സ്മാർട്ട് ചവറ്റു കുട്ടയുമായി ഷവോമി

കുറഞ്ഞ നിരക്കിൽ അത്യാധുനിക ഫീച്ചറുകളുള്ള ഉപകരണങ്ങളെ അവതരിപ്പിച്ചു കൊണ്ട് ജനശ്രദ്ധ നേടിയെടുത്ത നിർമാതാക്കളാണ് ഷവോമി. ഷവോമിയുടെ സ്മാർട്ട്ഫോണുകൾക്കും സ്മാർട്ട് ടിവികൾക്കും അത്രയേറെ സ്വീകാര്യതയാണ് വിപണിയിൽ. ഇപ്പോഴിതാ സ്മാർട്ട് ട്രാഷുമായി രംഗത്തെത്തിയിരിക്കുകയാണ് ഷവോമി. വ്യക്തമായി പറഞ്ഞാൽ ഒരു സ്മാർട്ട് ചവറ്റുകുട്ട. ഏവരെയും അത്ഭുതപ്പെടുത്തുന്ന രീതിയിലാണ് ഈ സ്മാർട്ട് ചവറ്റുകുട്ടയുടെ പ്രവർത്തനം.

സ്മാർട് സെൻസറുകളുടെ സഹായത്തോടെ പ്രവർത്തിക്കുന്നതിനാൽ മനുഷ്യ കര സ്പർശം 35 സെന്‍റിമീറ്റർ അകലെ നിന്നു തന്നെ മനസിലാക്കി കുട്ട താനെ തുറക്കം. സാധാരണ വെയ്സ്റ്റ് ബിന്നുകളില്‍ മാലിന്യം ഇടാന്‍ നമ്മള്‍ കൈകൊണ്ട് തുറക്കണമായിരുന്നു. എന്നാല്‍ ഷവോമിയുടെ സ്മാര്‍ട്ട് ട്രാഷ് ബിൻ വന്നതോടെ അതിന്‍റെ ആവശ്യമില്ല. കൈകൊണ്ടു തൊടാതെ തന്നെ മാലിന്യങ്ങൾ നിക്ഷേപിക്കാം.

മാലിന്യങ്ങളിൽ നിന്നുള്ള ഗന്ധം പുറത്തുവരാത്ത രീതിയിലാണ് കുട്ടയുടെ പ്രവര്‍ത്തനം. കുട്ട നിറഞ്ഞു കഴിഞ്ഞാൽ കുട്ടയ്ക്കകത്തെ മാലിന്യങ്ങൾ കുട്ട തന്നെ സ്വയം പാക്ക് ചെയ്യും. നിങ്ങൾ അത് എടുത്ത് മാറ്റുകയേ വേണ്ടു. ശേഷം പുതിയ വേസ്റ്റ് ബാഗ് യഥാസ്ഥാനത്ത് സ്ഥാപിക്കുന്നതും കുട്ട തനിയെ ചെയ്തുകൊള്ളും.

40 സെന്‍റിമീറ്റര്‍ ഉയരമുള്ള സ്മാർട്ട് കുട്ടയില്‍ ഏതാണ്ട് 3.5 കി.ഗ്രാം ഭാരം വരെ നിക്ഷേപിക്കാൻ കഴിയും. 15.5 ലിറ്ററാണ് കുട്ടയുടെ സംഭരണശേഷി. ചൈനയില്‍ 199 യുവാനാണ് സ്മാര്‍ട്ട് ചവറ്റുകുട്ടയുടെ വില. ഇന്ത്യയില്‍ ഏതാണ്ട് 2000 രൂപയ്ക്കടുത്ത് വില പ്രതീക്ഷിക്കാം. സെപ്തംബർ 11 മുതൽ സ്മാര്‍ട്ട് കുട്ട വിപണിയിൽ ലഭ്യമായി തുടങ്ങുമെന്നാണ് കമ്പനി അറിയിച്ചിരിക്കുന്നത്.