കശ്‍മീരില്‍ കടുത്ത ശൈത്യം; താപനില മൈനസ് 6 ഡിഗ്രി

ശ്രീനഗര്‍: ജമ്മു-കശ്‍മീരിന്‍റെ തലസ്ഥാനമായ ശ്രീനഗറില്‍ റെക്കോഡ്‍ തണുപ്പ്. കഴിഞ്ഞ 11 വര്‍ഷങ്ങള്‍ക്ക് ഇടയിലെ ഏറ്റവും താഴ്‍ന്ന താപനിലയാണ് വേനല്‍ക്കാല തലസ്ഥാനമായ ശ്രീനഗറില്‍ രേഖപ്പെടുത്തിയത്. മൈനസ് 6.8 ആണ് താപനില.

സഞ്ചാരികള്‍ ഏറെയെത്തുന്ന ദാല്‍ തടാകം ഭാഗീകമായി ഉറഞ്ഞു. വീടുകളിലേക്കുള്ള ജലസേചന പൈപ്പുകളിലും വെള്ളം ഐസ് ആയ അവസ്ഥയിലാണ്. 1934ല്‍ ഇവിടെ തണുപ്പ് മൈനസ് 12.8 ഡിഗ്രി സെല്‍ഷ്യസ്‍ എത്തിയിരുന്നു. ഇതുവരെ രേഖപ്പെടുത്തിയ ഏറ്റവും താഴ്ന്ന താപനിലയാണിത്.

സഞ്ചാരികള്‍ എത്തുന്ന ഗുല്‍മാര്‍ഗ്, അമര്‍നാഥ് തീര്‍ഥയാത്രയുടെ ബേസ് ക്യാമ്പ് പഹല്‍ഗം എന്നിവിടങ്ങളില്‍ തണുപ്പ് മൈനസ് 7.2 വരെ എത്തിയിട്ടുണ്ട്. ഈ തണുത്ത കലാവാസ്ഥ തുടരുമെന്നാണ് കാലാവസ്ഥാ നിരീക്ഷകര്‍ പറയുന്നത്.

നിലവില്‍ ശൈത്യത്തിലെ ചില്ലൈ-കലാന്‍ എന്ന സമയത്താണ് കശ്‍മീര്‍. തുടര്‍ച്ചയായി 40 ദിവസം കഠിനമായി തണുപ്പ് പ്രതീക്ഷിക്കുന്ന സമയമാണിത്. താപനില താഴുന്നതും മഞ്ഞ് പെയ്യുന്നതും ഈ കാലാവസ്ഥയില്‍ സാധാരണമാണ്.