തീവ്ര പ്രണയത്തിലേര്പ്പെടുന്നവരുടെ ആരാധനാപാത്രങ്ങളാണ് ലൈലയും മജ്നുവും. ഇരുവരുടെയും പ്രണയ കഥ ലോകപ്രസിദ്ധവുമാണ്. എഴുത്തുകാരും കവികളും സിനിമാക്കാരുമൊക്കെ ഇരുവരുടെയും പ്രണയ കഥയെക്കുറിച്ച് എഴുതിയിട്ടുണ്ട്. ഇന്ത്യയിലെ ഒട്ടുമിക്ക ഭാഷകളിലും ഇവരുടെ കഥ മുഴങ്ങിക്കേട്ടു. വെള്ളിത്തിരയില് കലാകാരന്മാര് തകര്ത്തഭിനയിച്ചു. കഴിഞ്ഞ തലമുറയും ഇപ്പോളുള്ള തലമുറയും ഇനി വരാനിരിക്കുന്ന തലമുറയും ഈ പ്രണയകഥ ഏറ്റെടുത്തവരും ഏറ്റെടുക്കാന് പോകുന്നവരുമാണ്. ഇവരുമായി ബന്ധപ്പെട്ട് ഒന്നിലധികം കഥകള് കേട്ടിട്ടുണ്ട്. എന്നാല് ലൈലയും മജ്നുവും അന്തിവിശ്രമം കൊള്ളുന്ന സ്ഥലത്തെക്കുറിച്ച് കേട്ടിട്ടുണ്ടോ. ഇരുവരെയും അടുത്തടുത്താണ് അടക്കം ചെയ്തിരിക്കുന്നത്. അവിടെ ഒരു സ്മാരകം ഉയര്ന്നു വന്നു. പരിചയപ്പെടാം, ലൈലയുടെയും മജ്മനുവിന്റെയും ശവകല്ലറകള് സ്ഥിതി ചെയ്യുന്ന സ്ഥലത്തെ.
എവിടെയാണ്
രാജസ്ഥാനിലെ ഗംഗനഗര് ജില്ലയിലെ അനൂപ്ഗഡ് എന്ന സ്ഥലത്തു നിന്ന് 11 കിലോമീറ്റര് തെക്ക് മാറി ബിന്ജോര് എന്ന ഗ്രാമത്തിലാണ് ലൈലയുടെയും മജ്നുവിന്റെയും ശവകുടീരങ്ങള് സ്ഥിതി ചെയ്യുന്നത്. ഇവരുമായി ബന്ധപ്പെട്ട് നിരവധി പ്രണയകഥകള് പ്രചരിക്കാറുണ്ട്. ഇരുവരും ഇന്നത്തെ പാകിസ്ഥാനില് സ്ഥിതി ചെയ്യുന്ന സിന്ധിലേക്ക് ഓടിപ്പോവുകയും ആക്രമണത്തില് നിന്ന് രക്ഷപ്പെടാന് രാജസ്ഥാനിലെ ബിന്ജോര് മേഖലയില് എത്തിപ്പെടുകയും ചെയ്തുവെന്ന് പറയപ്പെടുന്നു. ഇവര് മരിച്ചപ്പോള് തൊട്ടുത്തായി ഇവരെ അടക്കുകകയും ചെയ്തു. മറ്റൊരു കഥയനുസരിച്ച് മരുഭൂമിയിലൂടെ ഓടിരക്ഷപ്പെടുകയായിരുന്ന ഇവര് ഒരു തുള്ളി വെള്ളം ലഭിക്കാതെ ദാഹിച്ചു വലഞ്ഞ് മരിച്ചെന്ന് പറയപ്പെടുന്നു. തുടര്ന്ന് ഇരുവരെയും അവിടെ അടക്കം ചെയ്യുന്നു. ഇന്ന് പ്രണയിക്കുന്നവര് വന്നു പോകുന്ന സ്ഥലമാണ് ലൈലയുടെ മജ്നുവിന്റെയും കബറിടം. പ്രണയം സഫലീകരിക്കാന് നിരവധിപേര് ഇവിടെ എത്താറുണ്ട്. ജൂണ് മാസം ഇവിടെ പ്രത്യകം ചടങ്ങുകള് നടക്കാറുണ്ട്.
യഥാര്ത്ഥ കബറാണോ
ഇവിടെ സ്ഥിതി ചെയ്യുന്ന ശവകല്ലറ ലൈലയുടെയും മജ്നുവിന്റെയുമല്ലെന്നും ഒരു പുരോഹിതനെയാണ് ഇവിടെ അടക്കം ചെയ്തിരിക്കുന്നതെന്നും ഒരു കഥയുണ്ട്. പുരോഹിതനെയും അദ്ദേഹത്തിന്റെ ശിഷ്യനെയുമാണ് ഇവിടെ അടക്കം ചെയ്തിരിക്കുന്നതെന്നാണ് പറയപ്പെടുന്നത്. അതേസമയം ഇന്തോ-പാക് അതിര്ത്തിയില് തന്നെ സ്ഥിതി ചെയ്യുന്ന സ്ഥലമാണിത്. അതിനാല് ഇവിടത്തെ ശവകല്ലറകള് ലൈലയുടെയും മജ്നുവിന്റെയും തന്നെയാണെന്ന് മറുകൂട്ടര് ഉറപ്പിച്ചു പറയുന്നു.
