സ്ട്രീറ്റ് ഫുഡ് വിഭവങ്ങളിലെ രാജാവാണ് മോമോസ്. ചിക്കന്, ബീഫ്, വെജിറ്റബിള് എന്നിവയില് ഏതെങ്കിലും ഒന്ന് നിറച്ച ആവി പറക്കുന്ന മോമോസ് വഴിയോര കടകളില് നിന്ന് വൈകുന്നേരങ്ങളില് വാങ്ങി കഴിക്കുമ്പോള് ലഭിക്കുന്ന ഫീല് ഒന്ന് വേറെ തന്നെയായിരിക്കും. വഴിയോരങ്ങളില് മാത്രമല്ല മുന്നിര റെസ്റ്ററന്റുകളിലും ഈ വിഭവം ലഭിക്കും. മോമോസിന് മാത്രമായും റെസ്റ്ററന്റുകള് പ്രവര്ത്തിക്കുന്നത് കാണാന് കഴിയും. എന്നാല് മൂന്ന് മോമോകള് ചേരുന്ന അത്ര വലിപ്പത്തിലുള്ള മോമോസ് കഴിച്ചിട്ടുണ്ടോ. മോമോസിന്റെ മുതിര്ന്ന ചേട്ടനായ ഈ വിഭവത്തിന്റെ പേര് തായ്പോ എന്നാണ്. ഈ തായ്പോ എവിടെ ലഭിക്കുമെന്നറിയാമോ?
എവിടെ ലഭിക്കും?
മോമോയുടെ വലിയ സഹോദരന് തായ്പോയെക്കുറിച്ച് നിങ്ങള്ക്കെന്തൊക്കെ അറിയാം? ഇത് മോമോയുടെ ഭീമാകാരമായ ഒരു ഹൈബ്രിഡ് രൂപമാണ് എന്നൊക്കെ വേണമെങ്കില് വിശേഷിപ്പിക്കാം. ഇതിന് ശരാശരി മോമോയുടെ മൂന്നിരട്ടി വലിപ്പം വരും. ഇന്ത്യയുടെ വടക്കുകിഴക്കന് ഭാഗങ്ങളില്, പ്രത്യേകിച്ച് സിക്കും വഴി യാത്ര ചെയ്തിട്ടുള്ളവര്ക്ക് ഈ തായ്പോ എന്താണെന്ന് നന്നായി അറിയാമായിരിക്കും. അവിടത്തെ എല്ലാ ഹോട്ടലുകളിലും നിങ്ങള്ക്ക് ചൂട് തായ്പോ ലഭിക്കും. സ്ട്രീറ്റ് ഫുഡായും ഹോട്ടലിലെ പ്രധാന വിഭവമായുമൊക്കെ നിങ്ങള്ക്ക് ഈ വിഭവം ലഭിക്കും.
എവിടെ നിന്ന് വന്നു?
മോമോസിന്റെ ജ്യേഷ്ഠ സഹോദരനായ തായ്പോ എവിടെ നിന്ന് വന്നുവെന്ന് ചിന്തിച്ചിട്ടുണ്ടോ. ഒരു ജനപ്രിയ തിബറ്റന് വിഭവമാണിത്. തിബറ്റില് നിന്നുള്ളവര് ഇന്ത്യയുടെ വടക്കുകിഴക്കന് ഭാഗങ്ങളില് കുടിയേറിത്തുടങ്ങിയപ്പോള് അവിടെ നിന്നുള്ള ഭക്ഷണവിഭവങ്ങളും ഇന്ത്യക്കാര് പരിചയപ്പെട്ടു തുടങ്ങി. അതില് പ്രധാനമായ ഒന്നാണ് തായ്പോ. വടക്കുകിഴക്കന് സംസ്ഥാനങ്ങളിലെ മിക്ക ഹോട്ടലുകളിലും ഈ വിഭവങ്ങള് മെനുവില് ഇടംപിടിച്ചു. പരമ്പരാഗത തിബറ്റന് പലഹാരങ്ങള് വിളമ്പുന്ന നിരവധി റെസ്റ്ററന്റുകള് ഈ ഭാഗത്ത് നിലവില് വരാന് തുടങ്ങി. ഇന്ന് നൂറു കണക്കിന് റെസ്റ്ററന്റുകള് പ്രവര്ത്തിക്കുന്നു. സിക്കിം അടക്കമുള്ള സംസ്ഥാനങ്ങളിലേക്ക് യാത്ര പോകുന്നവര്ക്ക് പരമ്പരാഗത തിബറ്റന് വിഭവങ്ങള് പരിചിതമായിരിക്കും. ഹോട്ടലുകളില് മറ്റ് വിഭവങ്ങള് ലഭിക്കുകയുമില്ല. വിവിധതരം ഫില്ലിംഗുകളുള്ള തായ്പോ നിങ്ങള്ക്ക് ലഭിക്കും. കൂടാതെ ഈ പ്രദേശത്ത് താമസിക്കുന്ന എല്ലാ നേപ്പാളി, ഭൂട്ടിയ, ലെപ്ച വിഭാഗത്തില് പെട്ടവര്ക്ക് അവരുടേതായ ഫില്ലിംഗുകളുണ്ടാകും. ചുരുക്കം പറഞ്ഞാല് പല രുചിളിലുള്ള തായ്പോകള് ഇവിടങ്ങളില് നിന്ന് പരീക്ഷിച്ചു നോക്കാവുന്നതാണ്. സസ്യഭുക്കുകളായിട്ടുള്ളവര്ക്ക് പച്ചക്കറികള് ചേര്ത്തുള്ള തായ്പോയും തയ്യാറാക്കിയെടുക്കാം.
