ഉംപുന് ചുഴലിക്കാറ്റിന്റെ പശ്ചാത്തലത്തില് മൂന്ന് ശ്രമിക് സ്പെഷ്യല് ട്രെയിനുകള് മഹാരാഷ്ട്ര റദ്ദാക്കി. ഒഡീഷയിലേക്കും ബംഗാളിലേക്കുമുള്ള ട്രെയിനുകളാണ് റദ്ദാക്കിയത്. മെയ് 21 വരെ ട്രെയിനുകള് ഓടില്ല. സൂപ്പര് സൈക്ലോണ് ഉംപുന് ബാധിക്കാന് സാധ്യതയുള്ളതിനാല് തീരം തൊടുന്നതിന് മുമ്പ് തന്നെ റെയില്വേ തീരുമാനമെടുത്തു.
ശ്രമിക് തീവണ്ടികള്
ലോക്ക്ഡൗണിലായ ഡെയിലി വേജസുകാരെയും അതിഥി തൊഴിലാളികളെയും സ്വന്തം നാടുകളിലെത്തിക്കുക എന്ന ഉദേശത്തോടെയാണ് ഇന്ത്യന് റെയില്വേ ശ്രമിക് ട്രെയിനുകളുടെ സര്വീസ് ഇന്ത്യയിലെ പ്രധാന റൂട്ടുകളില് ആരംഭിച്ചത്. വെസ്റ്റ് ബംഗാള്, ഒഡീഷ സര്ക്കാരുകളും രണ്ട് ദിവസം കഴിഞ്ഞ് ശ്രമിക് തീവണ്ടികളുടെ സര്വീസ് പുനരാരംഭിക്കാന് അനുമതി നല്കി.
ഒരു ട്രെയിന് വെസ്റ്റ് ബംഗാളിലേക്കും രണ്ടെണ്ണം ഒഡീഷയിലേക്കുമാണ് സര്വീസ് നടത്താനിരുന്നത്. ഉംപുന് ചുഴലിക്കാറ്റ് ശക്തിപ്രാപിച്ച സാഹചര്യത്തില് റെയില്വേ അവസരോചിതമായി തീരുമാനമെടുക്കുകയായിരുന്നു.
Also Read: 'രാമനെ വേണ്ട, രാവണനെ മതി'; ഇന്ത്യയില് രാവണനെ ആരാധിക്കുന്നുണ്ടോ?
1500 മുതല് 1600 യാത്രക്കാരെ വരെ ഉള്ക്കൊള്ളാന് കഴിയുന്നതാണ് ശ്രമിക് ട്രെയിന് സര്വീസുകള്. യാത്രക്കാര് റെയില്വേ സ്റ്റേഷനുകളിലേക്ക് കൂട്ടമായി ഒഴുകിയെത്തരുതെന്നും റെയില്വേ ആവശ്യപ്പെട്ടിട്ടുണ്ട്. കൊവിഡ് 19 ഭീതി നിലനില്ക്കുന്നതിനാല് സാമൂഹിക അകലം പാലിക്കുന്നതിന്റെ ഭാഗമായാണ് ഇത്തരത്തില് നിര്ദേശം നല്കിയിരിക്കുന്നത്. ഉംപുന് ചുഴലിക്കാറ്റിന്റെ തീവ്രത മനസ്സിലാക്കിയതിന് ശേഷം ശ്രമിക് ട്രെയിനുകളുടെ സര്വീസ് വീണ്ടും ഷെഡ്യൂള് ചെയ്യും.