'കൊളുക്കുമല' ഒരിക്കലും മിസ് ചെയ്യരുത്!

ഭൂമിയിലെ സ്വര്‍ഗ്ഗം കാണുവാൻ ആഗ്രഹിക്കുന്നെങ്കിൽ വേഗം മൂന്നാറിലേക്ക് വണ്ടിയെടുക്കുക. ലോകത്തെ ഏറ്റവും ഉയരംകൂടിയ തേയിലത്തോട്ടമായ കൊളുക്കുമലയിലേക്ക് റൂട്ട് മാറ്റുക. മൂന്നാറില്‍നിന്നും 38 കിലോമീറ്റര്‍ ദൂരെയാണ്‌ മനോഹരമായ കൊളുക്കുമല. ചിന്നക്കനാല്‍- സൂര്യനെല്ലി വഴി ജീപ്പുമാര്‍ഗമാണ്‌ കൊളുക്കുമലയില്‍ എത്താന്‍ കഴിയുക. ചെങ്കുത്തായ വളഞ്ഞു പുളഞ്ഞുപോകുന്ന ഇടുങ്ങിയ വഴിയിലൂടെയുള്ള യാത്ര ഒരിക്കലും മറക്കാനാകാത്ത അനുഭവമാണ്‌.

ഏഴായിരത്തിഒരുനൂറ്റിമുപ്പതു അടി ഉയരത്തിലാണ് കൊളുക്കുമല തേയിലത്തോട്ടം. 1930 ലാണ്‌ ഇവിടെ തമിഴ്‌നാട്‌ സ്വദേശികളായ തോട്ടമുടമകള്‍ ഫാക്‌ടറി സ്‌ഥാപിച്ചത്‌. ഇവിടെ ഉത്‌പാദിപ്പിക്കുന്ന തേയില ഉപയോഗിച്ചുണ്ടാക്കുന്ന ചായ വളരെ പ്രശസ്‌തമാണ്‌. പൂര്‍ണമായും ജൈവവളം ഉപയോഗിച്ചുള്ള കൃഷിരീതിയാണ്‌ അവലംബിച്ചിരിക്കുന്നത്‌.

ദക്ഷിണ ഭാരതത്തില്‍ രണ്ടാമതും ആനമുടിയേക്കള്‍ അമ്പതു മീറ്റര്‍ മാത്രം താഴ്ന്നതുമായ മീശപുലിമല ഈ തോട്ടത്തിലാണ്. കൊളുക്കുമലയിലെ സൂര്യോദയമാണ് ഏറ്റവും പ്രസിദ്ധവും വശീകരിക്കുന്നതുമായ കാഴ്ചകളിലൊന്ന്.

രാവിലെ 4.45, 5, മണിയോടെ പുറപ്പട്ടാൽ മാത്രമേ പ്രകൃതിയുടെ പുലര്‍കാല രമണീയതകളുമായി സൂര്യോദയം കാണുവാന്‍ കഴിയുകയുള്ളൂ. സാഹസിക യാത്ര ഇഷ്ട്ടപെടുന്നവർക്ക് കൊളുക്ക് മലയിൽ എത്താൻ ഒരുപാടു വഴികൾ ഉണ്ട് പാപ്പാത്തിചോല കൊളുക്ക് മല ട്രെക്കിംഗ് വിദേശിയരുടെ ഇഷ്ടപെട്ട പാതയാണ് . നവംബർ മുതൽ ഫെബ്രുവരി വരെ ഉള്ള തണുപ്പ് കാലം കോട മഞ്ഞു മൂടി പരസ്പരം കാണാൻ പോലും പറ്റില്ല . മഴക്കാലം അട്ടകൾ ചോര കുടിക്കാൻ ഇറങ്ങും. ഇൗ മാസങ്ങൾ ഒഴിവാക്കുന്നതാണ് നല്ലത്.