കേരളത്തിലെ മറ്റു ജില്ലകളെ അപേക്ഷിച്ച് വയനാടിന് മാത്രം അവകാശപ്പെടാവുന്ന ഒരു പ്രത്യേകതയുണ്ട്. ഈ ജില്ലയുടെ പേര് കേള്ക്കുമ്പോള് തന്നെ ഇവിടേക്കുള്ള വിനോദസഞ്ചാരത്തെക്കുറിച്ചാണ് മനസിലേക്ക് ഓടിയെത്തുന്നത്. വയനാട് എന്നാല് ഒരു ടൂറിസ്റ്റ് ഡെസ്റ്റിനേഷന് എന്നാണ് പരക്കെ പറയപ്പെടുന്നത്. കേരളത്തിലെ ഒരു ജില്ല എന്ന പട്ടം അതു കഴിഞ്ഞേയുള്ളു. ഇവിടെ കാണാന് നിരവധി സ്ഥലങ്ങളുണ്ടെങ്കിലും നമുക്ക് വയനാട് വിട്ടാലോ എന്ന പതിവ് പല്ലവിയാണ് യാത്രാ പ്രേമികളുടെ നാവില് നിന്നുയരുന്നത്.
പ്രകൃതിയോട് ഇത്രയും ഇണങ്ങി നില്ക്കുന്ന മറ്റൊരു ജില്ല കേരളത്തിലില്ല. നഗരങ്ങളിലെ തിരക്കുകളില് നിന്ന് വയനാടിന്റെ പച്ചപ്പിലേക്ക് അലിഞ്ഞു ചേരുക എന്നതാണ് ഇവിടെയെത്തുന്നവരുടെ പ്രധാന ഉദ്ദേശം.
കേരളത്തിലെ പന്ത്രണ്ടാമത് ജില്ലയായി 1980 നവംബര് ഒന്നിനാണ് വയനാട് ജില്ല രൂപംകൊള്ളുന്നത്. കോഴിക്കോട്, കണ്ണൂര് ജില്ലകളില് നിന്നുള്ള ഭാഗങ്ങള് അടര്ത്തിയെടുത്താണ് വയനാട് ജില്ലയ്ക്ക് രൂപം നല്കിയത്. കര്ണാടക, തമിഴ്നാട് ജില്ലകളുമായി അതിര്ത്തി പങ്കിടുന്ന ഏക ജില്ല എന്ന പ്രത്യേകതയും വയനാടിനുണ്ട്. വയനാടിന്റെ 38 ശതമാനവും വനമാണ്. ഇതുകൊണ്ടു തന്നെ കേരളത്തിലെ ഏറ്റവും ജനസംഖ്യ കുറഞ്ഞ ജില്ലയും വയനാട് തന്നെ. പശ്ചിമഘട്ടത്തില് സ്ഥിതി ചെയ്യുന്ന വയനാടിന്റെ ഭൂപ്രകൃതി ആസ്വദിക്കാന് വിദേശ രാജ്യങ്ങളില് നിന്നു പോലും ആയിരങ്ങള് വര്ഷാവര്ഷം എത്തുന്നു. കണ്ണുകള് എവിടെ പായിച്ചാലും മനംനിറയ്ക്കുന്ന കാഴ്ച്ചകള് സമ്മാനിക്കുന്നതിനാലാണ് വയനാടിനെ സഞ്ചാരികള് ഇത്രയും നെഞ്ചോട് ചേര്ക്കുന്നത്. മഴക്കാലത്ത് വയനാട് കൂടുതല് സുന്ദരിയാകുന്നു. പച്ചപ്പിന് കൂടുതല് സൗന്ദര്യം കൈവരുന്നു. മഞ്ഞുകാലത്ത് കോടമഞ്ഞിന്റെ കുളിര്മയും സഞ്ചാരികളെ സ്വാഗതം ചെയ്യും.
