ശിശുദിനാശംസകൾ: കുട്ടികളുടെ യാത്ര അടിപൊളിയാക്കാം ഇക്കാര്യങ്ങള്‍ ശ്രദ്ധിച്ചാല്‍
കുട്ടികളുമായി യാത്ര ചെയ്യുമ്പോള്‍ ചില കാര്യങ്ങള്‍ ശ്രദ്ധിക്കണം. അവരുടെ അഭിപ്രായം മാനിച്ച് അവര്‍ക്ക് ഇഷ്ടമുള്ള സ്ഥലങ്ങളിലേക്ക് വേണം പോകാന്‍. എന്നാല്‍ ചില കാര്യങ്ങളില്‍ നിയന്ത്രണം വേണം.
Samayam Malayalam 14 Nov 2019, 1:01 pm
കാടുകളും കാട്ടരുവികളും താണ്ടിയുള്ള യാത്രകള്‍ മുതിര്‍ന്നവരെപ്പോലെ കുട്ടികള്‍ക്ക് ഇഷ്ടപ്പെട്ടെന്ന് വരില്ല. അവരുടെ യാത്ര അവര്‍ കൂടുതല്‍ 'കളറാ'ക്കുവാനാണ് ആഗ്രഹിക്കുന്നത്. അല്‍പ്പം അടിപൊളിയായിരിക്കണം അവരുടെ യാത്രകള്‍. പോകുന്ന സ്ഥലങ്ങളിലെ ഷോപ്പിംഗ് മേഖലകളില്‍ അവരുടെ കണ്ണുടക്കും. ഭക്ഷണവിഭവങ്ങളുടെ കാര്യത്തിലും കളിപ്പാട്ടങ്ങളുടെ കാര്യത്തിലുമൊക്കെ അവര്‍ നിര്‍ബന്ധം പിടിച്ചെന്നു വരും. അവരെ വാശിപിടിപ്പിച്ചാല്‍ ട്രിപ്പിന്റെ നിറംതന്നെ മങ്ങും. കുട്ടകളുമായി യാത്ര തിരിക്കുമ്പോള്‍ അറിയേണ്ട ചില കാര്യങ്ങള്‍.
ഇഷ്ടമുള്ള സ്ഥലം തെരഞ്ഞെടുക്കാം
യാത്ര തിരിക്കുന്നതിന് മുമ്പ് അവര്‍ക്ക് ആസ്വദിക്കാന്‍ കഴിയുന്ന സ്ഥലങ്ങളിലേക്കാണോ പോകാന്‍ ഉദേശിക്കുന്നതെന്ന് ഉറപ്പു വരുത്തണം. മുതിര്‍ന്നവരുടെ മനസല്ല അവര്‍ക്ക് എന്ന ബോധ്യമുണ്ടാകണം. മൃഗശാല, പാര്‍ക്ക്, ബീച്ച് തുടങ്ങിയ സ്ഥലങ്ങളായിരിക്കും കുട്ടികള്‍ക്ക് കാണാനിഷ്ടം. അതൊക്കെ മുന്നില്‍കണ്ട് ട്രിപ്പില്‍ അത്തരം സ്ഥലങ്ങള്‍ കൂടി ഉള്‍പ്പെടുത്തണം. അല്ലാത്തപക്ഷം ട്രിപ്പ് ആകെ മൊത്തം അവര്‍ക്ക് ബോറാകും. അക്ഷമരാകുന്ന കുട്ടികള്‍ ആ യാത്ര വെറുക്കും. ചെറിയ ചെറിയ കാര്യങ്ങളിലായിരിക്കും അവര്‍ക്ക് അത്ഭുതം തോന്നുക. അത് രക്ഷകര്‍ത്താക്കള്‍ മനസിലാക്കി അവസരോചിതമയി കാര്യങ്ങള്‍ തീരുമാനക്കണം.
