ഗോവയില്‍ പോകണ്ട; നീന്തലും വാട്ടര്‍ സ്പോര്‍ട്‍സും നടക്കില്ല

മണ്‍സൂണ്‍ മഴ എത്തിയതോടെ ഗോവയില്‍ കടല്‍ പ്രക്ഷുബ്‍ധമായി. ഇതോടെ ബീച്ചുകളിലെ നീന്തലും വാട്ടര്‍ സ്പോര്‍ട്‍സും നിര്‍ത്തിവക്കുകയാണ് ടൂറിസം അധികൃതര്‍. ഇനി സെപ്‍റ്റംബര്‍ അവസാനം വരെ ഗോവയിലെ ബീച്ചുകളില്‍ സഞ്ചാരികളെ നീന്താന്‍ അനുവദിക്കില്ല.

ഗോവയിലെ ബീച്ചുകളില്‍ രക്ഷകരായി പ്രവര്‍ത്തിക്കുന്ന ദൃഷ്‍ടി മറൈന്‍ എന്ന ലൈഫ് ഗാഡ്‍ സര്‍വീസ് ആണ് പുതിയ നിര്‍ദേശം പുറപ്പെടുവിച്ചതെന്ന് വാര്‍ത്താ ഏജന്‍സി ഐഎഎന്‍എസ്‍ റിപ്പോര്‍ട്ട് ചെയ്‍തു.

മണ്‍സൂണ്‍ നിര്‍ദേശം എന്ന നിലയിലാണ് പുതിയ മാര്‍ഗരേഖ കൊണ്ടുവന്നത്. ജൂണ്‍, ജൂലൈ, സെപ്‍റ്റംബര്‍ മാസങ്ങളില്‍ ഗോവയില്‍ മഴ കനക്കുമെന്നാണ് കരുതുന്നത്. അതുകൊണ്ട് ബീച്ചില്‍ ഇറങ്ങുന്നത് നിയന്ത്രിക്കുകയാണ് - ദൃഷ്‍ടിയുടെ ചുമതലയുള്ള രവി ശങ്കര്‍, വാര്‍ത്താ ഏജന്‍സിയോട് പറഞ്ഞു.

ഗോവയിലെ 22 ബീച്ചുകളില്‍ സുരക്ഷ ഉറപ്പുവരുത്തുന്നത് ദൃഷ്‍ടി എന്ന സ്വകാര്യ ഏജന്‍സിയാണ്. അപകട സാധ്യതയുള്ള ബീച്ചുകളില്‍ ഇവര്‍ ചുവന്ന കൊടി നാട്ടും. ഇവിടെ ആരെയും ഇറങ്ങാന്‍ അനുവദിക്കില്ല.