മഴക്കാലയാത്ര: അലസത വെടിയാം; കരുതലോടെ മുന്നേറാം

കൊച്ചി: സംസ്ഥാനത്ത് മഴ കനത്തതോടെ പല റോഡുകളും തവിടുപൊടിയായ അവസ്ഥയിലാണ്. കേരളത്തിലുടനീളമുള്ള മിക്ക റോഡുകളുടെ അവസ്ഥയും വളരെ പരിതാപകരമാണ്. മഴക്കാലം ശക്തിയാര്‍ജ്ജിച്ചതോടെ അപകടങ്ങളുടെ സാധ്യതയും ഉടലെടുക്കുകയാണ്. കഴിഞ്ഞ രണ്ടു ദിവസങ്ങളിലായി പെയ്യുന്ന മഴയിൽ കൊച്ചിയിലെ പല റോഡുകളും വെള്ളത്തിനടിയിലാണ്. പല സ്ഥലങ്ങളിലും മഴവെള്ളം റോഡുകളിൽ കെട്ടിക്കിടക്കുന്നതിനാൽ വഴികളിലെ കുണ്ടും കുഴിയും അറിയാനാകില്ല. ഇരുചക്രവാഹനം ഓടിക്കുന്നവര്‍ ഇക്കാര്യങ്ങളിൽ അതീവശ്രദ്ധ പുലര്‍ത്തിയില്ലെങ്കിൽ അപകടങ്ങൾ വിളിച്ചു വരുത്തുന്നതിന് സമമാണ്. ഇത്തരത്തിൽ മഴക്കാലത്ത് റോഡുകളിൽ രൂപപ്പെടുന്ന ഗര്‍ത്തങ്ങൾ കവര്‍ന്നത് ഒട്ടേറെ ജീവനുകളാണ്.


മഴക്കാലത്ത് പ്രധാന പാതകളിലൂടെ യാത്രകൾ ദുര്‍ഘടമായതിനാൽ പലരും എളുപ്പവഴിയായി ഇടറോഡുകൾ തെരഞ്ഞെടുക്കാറുണ്ട്. ഈ വഴികളിൽ പതിയിരിക്കുന്ന അപകടക്കുഴികൾ പലരും അറിഞ്ഞുകൊള്ളണം എന്നില്ല. ഇക്കാര്യങ്ങളിലൊക്കെ അതീവ ശ്രദ്ധാലു ആയിരിക്കേണ്ട സമയമാണ് ഇത്. മഴക്കാലം വളരെ ഗൗരവകരമായി തന്നെ കണ്ട് മുന്നേറിയാൽ മാത്രമേ ആരോഗ്യപരമായ ഒരു ജീവിതം കൈമുതലാക്കുവാൻ സാധിക്കുകയുള്ളൂ.