ഇന്ത്യൻ സ്മാർട്ട്ഫോൺ വിപണിയിൽ ഒന്നാമതായി ഷവോമി

ന്യൂഡൽഹി: ഇന്‍റർനാഷണൽ ഡാറ്റ കോർപ്പറേഷൻ (IDC)റിപ്പോർട്ട് പ്രകാരം ഈ സാമ്പത്തിക വര്‍ഷത്തിന്‍റെ മൂന്നാം പാദത്തില്‍ സ്മാർട്ട്ഫോൺ രംഗത്ത് ഏറ്റവും മുഖ്യധാരയിലെത്തിയിരിക്കുകയാണ് ഷവോമി. ഇന്ത്യയിലെ 50 നഗരങ്ങളെ കേന്ദ്രീകരിച്ച് നടത്തിയ കണക്കെടുപ്പിലാണ് ഈ കണ്ടെത്തൽ. തൊട്ടുപുറകിലായി സാംസങ്, ലെനോവോ, ഓപ്പോ, വിവോ തുടങ്ങിയ കമ്പനികളും സ്ഥാനം പിടിച്ചു.

ഇതിലേറെ ശ്രദ്ധേയമായിരിക്കുന്നത് ഒരുകാലത്ത് വിപണിയിലെ അതികായരായ സാംസങിനെ പിന്തള്ളിയാണ് ചൈനീസ് സ്മാർട്ട്ഫോൺ നിർമാതാവായ ഷവോമി ഈ നേട്ടം കൈവരിച്ചിരിക്കുന്നത് എന്നാണ്.

സാസംങിനെ പിന്തള്ളി 26.5 ശതമാനം വിപണിവിഹിതമാണ് ഷവോമി നേടിയെടുത്തിരിക്കുന്നത്. ഇതിന് കൂടുതൽ സഹായകമായത് റെഡ്മി നോട്ട് 4 ന്‍റെ വില്പനയായിരുന്നു. രാജ്യത്ത് 40 ശതമാനം വില്പനയാണ് റെഡ്മി നോട്ട് 4 കാഴ്ചവെച്ചത്. പ്രമുഖ നഗരങ്ങളിലെ കണക്കെടുത്തപ്പോൾ റെഡ്മി നോട്ട് 4 ന്‍റെ വില്പനയിലാണ് ഐഡിസി ഏറ്റവും കൂടുതൽ വർധനവ് രേഖപ്പെടുത്തിയിരിക്കുന്നത്.

നിലവിൽ വിപണിയിൽ 15 ശതമാനം വർധനവോടെ രണ്ടാം സ്ഥാനത്തുള്ളത് സാംസങ് ആണ്. 24.1 ശതമാനം വിപണിവിഹിതമാണ് സാസംങ് നേടിയെടുത്തിരിക്കുന്നത്. സാസംങിന്‍റെ ഗാലക്സി ജെ2, ഗാലക്സി ജെ7മാക്സ്, ഗാലക്സി ജെ7 തുടങ്ങിയ ഫോണുകളാണ് ഐഡിസിയുടെ റിപ്പോർട്ട് പ്രകാരം 50 ശതമാനം വിപണിവിഹിതം നേടികൊടുത്തിരിക്കുന്നത്.