കോഴിക്കോട് നിന്ന് താമരശ്ശേരി ചുരം വഴി വയനാട്ടിലേക്ക് പ്രവേശിച്ചു കഴിയുമ്പോള് തന്നെ വയനാട് എന്ന സുന്ദരിയുടെ വശ്യമായ സൗന്ദര്യം ആസ്വദിച്ചു തുടങ്ങാം. പിന്നീടങ്ങോട്ട് കാഴ്ച്ചയുടെ പൊന്വസന്തമാണ്. സഹ്യന്റെ മടിത്തട്ടിലൂടെ സഞ്ചരിക്കുമ്പോള് വയനാടിനെക്കുറിച്ച് ഓര്ത്ത് മലയാളികള്ക്ക് അഭിമാനിക്കാം. ഒറ്റദിവസം കൊണ്ട് വയനാടിനെ തൊട്ടറിഞ്ഞ് തിരിച്ച് ചുരമിറങ്ങുക എന്നത് നമ്മള് നമ്മളോട് തന്നെ ചെയ്യുന്ന ചതിയാണ്. കഴിയുമെങ്കില് കുറഞ്ഞത് മൂന്ന് ദിവസമെങ്കിലും ഇവിടെ തങ്ങി കാഴ്ച്ചകള് ആസ്വദിക്കുക. വയനാടിനെ പൂര്ണമായും ഉള്ക്കൊള്ളണമെങ്കില് അങ്ങനെ തന്നെ ചെയ്യണം. ജില്ലയുടെ ഓരോ മുക്കും മൂലയും അരിച്ചുപെറുക്കി തന്നെ ഇവിടെ നിന്ന് മടങ്ങണം. കൂടാതെ വ്യത്യസതമായ രീതിയിലുള്ള ഭക്ഷണവിഭവങ്ങളും ആസ്വദിക്കാം.
വയനാട്ടിലെ ആഡംബര റിസോര്ട്ടുകളും ആയൂര്വേദ ചികിത്സാ കേന്ദ്രങ്ങളും പ്രകൃതിജന്യ സുഗന്ധദ്രവ്യങ്ങളുമാണ് വിദേശ വിനോദ സഞ്ചാരികളെ വയനാടുമായി ബന്ധിപ്പിക്കുന്നത്. അന്താരാഷ്ട്ര വിനോദസഞ്ചാര ഭൂപടത്തില് വയനാടിന് തനതായ സ്ഥാനം നേടിക്കൊടുത്തതും ഇതു തന്നെയാണ്. സുഗന്ധദ്രവ്യങ്ങളുടെ കലവറ കൂടിയാണ് വയനാട്. കാപ്പി, തേയില, ഏലം, കുരുമുളക് തുടങ്ങിയവയുടെ കയറ്റുമതിയുടെ പേരിലും വയനാട് പ്രസിദ്ധമാണ്.
എടയ്ക്കല് ഗുഹ, കുറുവാ ദ്വീപ്, പൂക്കോട് തടാകം, സൂചിപ്പാറ വെള്ളച്ചാട്ടം, ബാണാസുര സാഗര് അണക്കെട്ട്, മുത്തങ്ങ വനം, പക്ഷിപ്പാതാളം തുടങ്ങിയ സ്ഥലങ്ങള് വയനാട്ടിലെത്തിയാല് നിര്ബന്ധമായും കണ്ടിരിക്കണം. ചരിത്രത്തെ പ്രണയിക്കുന്നവര്ക്കും വയനാടിനെ പ്രിയദമയായി കാണാം. കേരള വര്മ്മ പഴശ്ശിരാജയുടെ സ്മരണകള് ഉറങ്ങുന്ന മാനന്തവാടിയില് കേരള ചരിത്രത്തിന്റെ പ്രധാനപ്പെട്ട ഏട് അനുഭവിച്ചറിയാം.
