ഇടുക്കിയിലെ അഞ്ചുരുളിയിൽ ഇനി ഹെലികോപ്ട‍ർ സവാരി

ഇടുക്കി: ഇനി ഇടുക്കിയിലെ അഞ്ചുരുളിയുടെ ഭംഗി ആസ്വദിക്കാനെത്തിയാൽ ഹെലികോപ്ടറില്‍ ആകാശത്തില്‍ ഉല്ലാസ യാത്രനടത്താം. അഞ്ചുരുളി സൗന്ദര്യോത്സവത്തിന്റെ ഭാഗമായാണ് പുതിയ സംവിധാനം. 18,19,20 തീയതികളിലാണ് ഹെലികോപ്റ്റര്‍ യാത്രയ്ക്കുളള അവസരം. ഒരാള്‍ക്ക് 2700 രൂപ നിരക്കില്‍ ആകാശയാത്ര നടത്തി അഞ്ചുരുളിയുടെ സൗന്ദര്യം ആസ്വദിക്കാം. ജില്ലാ ടൂറിസം വകുപ്പും, ഹൈഡല്‍ ടൂറിസവും വിവിധ പദ്ധതികളാണ് ആവിഷ്‌കരിക്കുന്നത്.

ഹെലികോപ്ടര്‍ യാത്രക്കുപുറമേ ഇടുക്കി ജലാശയത്തില്‍ ബോട്ടുസവാരി, വനയാത്ര, ട്രക്കിങ്ങ്, ആനസവാരി, കുതിരസവാരി, കളരിപ്പയറ്റ് പ്രദര്‍ശനം, വടംവലി മത്സരം, ഗാനമേള, നാടന്‍പാട്ട്, ആദിവാസിക്കൂത്ത്, കോമഡി ഷോ, വീല്‍ചെയര്‍ ഗാനമേള, കഥാപ്രസംഗം, കാര്‍ഷിക- ടൂറിസം വികസന സെമിനാറുകള്‍, ഡാന്‍സ്പ്രോഗ്രാമുകള്‍, പ്രതിഭാസംഗമം, ഫേട്ടോഗ്രാഫി മത്സരവും പ്രദര്‍ശനവും നടക്കും.