കിഴക്കന് ഘട്ടത്തിന്റെയും പശ്ചിമ ഘട്ടത്തിന്റെയും താഴ്വരകളിലുള്ള കാടും മലയും അവിടുത്തെ വൈവിധ്യമാര്ന്ന സസ്യജന്തുജാലങ്ങളുടെ ആവാസ കേന്ദ്രങ്ങളും കൂടാതെ വ്യത്യസ്ത സമുദ്രജീവികളും പവിഴപ്പുറ്റുകളും നിറഞ്ഞ കടല്ത്തീരങ്ങളാലും ദക്ഷിണേന്ത്യന് പ്രദേശങ്ങള് മോഹിപ്പിക്കും (Wildlife experiences in South India). 2023-ല് തീര്ച്ചയായും പര്യവേക്ഷണം ചെയ്യേണ്ട, മലയാളികള്ക്ക് വളരെ അടുത്തുള്ള ദക്ഷിണേന്ത്യയിലെ വന്യജീവി പാര്ക്കുകളുടെ വിവരങ്ങള് പങ്കുവയ്ക്കുന്നു. പുതുവര്ഷത്തില് സാഹസികതയും ആവേശവും പകരുന്ന ഈ ഇടങ്ങളെക്കുറിച്ച് അറിയാം:
Also Read: നമ്മുടെ തൊട്ടടുത്തുള്ള തമിഴ്നാട്ടിലെ ഈ എട്ട് ദ്വീപുകളിലേക്ക് ഒരു യാത്ര പോയാലോ?
ഗള്ഫ് ഓഫ് മാന്നാര് മറൈന് നാഷണല് പാര്ക്ക്
തമിഴ്നാട്ടിലെ തൂത്തുക്കുടിക്കും ധനുഷ്കോടിക്കുമിടയില് 160 കിലോമീറ്റര് നീളത്തിലാണ് ഈ ദേശീയോദ്യാനം സ്ഥിതി ചെയ്യുന്നത്. തീരത്ത് നിന്നും ഒന്ന് മുതല് പത്ത് കിലോമീറ്റര് വരെ അകലത്തിലായി ഇന്ത്യന് മഹാസമുദ്രത്തില് സ്ഥിതിചെയ്യുന്ന 21 ദ്വീപുകളും പവിഴപ്പുറ്റ് പ്രദേശങ്ങളും ഉള്പ്പെടുന്നതാണ് ഗള്ഫ് ഓഫ് മാന്നാര് മറൈന് നാഷണല് പാര്ക്ക്. ഈ ദ്വീപുകള് സന്ദര്ശിക്കാന് പ്രത്യേകം അനുമതി വാങ്ങേണ്ടതുണ്ട്. രാമേശ്വരത്ത് നിന്ന് ഗ്ലാസ് ബോട്ടില് ഈ പ്രദേശങ്ങളിലേക്ക് പോകാം. വ്യത്യസ്തമായ കടല്ജീവികളെയും വര്ണ്ണാഭമായ പവിഴപ്പുറ്റുകളും പോലെയുള്ള സമ്പന്നമായ സമുദ്രജീവിതം ആസ്വദിക്കാന് ഈ യാത്രയില് സാധിക്കും.
നാഗര്ഹോള നാഷണല് പാര്ക്ക് & ടൈഗര് റിസര്വ്
കര്ണാടകയിലെ കൊടക്, മൈസൂര് ജില്ലകളിലുള്പ്പെടുന്ന നാഗര്ഹോള ദേശീയോദ്യാനവും കടുവ സങ്കേതവും ബന്ദിപ്പൂര് ദേശീയോദ്യാനത്തിനടുത്താണ് സ്ഥിതി ചെയ്യുന്നത്. ഈ ദേശീയോദ്യാനം ഒരു ആനസംരക്ഷണ കേന്ദ്രവും കൂടിയാണ്, രാജീവ്് ഗാന്ധി നാഷണല് പാര്ക്ക് എന്നും ഇന്ന് അറിയപ്പെടുന്നുണ്ട്. ആന, കടുവ, പുള്ളിപ്പുലി, ഗൗര്, കഴുതപ്പുലി, കരടി, കുരങ്ങന്, പെരുമ്പാമ്പ്, മഗ്ഗര് മുതല തുടങ്ങിയ മൃഗങ്ങളും 250-ലധികം പക്ഷിയിനങ്ങളുടെയും പ്രധാന ആവാസ കേന്ദ്രമാണ് നാഗര്ഹോള നാഷണല് പാര്ക്ക്. നിരവധി സുന്ദരമായ ചെറുപുഴകള് കടന്നുപോകുന്ന ഈ പ്രദേശത്തിന്റെ വിസ്തൃതി 643 ചതുരശ്ര കിലോമീറ്ററാണ്.
സൈലന്റ് വാലി നാഷണല് പാര്ക്ക്
പാലക്കാട് ജില്ലയില് പശ്ചിമഘട്ടത്തില് സ്ഥിതി ചെയ്യുന്ന ഒരു ദേശീയോദ്യാനമാണിത്. വംശനാശഭീഷണി നേരിടുന്ന സിംഹവാലന് മക്കാക്ക് ഏറ്റവും കൂടുതല് കാണപ്പെടുന്ന സ്ഥലമാണ് സൈലന്റ് വാലി നാഷണല് പാര്ക്ക്. നിബിഡ വനങ്ങളുള്ള സൈലന്റ് വാലി ദേശീയോദ്യാനം ഒരു മഴക്കാടുകളാല് സമ്പന്നമാണ്. നിരവധി സസ്യജാലങ്ങളുടെ ആവാസ കേന്ദ്രവുമായ ഇവിടുത്തെ മലബാര് മഴക്കാടുകളില് നിന്ന് ഏകദേശം 1000 സസ്യവംശങ്ങളെ കണ്ടെത്തിയിട്ടുണ്ട്. 108 ഇനം ഓര്ക്കിഡുകള് ഉള്പ്പടെയുള്ള 966 ഇനം സസ്യങ്ങള്, 170 ഇനം പക്ഷികള്, 100 ഇനം ചിത്രശലഭങ്ങള്, 400 ഇനം മറ്റു ശലഭങ്ങള്, ചെറുജീവികള് ഒക്കെ ഇവിടെ കാണുന്നു.