Also read: അന്ന് ട്രെയിനിലിരുന്ന് കണ്ട ഒരു സാധാരണ തുരുത്ത്; ഇന്ന് അത്ഭുതങ്ങളുടെ പച്ചക്കലവറ
എന്തൊക്കെ വേണമെന്ന് തീരുമാനിക്കുക
കുട്ടികള്‍ക്ക് യാത്രാവേളകളില്‍ വേണ്ട സാധനങ്ങള്‍ എന്തൊക്കെയന്ന് കൃത്യമായി മനസിലാക്കുകയാണ് ആദ്യം വേണ്ടത്. ഇതനുസരിച്ച് വേണം പാക്കിംഗ് നടത്താന്‍. ഓരോ പ്രായത്തിലുമുള്ള കുട്ടികള്‍ക്ക് ഓരോ ആവശ്യങ്ങളുണ്ടാകും. പിഞ്ചുകുഞ്ഞുങ്ങള്‍ക്ക് യാത്രകളില്‍ ധാരാളം ഡയപ്പറുകള്‍ വേണ്ടി വരും. ഇതിന് പുറമെ വെറ്റ് വൈപ്സും കരുതുന്നത് നല്ലതായിരിക്കും. ഓരോ തവണ ഡയപ്പര്‍ മാറുമ്പോഴും വൈപ്സ് ഉപയോഗിച്ച് തുടക്കണം. അണുബാധ ഉണ്ടാവാതിരിക്കാനാണിത്.
കുട്ടികള്‍ക്കായി പ്രത്യേകം ഒരു ബാഗ് കരുതുന്നതും നല്ലതായിരിക്കും. കുട്ടികള്‍ക്കായുള്ള ബാഗ് വിപണിയില്‍ ധാരാളം ലഭിക്കും. അല്‍പ്പം മുതിര്‍ന്ന കുട്ടിയാണെങ്കില്‍ അവരുടെ തോളില്‍ തന്നെ ബാഗ് ഇട്ടുകൊടുക്കാം. എന്നാല്‍ കുട്ടിക്ക് താങ്ങാനാവുന്ന ഭാരമേ ഉണ്ടാകാവൂ. അധികഭാരമായാല്‍ കുട്ടികള്‍ കൂടുതല്‍ നടക്കേണ്ട സാഹചര്യം വരുമ്പോള്‍ പെട്ടെന്ന് തളര്‍ന്നപ പോകും. ഇത് യാത്രയുടെ രസം തന്നെ പൂര്‍ണമായും നശിപ്പിക്കും. അനാവശ്യ സാധനങ്ങള്‍ ഈ ബാഗില്‍ ഉള്‍പ്പെടുത്താതിരിക്കാന്‍ ശ്രദ്ധിക്കുക.
മരുന്നുകള്‍ മറക്കരുത്
മരുന്ന് കഴിക്കുന്ന കുട്ടിയാണെങ്കില്‍ പോകുന്ന വഴിയില്‍ മരുന്ന് വാങ്ങാമെന്ന് ഒരിക്കലും കരുതരുത്. ഡോക്ടര്‍ എഴുതി നല്‍കിയ മരുന്നു തന്നെ കിട്ടിക്കൊള്ളണമെന്നില്ല. ദീര്‍ഘദൂരം യാത്ര ചെയ്യുമ്പോള്‍ കുട്ടികള്‍ക്ക് അസുഖങ്ങള്‍ വരാനുള്ള സാധ്യതയുണ്ട്. പനി, ചുമ, ഛര്‍ദ്ദി തുടങ്ങിയവ വരികയാണെങ്കില്‍ പ്രതിരോധിക്കാന്‍ ഒരു ഡോക്ടറുടെ നിര്‍ദേശപ്രകാരമുള്ള മരുന്നുകള്‍ കരുതുക. പല കാലാവസ്ഥകളിലൂടെ സഞ്ചരിക്കുമ്പോള്‍ കുട്ടിക്ക് അസൗകര്യങ്ങളുണ്ടാകാം. ഇതു കൂടാതെ പുറത്തു നിന്നുള്ള ഭക്ഷണം കഴിക്കുമ്പോള്‍ ഛര്‍ദ്ദി അടക്കമുള്ളവയും വരാം. എന്തെങ്കിലും