Also read: സന്ധ്യ ആയാല് ഭക്തര്ക്ക് പ്രവേശനമില്ലാത്ത ക്ഷേത്രം
എന്താണ് വ്യത്യാസം?
മൂന്ന് മോമോകള് ചേരുന്ന വലിപ്പമാണ് ഒരു തായ്പോയ്ക്കെന്നാണ് പൊതുവെ പറയാറുള്ളത്. എന്നാല് ഒരു തായ്പ്പോ കഴിച്ചാല് അത് അഞ്ച് മോമോസ് കഴിച്ചതിന് തുല്യമായിരിക്കുമെന്ന് ചിലര് പറയാരുണ്ട്. അത്യാവശ്യം വിശപ്പു മാറാന് ഇത് ഒരെണ്ണം കഴിച്ചാല് മതിയത്രെ. എന്നാല് ഇവ രണ്ടും തമ്മില് ചില വ്യത്യാസങ്ങളുണ്ട്. പ്രധാന വ്യത്യാസങ്ങള് ഘടനയിലും ഘടകത്തിലുമുണ്ട്. മോമോസില് നിന്ന് വ്യത്യസ്തമായി തായ്പോയ്ക്ക് പരന്ന അടിഭാഗമാണുള്ളത്. വലിയ ഫില്ലിംഗുകള് ഉള്ളതിനാല് വ്യത്യാസം വലുപ്പത്തില് ദൃശ്യമാകും. വെളുത്തുള്ളി ചട്നിയോ ടൊമാറ്റോ സോസോ ഉപയോഗിച്ച് വിളമ്പാം. വയറു നിറയാന് ഒരെണ്ണം കഴിച്ചാല് മതിയാകും. അഞ്ച് മോമോസ് കഴിക്കുന്നതിന് തുല്യമാണ് ഒരു തായ്പോ എന്നാണ് പൊതുവെ പറയപ്പെടുന്നത്.
Also read: നാഗ്പൂർ മാത്രമല്ല; ഓറഞ്ച് വിളയുന്ന മറ്റൊരു സ്വര്ഗം കൂടിയുണ്ട്
ആവശ്യക്കാര് കൂടുതല്
മോമോസ് പോലെ ജനപ്രിയമല്ല തായ്പോ. ഇന്ത്യയുടെ വടക്കുകിഴക്കന് ഭാഗങ്ങളില് മാത്രമായി പരിമിതപ്പെട്ടിരിക്കുകയാണ് ഇത്. എന്നിരുന്നാലും തായ്പോയ്ക്ക് ആവശ്യക്കാര് കൂടുതലാണ്. നോര്ത്ത് ഈസ്റ്റിലെ വിദ്യാര്ത്ഥികളുടെ പ്രിയപ്പെട്ട ലഘുഭക്ഷണം കൂടിയാണ്. ഇതുപോലെ പലരും പ്രഭാതഭക്ഷണമാക്കാന് ഇഷ്ടപ്പെടുന്നു. ആവിയില് തയ്യാറാക്കിയ ഈ വിഭവത്തിന് നല്ല പോഷകഗുണങ്ങളുമുണ്ട് എന്നതാണ് പ്രത്യേകത. പച്ചക്കറികള്, മാംസം, മുട്ട എന്നിവ നിറയ്ക്കുന്ന തായ്പോയ്ക്ക് ആരാധകരേറെയുണ്ട്. അതിനാല്, നിങ്ങള് എപ്പോഴെങ്കിലും സിക്കിമോ ഇന്ത്യയുടെ വടക്കുകിഴക്കന് ഭാഗങ്ങള് സന്ദര്ശിക്കുകയോ ചെയ്യുകയാണെങ്കില് മോമോസിന്റെ ജ്യേഷ്ഠന് എന്നറിയപ്പെടുന്ന തായ്പോ രുചിച്ചു നോക്കാം.