സ്മാരകത്തിന്റെ പ്രത്യേകത
ഒരു പഴയ സെമിത്തേരിയുടെ ഭാഗത്താണ് ലൈലയുടെയും മജ്നുവിന്റെയും ശവകല്ലറകള് അടങ്ങുന്ന സ്മാരകം സ്ഥതി ചെയ്യുന്നത്. മുമ്പ് ഒരു ഷെഡ് മാത്രമായിരുന്നു ഉണ്ടായിരുന്നത്. എന്നാല് പിന്നീട് കൂടുതല് പേര് ഇവിടേക്ക് വരാന് തുടങ്ങി. അത്ഭുതകഥകള് കേട്ടാണ് ആള്ക്കാര് എത്തിത്തുടങ്ങിയത്. എല്ലാ വര്ഷവും ജൂണ് മാസത്തില് ഇവിടെ പ്രത്യേക ചടങ്ങുകളും പ്രാര്ത്ഥനകളും നടക്കാറുണ്ട്. ഇവിടെയെത്തുന്നവര്ക്കായി സൗജന്യം ഭക്ഷണം വിതരണം ചെയ്യുന്നു. ലൈലയുടെയും മജ്നുവിന്റെയും സ്മരണയ്ക്കു മുന്നില് സൂഫി നൃത്തമടക്കമുള്ളവ സംഘടിപ്പിക്കാറുണ്ട്. പാകിസ്ഥാനില് നിന്നുള്ളവര്ക്കും ഇവിടെയെത്താന് സാധിച്ചിരുന്നു. എന്നാല് കാര്ഗില് യുദ്ധത്തിന് ശേഷം സുരക്ഷ കണക്കിലെടുത്ത് അവരുടെ പ്രവേശനം വിലക്കിയിട്ടുണ്ട്.
ബിന്ജോറിനെ കുറിച്ച്
ബിന്ജോര് എന്ന സ്ഥലത്ത് കാണാന് നിരവധി കാഴ്ച്ചകളുണ്ട്. ചരിത്രം ഇഷ്ടപ്പെടുന്നവര്ക്ക് ഇഷ്ടപ്പെടും. സിന്ധു നദീതട സംസ്കാരത്തിന്റെ ശേഷിപ്പുകള് ഇവിടെ കണ്ടെത്താനാകും. അന്നത്തെകാലത്തെ വസ്തുക്കളും അസ്തികൂടങ്ങളുമൊക്കെ ഇവിടെ നിന്നും കണ്ടെടുത്തിട്ടുണ്ട്. ഇന്ത്യ-പാക് അതിര്ത്തി പ്രദേശമായ ഹിന്ദുമാല്കോട്ട് ഒരു വിനോദ സഞ്ചാര കേന്ദ്രം കൂടിയാണ്. ഗംഗാനഗറില് നിന്ന് 25 കിലോമീറ്റര് സഞ്ചരിച്ചാല് ഇവിടെയെത്തിച്ചേരാം. ഗംഗാനഗറില് സ്ഥിതി ചെയ്യുന്ന ദാബ്ല എന്ന ഗ്രാമത്തിലെ ബുദ്ധ ജോഹാദ് ഗുരുദ്വാര സന്ദര്ശിക്കാനും ആള്ക്കാര് എത്താറുണ്ട്. ചരിത്ര പ്രധാനമായ പെയിന്റിങ്ങുകളും സ്മാരകങ്ങളുമൊക്കെ ഇവിടെ കാണാന് സാധിക്കും.
Also Read: അപ്സരസുകള് ഇപ്പോഴും ഇവിടെ നീരാടാറുണ്ടത്രെ!
എത്തിച്ചേരാന്
അമൃത്സറിലെ ശ്രീ ഗുരുറാം ദാസ്ജി അന്താരാഷ്ട്ര വിമാനത്താവളമാണ് ഏറ്റവും അടുത്തുള്ള വിമാനത്താവളം. 271 കിലോമീറ്റര് അകലെയാണ് ഈ വിമാനത്താവളം. ഇവിടെ നിന്ന് ടാക്സി മാര്ഗം ബിന്ജോര് ഗ്രാമത്തിലെത്താം. ഉത്തരേന്ത്യയിലെ പ്രധാനപ്പെട്ട നഗരങ്ങളില് നിന്ന് റോഡ് മാര്ഗവും ഇവിടെ എത്തിച്ചേരാനാകും. ഡല്ഹി, ഹരിദ്വാര്, രെവാരി, തുടങ്ങിയ സ്ഥലങ്ങളില് നിന്ന് ഇവിടേക്ക് ട്രെയിന് മാര്ഗവും എത്തിച്ചേരാം. ഗംഗ നഗര് ഹനുമാന്ഗഡ് ബ്രോഡ് ഗേജ് ലൈന് വഴിയുള്ള ട്രെയിന് സര്വീസുകളെ ആശ്രയിക്കാം.