ഈ റോഡുകളില് അമിതാവേശം വേണ്ട
കാണാനൊക്കെ നല്ല അടിപൊളി വ്യൂ അയിരിക്കും. ഡ്രൈവ് ചെയ്ത് പോകുന്നത് ആകാശത്തുകൂടെയാണെന്നും തോന്നും. എന്നാല് ശ്രദ്ധ അല്പ്പമൊന്ന് പാളിയാല് ജീവന് തന്നെ നഷ്ടമായക്കാവുന്ന അപകടം സംഭവിക്കാം. ഇത്തരം റോഡുകള് കൂടുതലുള്ളത് ഇന്ത്യയുടെ വടക്കേയറ്റത്ത് ഹിമാലയന് മലനിരകളുടെ മടിതട്ടിലാണ്. വളഞ്ഞു പുളഞ്ഞു കിടക്കുന്ന ഇത്തരം റോഡുകളില് ഡ്രൈവ് ചെയ്യുമ്പോള് അതീവ ജാഗ്രതയിലായിരിക്കണം. സ്കില്ഡ് ഡ്രൈവര്മാര് എന്നൊക്കെ വിളിക്കുന്ന ശ്രേണിയില്പ്പെടുന്ന ഡ്രൈവര്മാര്ക്ക് മാത്രമേ ഇത്തരം റോഡുകളിലൂടെ ഓടിക്കാന് കഴിയുകയുള്ളു. പരിചയം കുറഞ്ഞ ഡ്രൈവര്മാര് ഇത്തരം റോഡുകള് തെരഞ്ഞെടുക്കാതിരിക്കുന്നതായിരിക്കും ഉചിതം. ഹിമാലയത്തിലെ റോഡുകള് ചിലപ്പോള് പരിചയസമ്പന്നരായ ഡ്രൈവര്മാര്ക്കും വെല്ലുവിളിയാകാറുണ്ട്. മഞ്ഞുവീണു കിടക്കുന്ന റോഡില് വാഹനത്തിന്റെ നിയന്ത്രണം തന്നെ നഷ്ടമാകാന് സാധ്യതയുണ്ട്. നിശ്ചിത വേഗത്തിന് മുകളില് പോയാല് റോഡില് നിന്ന് തെന്നിമാറാനുള്ള സാധ്യത കൂടുന്നു. നമ്മുടെ കേരളത്തിലും വളഞ്ഞു പുളഞ്ഞു കിടക്കുന്ന അപകടകരമായ റോഡുകളുണ്ടെങ്കിലും മഞ്ഞുവീഴ്ച്ചയുണ്ടാകാത്തതിനാല് അപകടത്തിന്റെ സാധ്യത കുറയുന്നു. സൂക്ഷിച്ച് വാഹനമോടിച്ചാല് മാത്രം മതിയാകും. കേരളത്തില് നിന്നടക്കം നിരവധി പേരാണ് സ്വന്തം വാഹനമോടിച്ച് ലേ ലഡാക്ക് അടക്കമുള്ള ഹിമാലയന് മേഖലകളിലേക്ക് പോകാറുള്ളത്. ഇത്തരം അപകടകാരികളായ റോഡുകളില് അതീവ ജാഗ്രത പുലര്ത്തേണ്ടത് നിര്ബന്ധമാണ്.
ലെ മണാലി ഹൈവേ
ഇന്ത്യയിലെ തന്നെ ഏറ്റവും മനോഹരമായ റോഡ് എന്നു വേണമെങ്കിലും ലേ മണാലി ഹൈവേയെ വിശേഷിപ്പിക്കാം. അതേസയമം തന്നെ ഏറ്റവും അപകടകാരി കൂടിയാണ് ഈ റോഡ്. ഹിമാചല് പ്രദേശ്, കശ്മീര് എന്നീ സ്ഥലങ്ങളിലൂടെ കടന്നു പോകുന്ന ഹൈവേയ്ക്ക് 490 കിലോമീറ്റര് നീളമുണ്ട്. ഇതുവഴി വാഹനമോടിക്കുമ്പോള് ഡ്രൈവര്മാര് അതീവ ജാഗ്രത പുലര്ത്തണം. കൊടുംതണുപ്പായതിനാല് തൊട്ടു മുന്നിലുള്ള കാഴ്ച്ച പോലും മറയുന്ന സാഹചര്യങ്ങളുണ്ടാകാം. ഇതിനു പുറമെ കിലോമീറ്ററോളം ദൂരം വഴിയരികില് ഒരു മനുഷ്യക്കുഞ്ഞിനെപ്പോലും കാണാന് കഴിയില്ല.