കുറുവാ ദ്വീപ് എന്ന അത്ഭുത ദ്വീപ്
എത്ര സന്ദര്ശിച്ചാലും അത്ഭുതങ്ങള് അവസാനിക്കാത്ത സ്ഥലമാണ് കുറുവാ ദ്വീപ്. വയനാട്ടിലൂടെ ഒഴുകുന്ന കബനി നദിയുടെ കരയിലാണ് കുറുവാ ദ്വീപ് സ്ഥിതി ചെയ്യുന്നത്. തൊള്ളായിരം ഏക്കറില് സ്ഥിതി ചെയ്യുന്ന ദ്വീപിനുള്ളില് അനേകം ഉപദ്വീപുകളുമുണ്ട്. മനുഷ്യന് ചെന്നെത്താത്ത ദ്വീപുകള് ഇനിയും ഇവിടെയുണ്ടെന്നത് കൗതുകകരമാണ്. പച്ചപ്പ് പുതച്ചു നില്ക്കുന്ന ദ്വീപ് എത്രകണ്ടാലും മതിവരില്ല. ദ്വീപ് സന്ദര്ശിക്കുന്നവര്ക്ക് അവിടം വിട്ട് വരാനുള്ള വൈമനസ്യം ഉണ്ടായാലും അത്ഭുതപ്പെടാനില്ല. പശ്ചിമബംഗാളിലെ സുന്ദര്ബന് ദ്വീപുകള് കഴിഞ്ഞാല് അത്തരത്തില് സഞ്ചാരികളെ ആകര്ഷിക്കുന്നത് ഇങ്ങ് തെക്കേയറ്റത്തുള്ള കുറുവാ ദ്വീപാണ്. ആകാശക്കാഴ്ച്ചയില് കേവലം ഒരു പച്ചത്തുരുത്തായി മാത്രം കാണപ്പെടുന്ന ദ്വീപിന്റെ യഥാര്ത്ഥ മഹത്വം മനസ്സിലാക്കണമെങ്കില് നേരിട്ട് ഇവിടെ എത്തുക തന്നെ ചെയ്യണം. വന്യജീവികളുടെയും പക്ഷികളുടെയും സാന്നിധ്യമാണ് സഞ്ചാരികളെ ഇവിടേക്ക് അടുപ്പിക്കുന്ന മറ്റൊരു ഘടകം. ഫോട്ടോഗ്രാഫര്മാര്ക്ക് കുറുവാ ദ്വീപ് മികച്ച വിരുന്ന് ഒരുക്കും. കുറുവാ ദ്വീപിലെത്തുന്നവര് കബനി നദിക്ക് കുറുകെയുള്ള ചങ്ങാടത്തില് യാത്ര ചെയ്തില്ലെങ്കില് അതൊരു തീരാനഷ്ടമായിരിക്കും. ജലനിരപ്പില് നിവര്ന്നു കിടക്കുന്ന മുളംകമ്പുകള് കൊണ്ടുള്ള ചങ്ങാടത്തിലിരുന്ന് കാടിന്റെ വന്യ ദൃശ്യങ്ങള് മതിയാവോളം ആസ്വദിക്കാം.
ചരിത്ര കഥകള് പറഞ്ഞു തരുന്ന എടയ്ക്കല് ഗുഹകള്
വയനാട്ടിലെ പ്രധാന ടൗണായ സുല്ത്താന് ബത്തേരിയില് നിന്ന് പതിനാറ് കിലോമീറ്റര് മാറിയാണ് എടയ്ക്കല് ഗുഹകള് സ്ഥിതി ചെയ്യുന്നത്. ചരിത്ര സ്മാരകമായി നിലകൊള്ളുന്ന ഈ ഗുഹകള്ക്ക് ധാരാളം കഥകള് പറയാനുണ്ട്. ഗുഹയ്ക്കുള്ളില് കൊത്തിവെച്ചിട്ടുള്ള ശിലാ ലിഖിതങ്ങള് തന്നെയാണ് പ്രധാന ആകര്ഷണം. ഇതുമായി ബന്ധപ്പെട്ട് നിരവധി പഠനങ്ങളാണ് നടന്നിട്ടുള്ളത്. സമുദ്ര നിരപ്പില് നിന്ന് 4000 അടി ഉയരത്തില് സ്ഥിതി ചെയ്യുന്ന ഗുഹയിലേക്ക് എത്തിപ്പെടണമെങ്കില് നടന്നു തന്നെ പോണം. ഉയര്ന്ന് നില്ക്കുന്ന രണ്ട് കൂറ്റന് പാറകള്. ഈ പാറകള്ക്ക് ഇടയിലായി മേല്ക്കൂര പോലെ സ്ഥിതി ചെയ്യുന്ന മറ്റൊരു പാറയാണ് ഇതിന് ഗുഹയുടെ രൂപം നല്കുന്നത്. രണ്ട് പാറകള്ക്കിടയില് മറ്റൊരു കല്ല് ഇരിക്കുന്നതുകൊണ്ടു തന്നെയാണ് എടയ്ക്കല് എന്ന പേര് വന്നതും.
പ്രണയമാണ് പൂക്കോടിനോട്
കേരളത്തില് ഏറ്റവും ഉയരത്തില് സ്ഥിതി ചെയ്യുന്ന തടാകമാണ് വയനാട്ടിലെ പൂക്കോട് തടാകം. സമുദ്ര നിരപ്പില് നിന്ന് 2100 മീറ്ററിലധികം ഉയരത്തിലാണ് ഈ തടാകം സ്ഥിതി ചെയ്യുന്നത്. നിരവധി മരങ്ങള്ക്ക് നടുവിലായി സ്ഥിതി ചെയ്യുന്ന പൂക്കോട് തടാകം ആരെയും ആകര്ഷിക്കും. പൂക്കോട് തടാകത്തെ ക്യാമറ ഫ്രെയിമില് പകര്ത്തുമ്പോള് വിദേശ രാജ്യങ്ങളിലെ ചില സ്ഥലങ്ങളെ ഓര്മ്മപ്പെടുത്തും. പൂക്കോട് എത്തിയാല് പ്രകൃതി ഭംഗി പരമാവധി നുകര്ന്ന് ബോട്ടിങ്ങും ആസ്വദിച്ച് മടങ്ങാം.