Also Read: തനത് ക്രിസ്മസ് ആഘോഷങ്ങള്ക്ക് ഇതിലും മികച്ച സ്ഥലങ്ങള് ഇന്ത്യയിലുണ്ടാവില്ല!
പെരിയാര് നാഷണല് പാര്ക്ക് & ടൈഗര് റിസര്വ്
വര്ഷം മുഴുവനും തുറന്നിരിക്കുന്ന ഇന്ത്യയിലെ ചുരുക്കം ചില ദേശീയ ഉദ്യാനങ്ങളിലൊന്നാണ് കേരളത്തിലെ പെരിയാര് നാഷണല് പാര്ക്ക് & ടൈഗര് റിസര്വ്. കടുവകളുടെ സംരക്ഷണത്തിനായിട്ടുള്ള ഇന്ത്യയിലുള്ള 27 പ്രദേശങ്ങളിലൊന്നാണിത്. ആന സംരക്ഷണ പദ്ധതിയുടെ കീഴിലുള്ള പ്രദേശം കൂടിയാണിത്. കടുവകള്, ആനകള്, മക്കാക്കുകള്, ധോളുകള്, നീലഗിരി താറുകള്, സ്ലോത്ത് കരടികള് എന്നിങ്ങനെ വിവിധ ജന്തുജാലങ്ങളിവിടെയുണ്ട്. 62 ഇനം സസ്തനികള്, 320 ഇനം പക്ഷികള്, 45 ഇനം ഉരഗങ്ങള്, 27 ഇനം ഉഭയജീവികള്, 38 ഇനം മത്സ്യങ്ങള്, 160 ഇനം ചിത്രശലഭങ്ങളും ഈ മേഖലയിലുണ്ട്.
ബന്ദിപ്പൂര് നാഷണല് പാര്ക്ക്
മൈസൂരിലെ രാജകുടുംബങ്ങളുടെ ഒരു ജനപ്രിയ വേട്ടയാടല് കേന്ദ്രമായിരുന്ന കര്ണാടകയിലെ ബന്ദിപ്പൂര് ദേശീയോദ്യാനം. ഇപ്പോള് ഇന്ത്യയിലെ ഏറ്റവും കൂടുതല് ആളുകള് സന്ദര്ശിക്കുന്ന ദേശീയ ഉദ്യാനങ്ങളിലൊന്നാണിത്. നീലഗിരി ബയോസ്ഫിയര് റിസര്വില്പ്പെട്ട ഈ പ്രദേശം പ്രോജക്ട് ടൈഗറിനു കീഴിലുള്ള കടുവ സംരക്ഷണ കേന്ദ്രം കൂടിയാണ്. ഏകദേശം 874 ചതുരശ്ര കിലോമീറ്ററുള്ള ഈ പ്രദേശം ലംഗൂര്, ബോണെറ്റ് മക്കാക്ക് എന്നീ കുരങ്ങുകള്, കടുവ, പുലി, ആന, വരയന് കഴുതപ്പുലി, കുറുക്കന്, പുള്ളിമാന്, കാട്ടുപന്നി, ഇന്ത്യന് മുയല്, മഗ്ഗര് മുതല എന്നിങ്ങനെ വിവിധ ജീവികളെയും 180-ഓളം ഇനം പക്ഷികളെയും കാണാം.
ഇരവികുളം നാഷണല് പാര്ക്ക്
ഒരുകാലത്ത് ബ്രിട്ടീഷ് ഉദ്യാഗസ്ഥരുടെ പ്രിയപ്പെട്ട വേട്ടയാടല് കേന്ദ്രമായിരുന്നു ഇടുക്കിയിലെ ഇരവികുളം. 1975-ല് ഈ പ്രദേശം സംരക്ഷിത സങ്കേതമായി പ്രഖ്യാപിച്ചു. വംശനാശഭീഷണി നേരിടുന്ന നീലഗിരി താറിന്റെ (വരയാട്) ആസ്ഥാനമാണ് ഇപ്പോള് ഈ പാര്ക്ക്. പശ്ചിമഘട്ട നിരകളില് 2000 മീറ്റര് ഉയരത്തില് സ്ഥിതിചെയ്യുന്ന ഈ പ്രദേശം കേരളത്തിലെ ഏറ്റവും ഉയരത്തിലുള്ള ദേശിയോദ്യാനമാണ്. പുല്മേട്, കുറ്റിച്ചെടി, ചോലവനം എന്നിങ്ങനെ വ്യത്യസ്തമായ സസ്യജാലങ്ങള് ഇവിടെ കാണാം. വരയാടുകള് കൂടാതെ സിംഹവാലന് കുരങ്ങ് ഉള്പ്പെടെയുള്ള വിവിധ ഇനം കുരങ്ങുകള്, മാന്, കാട്ടുപോത്ത്, ആന തുടങ്ങിയ ജീവികള് ഇവിടെയുണ്ട്.