സോചിലാ ചുരം
സമുദ്രനിരപ്പില് നിന്ന് 11575 അടി ഉയരത്തിലൂടെയുള്ള ഡ്രൈവിങ്ങായിരിക്കും ഇത്. ഒമ്പതു കിലോമീറ്റര് നീളത്തിലുള്ള ഈ റോഡ് പാറകള്ക്കിടയിലൂടെയാണ് കടന്നു പോകുന്നത്. ശ്രീനഗറിനും ലേയ്ക്കും ഇടയില് സ്ഥിതി ചെയ്യുന്ന ഈ ഭാഗത്തെ റോഡിലൂടെയുള്ള ഡ്രൈവിങ്ങില് നല്ല ശ്രദ്ധ വേണം. ഹിമാലയത്തിന്റെ പടിഞ്ഞാറന് ഭാഗത്ത് ദേശീയ പാത ഒന്നിലാണ് ഈ സ്ട്രെച്ചള്ളത്. മോശം കാലാവസ്ഥ കാരണം മഞ്ഞുകാലത്ത് ഈ റോഡ് അടച്ചിടാറുണ്ട്. മഞ്ഞില് വാഹനം തെന്നിമാറാനുള്ള സാധ്യത കൂടുതലായതിനാല് എത്ര വലിയ പരിചയസമ്പനനായ ഡ്രൈവറായാലും ശ്രദ്ധിച്ചു വേണം വാഹനമോടിക്കാന്. ഒരു പരിധിക്കപ്പുറം വേഗത കൈവരിക്കാതിരിക്കാന് ശ്രദ്ധിക്കുക. അതേസമയം ഈ റോഡിലൂടെ മുകളിലെത്തിയാല് അവിടെ നിന്ന് കാണുന്ന ഹിമാലയത്തിന്റെ കാഴ്ച്ച അതിമനോഹരമായിരിക്കും. കാഴ്ച്ചയില് ആരും മയങ്ങും. ജീവിതത്തില് ഒരു തവണയെങ്കിലും കണ്ടിരിക്കേണ്ട കാഴ്ച്ചയാണിത്.
Also read: റാഞ്ചിയില് നിന്ന് സിങ്കപ്പൂരിലേക്ക് സൈക്കിള് ചവിട്ടിയ ചെറുപ്പക്കാരന്
കർദുങ് ലാ ചുരം
ലോകത്തെ തന്നെ ഏറ്റവും ഉയരത്തില് സ്ഥിതി ചെയ്യുന്ന റോഡാണിത്. ലേയില് നിന്ന് 40 കിലോമീറ്റര് അകലെയാണ് ഈ റോഡുള്ളത്. കാരക്കോരം മലനിരകളിലൂടെ കടന്നു പോകുന്ന റോഡില് നിന്നുള്ള കാഴ്ച്ചകള് ഒരിക്കലും നഷ്ടപ്പെടുത്താനാവാത്ത ഒന്നാണ്. മെയ് മുതല് ഒക്ടോബര് മാസം വരെയുള്ള കാലയളിവില് ഇതുവഴി യാത്ര ചെയ്യുന്നതാണ് നല്ലത്. മഞ്ഞുകാലത്ത് കാലവാസ്ഥ പ്രതികൂലമാകുന്നതോടെ അപകട സാധ്യതയും കൂടും. സുരക്ഷ മുന്നില് കണ്ട് ലേയില് നിന്ന് കര്ദുങ് ലാ വരെയുള്ള വാഹനങ്ങളെ രാവിലെ 9 മുതല് ഉച്ചയ്ക്ക് ഒന്ന് വരെയും കര്ദുങ് ലാ മുതല് ലേ വരെയുള്ള വാഹനങ്ങളെ ഉച്ചയ്ക്ക് ഒരു മണി മുതല് വൈകുന്നേരം അഞ്ചു മണി വരെയുമാണ് കടത്തിവിടാറുള്ളത്. കാലാവസ്ഥ മോശമാകാനിടയുള്ളതിനാല് എല്ലാ മുന്കരുതലും എടുത്തു വേണം ഇതുവഴിയുള്ള യാത്രയ്ക്ക് തയ്യാറെടുക്കാന്.
Also read: ഫ്രഞ്ച് ഡിഷ് മുതല് സര്ഫിംഗ് വരെ; പോണ്ടിച്ചേരി യാത്ര ചിത്രങ്ങളിലൂടെ
രോത്താങ് ചുരം
മണാലിയില് നിന്ന് 53 കിലോമീറ്റര് മാറിയാണ് രോത്താങ് ചുരമുള്ളത്. ഹിമാലയന് മലനിരകളുടെയും ചന്ദ്ര നദിയുടെയും ഹിമാനികളുടെയുമൊക്കെ അതിമനോഹര ദൃശ്യങ്ങള് സമ്മാനിക്കുന്ന ഒരു റോഡാണിത്. അവസരം കിട്ടിയാല് ഇതുവഴിയുള്ള ഡ്രൈവിംഗ് മിസ്സാക്കരുത്. അതേസമയം, ഡ്രൈവിങ്ങില് നല്ല ജാഗ്രതയും പുലര്ത്തണം. ജൂണ് മുതല് ഒക്ടോബര് വരെയുള്ള മാസങ്ങളില് ഈ റോഡ് യാത്രക്കാര്ക്കായി തുറന്നു കൊടുക്കപ്പെടും. കാലാവസ്ഥ മോശമാകുന്നതിനാല് ബാക്കി സമയങ്ങളില് റോഡ് അടച്ചിടും.
