനുള്ളത്. നാലായിരം കിലോഗ്രാം ഭാരമുള്ള ആറ് എൻജിനുകളാണ് ഈ വിമാനത്തിന് കരുത്ത് പകരുന്നത്. വിമാനത്തെ ചലിപ്പിക്കുന്നതിനായി 28 ചക്രങ്ങളാണുള്ളത്.



ചിറകുവിരിച്ചു നില്‍ക്കുന്ന സ്ട്രാറ്റോലോഞ്ചിന് 385 അടി വലിപ്പമുണ്ടാകും. രണ്ട് കൂറ്റന്‍ വിമാനങ്ങള്‍ ചേര്‍ത്തുവെച്ചതു പോലുള്ള രൂപമാണ് സ്ട്രാറ്റോലോഞ്ചിനുള്ളത്. 24 മണിക്കൂറുകൊണ്ട് ബഹിരാകാശ റോക്കറ്റുകളും പേടകങ്ങളും വിക്ഷേപണം നടത്തി തിരിച്ചെത്താന്‍ കഴിയുമെന്നാണ് നിർമ്മാതാക്കൾ അവകാശപ്പെടുന്നത്. മൈക്രോസോഫ്റ്റ് സഹസ്ഥാപകനായ പോള്‍ അലന്‍റെതാണ് ഭീമൻ വിമാനമെന്ന ഈ ആശയം. 300 ദശലക്ഷം ഡോളറാണ് നിർമ്മാണ ചിലവ്.




പരീക്ഷണ പറക്കലിന് മുമ്പേ സ്ട്രാറ്റോലോഞ്ചിന് ആദ്യത്തെ ഉപഭോക്താവിനെ ലഭിച്ചതും ശ്രദ്ധേയമായൊരു കാര്യമാണ്. വ്യോമയാന- പ്രതിരോധ മേഖലയിലെ കമ്പനിയായ ഓര്‍ബിറ്റല്‍ എടികെയാണ് കരാറിൽ ഒപ്പുവച്ചിരിക്കുന്നത്. പ്രതീകൂല കാലാവസ്ഥയിലും വിക്ഷേപണം നടത്താൻ സ്ട്രാറ്റോലോഞ്ചിന് സാധിക്കുമെന്നുള്ളതാണ് ഏറ്റവും വലിയ സവിശേഷത.