കുട്ടവഞ്ചിയിലേറാം; കോന്നി-അടവി-ഗവി പാക്കേജ് തുടങ്ങി

കോന്നി-അടവി-ഗവി യാത്രയിലാണ് പത്തനംതിട്ടയുടെ സൗന്ദര്യം പൂർണ്ണമായി അറിയാൻ കഴിയുക. കല്ലാറിൻ്റെ ഇരുകരകളിലേയും പച്ചപ്പും ശുദ്ധവായുവുമേറ്റ് ഹൃദയ ഹാരിയായ ഒരു യാത്ര. അടവിയിലെ കുട്ടവഞ്ചി സവാരി നിങ്ങളെ വീണ്ടും ഇവിടേക്ക് എത്തിക്കും.

കുട്ടവഞ്ചി സവാരി, വള്ളക്കടവ് വൈല്‍ഡ് ലൈഫ് മ്യൂസിയം സന്ദര്‍ശനം എന്നിവ കൂടാതെ പ്രഭാതഭക്ഷണം, ഉച്ചഭക്ഷണം, വൈകുന്നേരം ലഘുഭക്ഷണം എന്നിവയും ഉൾപ്പെടുത്തിയാണ് ടൂർ പാക്കേജ് പുനരാരംഭിച്ചിരിക്കുന്നത്. 10 മുതല്‍ 15 പേര്‍ വരെയുള്ള സംഘത്തിലെ ഓരോരുത്തര്‍ക്കും 1900 രൂപയും, 16 പേരുള്ള സംഘത്തിലെ ഓരോരുത്തര്‍ക്കും 1800 രൂപയുമാണ് ടിക്കറ്റ് നിരക്ക്. രാവിലെ 7ന് കോന്നി ഇക്കോ ടൂറിസം സെൻ്ററിൽനിന്ന് ആരംഭിക്കുന്ന യാത്ര രാത്രി 9:30നാണ് അവസാനിക്കുന്നത്.

അടവിയിൽ കുട്ടവഞ്ചി സവാരി നടത്തിയ ശേഷം തണ്ണിത്തോട്, ചിറ്റാര്‍, തീതത്തോട്, ആങ്ങമൂഴി, പ്ലാപ്പള്ളി, കോരുത്തോട്, മുണ്ടക്കയം, വളഞ്ഞങ്ങാനം വെള്ളച്ചാട്ടം, കുട്ടിക്കാനം, പീരുമേട്, വണ്ടിപ്പെരിയാര്‍, വള്ളക്കടവ് വഴി ഗവിയിലെത്തും. ഗവിയില്‍ നിന്നും തിരികെ വള്ളക്കടവ്, പരുന്തുംപാറ, കുട്ടിക്കാനം, മുണ്ടക്കയം, എരുമേലി, റാന്നി, കുമ്പഴ വഴി കോന്നിയിലെത്തും. www.konniecotourism.org എന്ന കോന്നി ഇക്കോ ടൂറിസം സെൻ്റർ വെബ്‌സൈറ്റില്‍ ടിക്കറ്റ് മുന്‍കൂറായി ബുക്ക് ചെയ്യാവുന്നതാണ്