Also read: ഒറ്റദിവസം കൊണ്ട് ബാംഗ്ലൂര് നഗരത്തില് കണ്ടുതീര്ക്കാന് ഇതാ കുറച്ച് സ്ഥലങ്ങള്
നാത്തൂലാ ചുരം
ഇന്ത്യയിലെ അപകടം പിടിച്ച റോഡുകളുടെ പട്ടികയില് നാത്തൂലാ ചുരം വഴിയുള്ള റോഡും ഇടംപിടിച്ചിട്ടുണ്ട്. സമുദ്രനിരപ്പില് നിന്ന് 4310 മീറ്റര് ഉയരത്തിലാണ് നാത്തൂലാ ചുരം. വ്യാപാര പാതയായിരുന്ന സില്ക്ക് റൂട്ട് ഇതിന്റെ ഭാഗമായിരുന്നു. മഞ്ഞുകാലത്ത് കനത്ത മഞ്ഞുവീഴ്ച്ച അനുഭവപ്പെടുന്നതിനാല് ഇതുവഴിയുള്ള യാത്ര അപകടം പിടിച്ചതാണ്.
ചാങ് ലാ ചുരം
ലോകത്ത് ഏറ്റവും ഉയരത്തില് സ്ഥിതി ചെയ്യുന്ന മൂന്നാമത്തെ റോഡാണ് ചാങ് ലാ ചുരം വഴി കടന്നു പോകുന്ന റോഡ്. സമുദ്രനിരപ്പില് നിന്ന് 5360 മീറ്റര് ഉയരത്തിലാണ് ഈ റോഡുള്ളത്. മെയ് മുതല് ഒക്ടോബര് വരെയുള്ള കാലയളവില് വലിയ പ്രശ്നങ്ങളില്ലാതെ ഇതുവഴി കടന്നു പോകാം. എന്നാല് മഞ്ഞുകാലത്ത് അപകട സാധ്യത കൂടും. നുബ്ര താഴ്വര, പാങോങ് തടാകം തുടങ്ങിയ സ്ഥലങ്ങള് ഈ ചുരത്തിന് സമീപമാണ് സ്ഥിതി ചെയ്യുന്നത്.
സിക്കിമിലെ 100 ഹെയര്പിന് വളവുകള്
കിഴക്കന് സിക്കിമിലെ വളഞ്ഞു പുളഞ്ഞു കിടക്കുന്ന റോഡുകള് കാണാന് അതിമനോഹരമാണെങ്കിലും അപകസാധ്യതയും കൂടുതലാണ്. 100 ഹെയര്പിന് വളവുകളാണ് ഈ റോഡിലുള്ളത്. മഞ്ഞുവീഴ്ച്ചയുള്ള സമയങ്ങളില് അതിമനോഹരമായിരിക്കും റോഡിന്റെ ദൂരക്കാഴ്ച്ച. സമുദ്ര നിരപ്പില് നിന്ന് 11200 അടി ഉയരത്തിലാണ് റോഡുള്ളത്. ഇതുവഴിയുള്ള യാത്ര ആരംഭിക്കുന്നതിന് മുമ്പ് തന്നെ കാലാവസ്ഥയെക്കുറിച്ച് വ്യക്തമായ ധാരണയുണ്ടായിരിക്കണം. ഇതുവഴിയുള്ള യാത്രയ്ക്ക് പ്രത്യേകം അനുവാദവും മുന്കൂട്ടി വാങ്ങിയിരിക്കണം.
കൊല്ലിമല
സാഹസിക യാത്രികരുടെ ഇഷ്ടപ്പെട്ട സ്ഥലമാണ് തമിഴ്നാട്ടിലെ കൊല്ലിമല. 70 ഹെയര്പിന് ബെന്റുകളുള്ള ഈ റോഡിന് 47 കിലോമീറ്റര് നീളമുണ്ട്. ബൈക്ക് യാത്രികര് ധാരാളമായി എത്താറുള്ള സ്ഥലം കൂടിയാണിത്. കൊടും വളവുകളും തിരിവുകളുമുള്ളതിന് പുറമെ റോഡിലെ കുണ്ടും കുഴിയും ചേരുമ്പോള് അപകട സാധ്യത കൂടുന്നു. എന്നാല് മുകളിലെത്തിയാല് കിട്ടുന്ന മനോഹരമായ കാഴ്ച്ചയില് ഈ ബുദ്ധിമുട്ടുകളൊക്കെ മറക്കും.