കണ്ണൂരിലേക്ക് പോയാൽ തെയ്യവും കണ്ടു മടങ്ങാം

കേരളത്തിൽ ഗ്രാമീണ ഭംഗിയുള്ള സ്ഥലങ്ങളിൽ മുൻപന്തിയിലാണ് കണ്ണൂ‍ർ. ടൂറിസം ഭൂപടത്തിൽ കണ്ണൂ‍രിൻ്റെ പ്രത്യകതകൾ അധികമാരും ശ്രദ്ധിക്കാറില്ല. ഇടവപ്പാതി വരെ നിണ്ടു പോകുന്ന മനോഹരമായ തെയ്യങ്ങളുടെയും തിറയുടേയും നാട്. ബീച്ച്, ക്ഷേത്രങ്ങൾ, ഗ്രാമങ്ങൾ, പുഴകളും, കായലുകളും അങ്ങനെ കണ്ണൂരിനെ എത്ര ആസ്വദിച്ചാലും മതിയാവില്ല. കണ്ണൂര്‍ വിമാനത്താവളം വരുന്നതോടെ ഇവിടുത്തെ ടൂറിസം സാധ്യതകൾ ഏറെയാണ്

കേരളത്തിലെ ഏക ഡ്രൈവ് ഇൻ ബീച്ചായ മുഴുപ്പിലങ്ങാട് ബിച്ച് കണ്ണൂരിലാണ്. കണ്ണൂ‍ർ നഗരത്തിൽ നിന്ന് 2 കിമി അകലെയുള്ള പയ്യാമ്പലം ബീച്ചിൽ പാരസെയിലംഗ് ഏ‍ർപ്പെടുത്തിയിട്ടുണ്ട്. കാടിൻ്റെ മാധുര്യം അനുഭവിക്കണമെങ്കിൽ കണ്ണൂരിൽ നിന്ന് 60കിമി അകലെയുള്ള ആറളം വന്യ ജീവി സങ്കേതത്തിലേക്ക് തിരിക്കാം.

ശിൽപ്പകലയും , ചരിത്രകൗതുകമുള്ളവരേയും ആക‍ർഷിക്കുന്നയിടമാണ് അറക്കൽകെട്ട്. കണ്ണൂ‍ർ കോട്ട എന്നറിയപ്പെടുന്ന സെൻ്റ് ആഞ്ചലോ കോട്ടയും വലിയൊരു ആക‍ർഷണമാണ്. ബ്രിട്ടിഷുകാ‍ർ പണിത തലശ്ശേരി കോട്ടയും ഒഴിവാക്കരുത്. എന്നാൽ ഹിൽസ്റ്റേഷൻ പൈതൽ മല നൽകുന്ന അനുഭൂതി മറ്റൊന്നാണ്. തലശ്ശേരി എത്തുന്നതിന് മുമ്പ് അറബിക്കടലിൽ ഒരു കൊച്ചു തുരുത്തും സന്ദർശിക്കാം, അതാണ് ധ‍ർമ്മടം തുരുത്ത്. അവസാനമായി അറുന്നൂറേക്ക‍ർ വരുന്ന മാടായിപ്പാറയിൽ മയങ്ങി കാറ്റും കൊണ്ട് കണ്ണൂ‍ർ വിടാം. മാടായിപ്പാറ നിങ്ങളെ അത്ഭുതപ്പെടുത്തുമെന്ന കാര്യത്തിൽ സംശയമില്ല