ഇല്ലിക്കൽ കല്ലിൽ സൂര്യോദയം കണ്ടാലോ!

സാഹസികരായ വിനോദസഞ്ചാരികൾക്ക് ഏറ്റവും പ്രിയപെട്ട സ്ഥങ്ങളിൽ ഒന്നാണ് ഇല്ലിക്കൽ കല്ല്‌. ഇരാറ്റുപെട്ട – തെക്കോയി – അടുക്കം റൂട്ടിൽ ആണ് നയന മനോഹരമായ ഇല്ലിക്കൽ കല്ല്‌ സ്ഥിതി ചെയ്യുന്നത്. 4000 അടി ഉയരമുള്ള ഇല്ലിക്കൽ കല്ല് മൂന്നു പാറക്കൂട്ടങ്ങൾ ചേർന്നാണുണ്ടായിരിക്കുന്നത്. ഇതിലെ ഏറ്റവും ഉയരം കൂടിയ പാറ കൂടക്കല്ല് എന്നും തൊട്ടടുത്ത് സർപ്പാകൃതിയിൽ കാണപ്പെടുന്ന പാറ കൂനൻ കല്ല് എന്നും അറിയപ്പെടുന്നു.

ഇവയ്ക്കിടയിലായി 20 അടി താഴ്ചയിൽ വലിയൊരു വിടവുണ്ട്. ഈ കല്ലിൽ അരയടി മാത്രം വീതിയുള്ള 'നരകപാലം' എന്ന ഭാഗമുണ്ട്. പ്രകൃതിരമണീയമായ ഈ സ്ഥലത്തേക്ക് പുതിയ ഒരു വഴി നിർമ്മിച്ചിട്ടുണ്ട്. വിനോദസഞ്ചാരികൾക്ക് വലിയ ആയാസം കൂടാതെ ഇനി ഇല്ലിക്കൽ കല്ലിലെത്താം. കൊടുമുടിയുടെ മുകളിൽ നിന്നും അറബിക്കടലും അവിടുത്തെ ഉദയം/അസ്തമയവും കാണാൻ കഴിയും. തലനാട് വഴിയും അയ്യമ്പാറ വഴിയും ഇല്ലിക്കൽകല്ലിലെത്താം.

3 കിലോമീറ്റർ കുത്തനെയുള്ള കയറ്റം കയറി ചെല്ലുന്ന ഈ കുന്നുകൾ, കാഴ്ച്ചയുടെയും സാഹസികതയുടെയും പുത്തൻ കിതപ്പുകളാണ് ട്രെക്കേർസിനു നൽകുന്നത്. അതുപോലെ മഴയും ഇടിമിന്നലും ഉള്ള സമയത്ത് ഇല്ലിക്കൽ യാത്ര ഒഴിവാക്കുക; തെന്നി വീഴുക മാത്രമല്ല മിന്നൽ ഏൽക്കാനുള്ള സാധ്യതയും കൂടുതലാണിവിടെ. മൺസൂണിൽ യാത്ര ഒഴിവാക്കുന്നത് നന്നായിരിക്കും. വാഗമൺ, ഇലവീഴാപൂഞ്ചിറ, വാഗമൺകുരിശുമല, തങ്ങൾപാറ എന്നിവ അടുത്തുള്ള ടൂറിസ്റ്റ് സ്പോട്ടുകളാണ്.