അസുഖത്തിന് സ്ഥിരമായി മരുന്ന് കഴിക്കുന്ന കുട്ടിയാണെങ്കില്‍ ആ മരുന്നുകള്‍ മറക്കാതെ പാക്ക് ചെയ്ത് വയ്ക്കുക. അലര്‍ജി, തുമ്മല്‍, ചുമ, വയറു വേദന തുടങ്ങിയവയ്ക്കുള്ള മരുന്നുകളും പാക്ക് ചെയ്യുന്ന സാധനങ്ങളോടൊപ്പം ഉള്‍പ്പെടുത്താന്‍ മറക്കരുത്. ഇതിന് പുറമെ ഫസ്റ്റ് എയ്ഡ് മരുന്നുകള്‍ അടങ്ങുന്ന കിറ്റ് കൂടി കരുതിയാല്‍ നന്നായിരിക്കും. എപ്പോഴാണ് ആവശ്യം വരുന്നതെന്ന് പറയാന്‍ കഴിയില്ല. കുട്ടികള്‍ കൂടെയുള്ളതല്ലെ, റിസ്‌ക് എടുക്കാന്‍ കഴിയില്ലല്ലോ.
Also read: ആനകളുമായി അടുത്തിടപഴകാം, ഒപ്പം കേരളത്തിലെ 'ഹൊഗനക്കലില്‍' കുട്ടവഞ്ചി സവാരിയും നടത്താം
കളിപ്പാട്ടവും കൊണ്ടുപോകാം
കുട്ടി വീട്ടില്‍ സ്ഥിരമായി കളിക്കാനിഷ്ടപപ്പെടുന്ന കളിപ്പാട്ടം പറ്റുമെങ്കില്‍ യാത്രയിലും കരുതുക. എന്നാല്‍ വലിപ്പം കൂടിയ കളിപ്പാട്ടങ്ങള്‍ ഒഴിവാക്കുക. ശബ്ദം പുറപ്പെടുവിക്കുന്ന തരത്തിലുള്ള കളിപ്പാട്ടങ്ങളും ഒഴിവാക്കാം. ഊതി വീര്‍പ്പിക്കുന്ന തരത്തിലുള്ള റബ്ബര്‍ പാവകള്‍ കൊണ്ടു പോകാം. ഇതിന് വലിയ സ്ഥലം വേണ്ടി വരില്ല എന്നതാണ് പ്രത്യേകത. സ്വിമ്മിംഗ് പൂളിലും മറ്റുമൊക്കെ ഇറങ്ങുമ്പോള്‍ ഇത്തരം പാവകളുമൊത്ത് കുട്ടികള്‍ക്ക് കളിക്കാം. ചെറുതായി മടക്കി വയ്ക്കാവുന്ന കുട്ടികളുടെ ടെന്റുണ്ടെങ്കില്‍ അതും കരുതാം. പാര്‍ക്കുകളിലും മറ്റുമൊക്കെ സമയം ചെലവഴിക്കുമ്പോള്‍ ഉപകാരപ്പെടും.
പടം വരയ്ക്കാനിഷ്ടമില്ലാത്ത കുട്ടികളുണ്ടാവില്ല. യാത്രയ്ക്കായി സാധനങ്ങള്‍ പാക്ക് ചെയ്യുമ്പോള്‍ ക്രെയോണ്‍സും കളര്‍ പെന്‍സിലും പോപ്പറുമൊക്കെ ഉണ്ടെങ്കില്‍ അവയും എടുക്കുക. ഹോട്ടലുകളില്‍ മുറിയെടുക്കുന്ന സന്ദര്‍ഭങ്ങളില്‍ ഇവ കുട്ടിക്ക് കൊടുക്കുകയാണെങ്കില്‍ കുറച്ചു സമയമെങ്കിലും പടം വരയ്ക്കുന്നതില്‍ മുഴുകിയിരുന്നുകൊള്ളും. പുസ്തകങ്ങള്‍ വായിക്കാനും ചിത്രങ്ങള്‍ കാണാനും ഇഷ്ടമുള്ള കുട്ടിയാണെങ്കില്‍ അവര്‍ക്കിഷ്ടപ്പെട്ട കഥാപുസ്തകങ്ങളും യാത്രയില്‍ കരുതാം.
