ടച്ച്‌ ബാറുമായി ആപ്പിള്‍ മാക്ബുക്ക് പുറത്തിറങ്ങി

ഫങ്ഷന്‍ കീകള്‍ക്കു പകരം ടച്ച്‌ ബാറുമായി ആപ്പിള്‍ മാക്ബുക്ക് പുറത്തിറങ്ങി. കലിഫോര്‍ണിയയില്‍ പുറത്തിറക്കിയ പുതിയ മാക്ബുക് പ്രോ പതിപ്പുകളിലാണ് ആപ്പിള്‍ ടച്ച്‌ ബാര്‍ അവതരിപ്പിച്ചത്. സ്മാര്‍ട് ഫോണിലെ ടച്ച്‌ കണ്‍ട്രോളിനു സമാനമായ രീതിയിലാണ് കീബോഡിന്റെ മുകള്‍ ഭാഗത്ത് ടച്ച്‌ ഡിസ്‍പ്ളേ. ഉപയോഗിക്കുന്ന ആപ്ലിക്കേഷനനുസരിച്ച്‌ ടച്ച്‌ ബാറിലെ ഫങ്ഷനുകള്‍ മാറിക്കൊണ്ടിരിക്കും.

പാട്ടുകേള്‍ക്കുമ്പോള്‍ പ്ലേ, പോസ് ബട്ടണുകളാണെങ്കില്‍ മെയില്‍ ബോക്സ് തുറക്കുമ്പോള്‍ റിപ്ലൈ, ഫോര്‍വേഡ് ഓപ്ഷനുകളാകും ടച്ച്‌ ബാറില്‍ തെളിയുക. 13 ഇഞ്ച്, 15 ഇഞ്ച് മോഡലുകളാണ് പുറത്തിറക്കിയത്.

ഐ7 പ്രോസസറാണ് ഇതില്‍ ഉപയോഗിക്കുന്നത്.
കീബോഡിന്റെ രണ്ടുവശങ്ങളിലുമാണ് സ്പീക്കറുകള്‍. പവര്‍ ബട്ടണിനൊപ്പം വിരലടയാളം തിരിച്ചറിയുന്ന ടച്ച്‌ ഐഡി സംവിധാനവുമുണ്ടാകും. 13 ഇഞ്ച് മോഡലിന് 1,799 യുഎസ് ഡോളറും, 15 ഇഞ്ച് മോഡലിനു 2,399 ഡോളറുമാണ് വില. മൂന്നാഴ്ചക്കുള്ളില്‍ യുഎസ് വിപണിയില്‍ ലഭ്യമാകും.