ഒരിക്കലും ഉറങ്ങാത്ത നഗരമാണ് മുംബൈ. എന്നാല് കൊവിഡ്-19 വന്നതോടെ ഈ സ്ഥിതിയും മാറി. മുംബൈ നഗരവും ഏറെ അടച്ചുപൂട്ടിയ മട്ടാണ്. മെട്രോ നഗരത്തില് എങ്ങും ആളെ കാണാനില്ല. രാത്രിയും പകലുമൊക്കെ ഇതേ അവസ്ഥയാണ്. ട്രെയിന് സര്വീസ് മുതല് മാളുകള് വരെ അടച്ചിട്ടു.
എല്ലാം വളരെ പെട്ടെന്ന്
കൊവിഡ്-19 പടര്ന്നു പിടിക്കുന്നത് പ്രതിരോധിക്കാനാണ് ഇന്ത്യയിലെ മറ്റ് പ്രധാനപ്പെട്ട നഗരങ്ങൡലെടുത്തിട്ടുള്ള നടപടികള് പോലെ മുംബൈയിലും എടുത്തിട്ടുള്ളത്. മുംബൈയുടെ ലൈഫ് ലൈന് എന്നറിയപ്പെടുന്ന ലോക്കല് ട്രെയിനുകള് പോലും സര്വീസ് നിര്ത്തിവെച്ചു. സാധാരണഗതിയില് വന് ജനാവലിയായിരുന്നു ഈ ട്രെയിനുകളില് കണ്ടിരുന്നത്. നൂറു കണക്കിന് പേര് ദിവസേന ആശ്രയിച്ചിരുന്നതും ഈ ലോക്കല് ട്രെയിനുകളെയായിരുന്നു. ദിവസങ്ങള്ക്കു മുമ്പ് തന്നെ ലോക്കല് ട്രെയിനുകളിലെ തിരക്ക് കുറഞ്ഞിരുന്നു. വിരലില് എണ്ണാവുന്നവര് മാത്രമായിരുന്നു ഓരോ ട്രെയിനിലുമുണ്ടായിരുന്നത്.
പേമാരി വരെ തരണം ചെയ്തവര്
മുംബൈയിലെ ഡബ്ബാവാലകള് ലോകമെമ്പാടും പ്രശസ്തമാണ്. ചോറുപാത്രങ്ങളമായി സൈക്കിളുകളില് തൊപ്പിയും ധരിച്ച് ഓഫീസുകള്തോറും കയറിയിറങ്ങുന്ന ചിത്രം ആരുടെ മുഖത്ത് നിന്നാണ് മായാത്തത്. എല്ലാ പ്രതികൂല സാഹചര്യത്തിലും അവര് ഭക്ഷണവുമായി എത്തും. നഗരത്തിലുടനീളം ശ്രദ്ധേയവും കാര്യക്ഷമവുമായ ഉച്ചഭക്ഷണ സേവനത്തിന് പേരുകേട്ട ഡബ്ബാവാലകള് 1890 മുതല് മുംബൈക്കാര്ക്ക് സേവനം നല്കുന്നുണ്ട്. ഓരോ ദിവസവും 2 ലക്ഷത്തോളം മുംബൈക്കാര്ക്ക് ഭക്ഷണം എത്തിക്കാന് അവര് ശ്രദ്ധിക്കുന്നുണ്ടെന്നാണ് റിപ്പോര്ട്ട്. ഈ കണക്കു മാത്രം മതി ഡബ്ബാവാലകളുടെ പെരും മനസ്സിലാക്കാന്. മുംബൈയില് എന്തു പ്രതികൂല കാലാവസ്ഥയാണെങ്കിലും ഡബ്ബാവാലകള് സേവനം നിര്ത്തിവയ്ക്കാറില്ല. മുംബൈയിലെ ശക്തമായ കാലവര്ഷത്തിലെ കൊടുംപേമാരിയില് പോലും അവര് സര്വീസ് നടത്താറുണ്ട്. അങ്ങനെയുള്ള ഡബ്ബാവാലകളുടെ സേവനമാണ് കൊറോണ വൈറസ് ഭിതിയില് നിര്ത്തിവെച്ചത്. ഒരു പക്ഷേ ചരിത്രത്തില് ആദ്യമായിട്ടായിരിക്കും ഡബ്ബാവാലകളുടെ സേവനം ഇത്രയും ദീര്ഘമായി നിര്ത്തിവെക്കുന്നത്.
Also Read: ഹോട്ടലുകള് അടച്ചാലും ഡല്ഹിയിലെ ജനം പട്ടിണിയിലാവില്ല; കാരണം ഇതാണ്
ലോക്ക് സൗണ് അനാവശ്യമായ എല്ലാ യാത്രകളും നിര്ത്തണമെന്ന് മഹാരാഷ്ട്ര ഭരണകൂടം ജനങ്ങളോട് അഭ്യര്ത്ഥിച്ചിട്ടുണ്ട്. കഴിയുന്നതും വീട്ടില് തന്നെ തങ്ങണമെന്നും നിര്ദേശം നല്കി. എല്ലാ കമ്പനികളും ജീവനക്കാര്ക്ക് വര്ക്ക് ഫ്രം ഹോം നല്കിയിട്ടുണ്ട്. സര്ക്കാര് ഉത്തരവിനെ തുടര്ന്ന് മുംബൈയിലെ പ്രശസ്തമായ ഫാഷന് സ്ട്രീറ്റും അടച്ചുപൂട്ടി. അഞ്ഞൂറിലധികം ഔട്ട്ലെറ്റുകള് ഇവിടെയുണ്ട്. സൗത്ത് മുംബൈയിലെ ഷോപ്പര്മാരുടെ പ്രധാന കേന്ദ്രമാണിത്. ബോളിവുഡ്, പ്രധാനമായും മുംബൈ ആസ്ഥാനമായി പ്രവര്ത്തിക്കുന്ന ഹിന്ദി ചലച്ചിത്ര വ്യവസായവും നിലച്ചു. നിരവധി ചലച്ചിത്ര ചിത്രീകരണങ്ങളും മാറ്റിവെച്ചു