Also read: യാത്ര തിരിക്കുമ്പോള്‍ വേറെ എന്തു മറന്നാലും ഈ സാധനങ്ങള്‍ കൈയില്‍ കരുതാന്‍ മറക്കരുത്
ആഗ്രഹങ്ങള്‍ സാധിച്ചു കൊടുക്കാം, നിയന്ത്രണം വേണം
യാത്രാവേളകളില്‍ കുട്ടികളെ ഏറ്റവും കൂടുതല്‍ ആകര്‍ഷിക്കുന്നത് വഴിയിരികില്‍ കാണുന്ന കളപ്പാട്ടങ്ങളും ഐസ്‌ക്രീം അടക്കമുള്ള ഭക്ഷണവിഭവങ്ങളുമാണ്. വിവിധ നിറത്തിലും രൂപത്തിലുമുള്ള ഇത്തരം പരഹാരങ്ങളില്‍ ആകൃഷ്ടരാകുന്ന കുട്ടികള്‍ അവ വാങ്ങിത്തരാന്‍ പിടിവാശി കാണിക്കും. വഴിയരികിലെ കച്ചവടക്കാരുടെ ലക്ഷ്യവും അതു തന്നെയാണ്. മധുരപലഹാരങ്ങളായിരിക്കും ഇതിലേറെയും. കുട്ടികളുടെ മനശാസ്ത്രം അറിഞ്ഞു കൊണ്ടുള്ള കച്ചവടരീതി. തുറന്നിരിക്കുന്ന ഇത്തരം പലഹാരങ്ങള്‍ വാങ്ങി നല്‍കുന്നതിന് മുമ്പ് രക്ഷകര്‍ത്താക്കള്‍ ഒരിക്കല്‍ കൂടി ചിന്തിക്കണം. ഗുണനിലവാരമില്ലാത്ത ആഹാരവും പാനീയങ്ങളും വാങ്ങിക്കാടുക്കാതിരിക്കുക. പല തരം അസുഖങ്ങള്‍ പിടിപെടാന്‍ സാധ്യതയുണ്ട്. ഇത് ഒഴിവാക്കാന്‍ കുട്ടിയെ പറഞ്ഞു മനസിലാക്കുകയോ അവരുടെ ശ്രദ്ധ തിരിച്ചു വിടുകയോ ചെയ്യാവുന്നതാണ്. പിടിവാശിക്ക് വഴങ്ങിയാല്‍ അത് ട്രിപ്പിനെ തന്നെ ബാധിക്കും. കുട്ടികള്‍ക്ക് ഇഷ്ടമുള്ള ലക്ഷുഭക്ഷണങ്ങള്‍ യാത്രയില്‍ കരുതുകയാണ് മറ്റൊരു മാര്‍ഗം.