സാഹസികരുടെ സൂചിപ്പാറ
സാഹസികത ഇഷ്ടപ്പെടുന്നവര്ക്ക് സൂചിപ്പാറ വെള്ളച്ചാട്ടം സന്ദര്ശിക്കാം. ഇവിടെ റിവര് വാട്ടര് റാഫ്റ്റിങ്ങിനും നീന്തുവാനും പറ്റിയ സ്ഥലമാണ്. സാഹസിക മലകയറ്റക്കാരുടെയും പ്രിയപ്പെട്ട ഇടമാണ് സൂചിപ്പാറ. കല്പ്പറ്റയില് നിന്ന് 22 കിലോമീറ്റര് മാറി മേപ്പാടി എന്ന സ്ഥലത്താണ് വെള്ളച്ചാട്ടം സ്ഥിതി ചെയ്യുന്നത്. മീന്മുട്ടി, കാന്തന്പാറ, സൂചിപ്പാറ എന്നിങ്ങനെ മൂന്നു ഭാഗങ്ങളുണ്ട്.
മുത്തങ്ങയുടെ കാനനഭംഗി
വയനാടിന്റെ പച്ചപ്പും കാനനഭംഗിയും നന്നായി അനുഭവിച്ചറിയാന് മുത്തങ്ങ വനത്തിലെത്താം. സുല്ത്താന് ബത്തേരിയില് നിന്ന് മൈസൂരിലേക്കുള്ള റോഡിലാണ് മുത്തങ്ങ സ്ഥിതി ചെയ്യുന്നത്. കര്ണാടകത്തിലെ ബന്ദിപൂര്, തമിഴ്നാട്ടിലെ മുതുമല കടുവസങ്കേതങ്ങള് എന്നിവ മുത്തങ്ങയോട് ചേര്ന്ന് കിടക്കുന്ന പ്രദേശങ്ങളാണ്. മുത്തങ്ങ വനത്തിനുള്ളില് താമസിച്ച് വനത്തെ അടുത്തറിയാം. ഇതിനായി സര്ക്കാരിന്റെ താമസ സൗകര്യം ഒരുക്കിയിട്ടുണ്ട്. ഹോട്ടലുകളില് താമസിക്കുന്നതിന് പുറമെ ഇവിടത്തെ ഏറുമാടങ്ങളില് താമസിച്ചാല് മുത്തങ്ങ കൂടുതല് ത്രില്ലടിപ്പിക്കും. ട്രെക്കിംഗ് ഇഷ്ടമുള്ളവര്ക്ക് കാട്ടിലെ മല കയറാന് പോകാം. മുത്തങ്ങ വന്യജീവി സങ്കേതത്തിനുള്ളിലൂടെ സഞ്ചാരികള്ക്ക് ഒരു സഫാരിയുമാകാം. പത്ത് കിലോമീറ്റര് ദൂരം വരുന്ന സഫാരി മിസ് ചെയ്യരുത്. സഫാരിക്കായി സര്ക്കാരിന്റെ ജീപ്പുകളുണ്ട്. രാവിലെ എഴു മുതല് പത്തു വരെയും വൈകുന്നേരം മൂന്ന് മുതല് അഞ്ച് വരെയുമാണ് സഫാരി അനുവദിക്കുന്നത്.
വെറുതെ വന്നു പോവുക എന്നതിലുപരി വയനാടിനെ തൊട്ടും അനുഭവിച്ചും അറിഞ്ഞും വേണം ഇവിടെ നിന്ന് മടങ്ങാന്. നഗരങ്ങളിലെ തിരക്കു പിടിച്ച ജീവിതത്തില് നിന്ന് പൂര്ണമായി മാറി നില്ക്കാന് വയനാട് നിങ്ങളെ സഹായിക്കുമെന്ന കാര്യത്തില് സംശയം വേണ്ട. നമുക്ക് വയനാട് വിട്ടാലോ എന്ന ചോദ്യത്തിന് നീട്ടി ഒരു യെസ് മൂളാം.