തിരക്കുള്ള സ്ഥലങ്ങളില്‍ കരുതല്‍ വേണം
ആയിരങ്ങള്‍ വന്നെത്തുന്ന സ്ഥലങ്ങളിലേക്ക് യാത്ര ചെയ്യുമ്പോള്‍ കുട്ടികളുടെ കാര്യത്തില്‍ നല്ല ശ്രദ്ധ വേണം. തീര്‍ത്ഥാടന കേന്ദ്രങ്ങളിലാണ് പ്രധാനമായും വേണ്ടത്. സ്വര്‍ണം അടക്കമുള്ള വിലപിടിപ്പുള്ള ആഭരണങ്ങള്‍ ഇത്തരം യാത്രകളില്‍ കുട്ടികളെ അണിയിക്കാതിരിക്കുക. ആയിരങ്ങള്‍ വന്നു പോകുന്ന സ്ഥലങ്ങളില്‍ കുട്ടി തിരക്കിനിടയില്‍ പെട്ടു പോകാനുള്ള സാധ്യതയുള്ളതിനാല്‍ നല്ല ശ്രദ്ധ വേണം. കുട്ടിയുടെ നിയന്ത്രണം പൂര്‍ണായും രക്ഷകര്‍ത്താക്കളുടെ കൈയിലായിരിക്കണം. കുഞ്ഞിന്റെ കൈയില്‍ രക്ഷകര്‍ത്താക്കളുടെ ഫോണ്‍ നമ്പര്‍ കുറിച്ചിടുന്നത് മുന്‍കരുതലെന്ന നിലയില്‍ നല്ലതാണ്. കൂട്ടം തെറ്റിപ്പോയാല്‍ ഈ നമ്പര്‍ നോക്കി രക്ഷകര്‍ത്താവുമായി കുട്ടിയെ കണ്ടെത്തുന്നവര്‍ക്ക് ബന്ധപ്പെടാനാകും. അവരുടെ ആഗ്രഹപ്രകാരം ഇഷ്ടമുള്ള സ്ഥലങ്ങള്‍ കണ്ട് പുത്തനറിവുകള്‍ പകര്‍ന്നു നല്‍കി ആ യാത്രയെ മികച്ച ഒരനുഭവമാക്കി മാറ്റാന്‍ ഇക്കാര്യങ്ങള്‍ ശ്രദ്ധിച്ചാല്‍ മതി.
ആല്‍പ്പം വിജ്ഞാനവും ആകാം
കുട്ടികളുമായി പോകുന്ന യാത്രകള്‍ വെറും വിനോദത്തിന് വേണ്ടി മാത്രമാകരുത്. ഒരു യാത്രയില്‍ അവര്‍ക്ക് ധാരാളം കാര്യങ്ങള്‍ പഠിക്കാനുണ്ടാകും. ചരിത്ര പ്രാധ്യമുള്ള പല സ്ഥലങ്ങളും സന്ദര്‍ശിക്കുന്നത് ഭാവിയില്‍ പാഠ്യ വിഷയങ്ങളില്‍ പ്രയോജനപ്പെടും. കുഞ്ഞ് കുട്ടികളാെങ്കില്‍ അവര്‍ ചിത്ര പുസ്തകങ്ങളില്‍ കണ്ടിട്ടുള്ള ജീവികളെും മറ്റുമൊക്കെ മൃഗശാലയില്‍ പോകുമ്പോള്‍ നേരിട്ട് കാണാന്‍ അവസരമുണ്ടാകുന്നു. മൃഗങ്ങളുടെ പേര് അവര്‍ക്ക് അവിടെ വെച്ച് പറഞ്ഞു പഠിപ്പിച്ച് കൊടുക്കുന്നത് ഗുണം ചെയ്യും. അല്‍പ്പം കൂടി മുതിര്‍ന്ന കുട്ടികളാണെങ്കില്‍ യാത്രകളില്‍ അവരോടൊപ്പം മ്യൂസിയം അടക്കമുള്ള സ്ഥലങ്ങള്‍ സന്ദര്‍ശിക്കാം. അവിടെയുള്ള ഓരോ കാര്യങ്ങളും വ്യക്തമായി രക്ഷകര്‍ത്താക്കള്‍ പറഞ്ഞു മനസിലാക്കിക്കൊടുക്കണം. ഓരോ യാത്രയും കുട്ടികള്‍ക്ക് ഓരോ അനുഭവമായിരിക്കണം. വ്യത്യസ്ത സാഹചര്യങ്ങളില്‍ ജീവിക്കുന്ന ആള്‍ക്കാരെ അവര്‍ കണ്ട് മനസിലാക്കട്ടെ. വ്യത്യസ്തമായ സംസ്‌കാരം കാണുന്നതു വഴി അവര്‍ ജീവിതത്തില്‍ പുതിയ പാഠങ്ങള്‍ പഠിക്കും.