ഫ്രഞ്ച് ഡിഷ് മുതല്‍ സര്‍ഫിംഗ് വരെ; പോണ്ടിച്ചേരി യാത്ര ചിത്രങ്ങളിലൂടെ

ഫ്രഞ്ച് അധിനിവേശത്തിന്റെ പാരമ്പര്യം ഇപ്പോഴും നിലനിര്‍ത്തി പോരുന്ന നഗരമാണ് പുതുച്ചേരി എന്ന പോണ്ടിച്ചേരി. പോണ്ടിച്ചേരി ഔദ്യോഗികമായി പുതുച്ചേരി എന്നറിയപ്പെടാന്‍ തുടങ്ങിയത് 2006 മുതലാണ്. ഫ്രഞ്ച് സംസ്‌കാരം കാണാന്‍ ഫ്രാന്‍സിലേക്ക് വിമാനം കയറാന്‍ ഇപ്പോള്‍ കഴിയാത്തവര്‍ക്ക് പുതുച്ചേരിയിലേക്ക് പോകാം. ഇവിടത്തെ കെട്ടിടങ്ങള്‍ക്കും, മതിലുകള്‍ക്കും കടകള്‍ക്കുമൊക്കെ ഒരു ഫ്രഞ്ച് ടച്ചാണ് കാണാന്‍ സാധിക്കുക. രാജ്യത്തെ നാല് പ്രവിശ്യകള്‍ ചേര്‍ന്നതാണ് പുതുച്ചേരി. തമിഴ്നാട്ടിലെ പുതുച്ചേരി, ആന്ധ്രപ്രദേശിലെ യാനം, കാരൈക്കല്‍, കേരളത്തില്‍ സ്ഥിതി ചെയ്യുന്ന മാഹി എന്നിവയാണ് ആ നാല് പ്രവിശ്യകള്‍. തുറമുഖ പ്രവിശ്യകളാണ് ഇവ നാലും. ബംഗാള്‍ ഉള്‍ക്കടലിന്റെ തീരത്ത് തമിഴ്നാട്ടിലെ ചെന്നൈ നഗരത്തില്‍ നിന്ന് വലിയ ദൂരത്തല്ലാതെയാണ് പുതുച്ചേരിയുള്ളത്. ചെന്നൈയില്‍ നിന്ന് തെക്കോട്ട് 162 കിലോമീറ്റര്‍ സഞ്ചരിച്ചാല്‍ പുതുച്ചേരിയിലെത്താം. 1673 മുതല്‍ 1954 വരെ ഫ്രഞ്ചുകാരുടെ പ്രധാന കോളനിയായിരുന്നു പോണ്ടിച്ചേരി. ഇതിനിടെ പലരും ഇവരുടെ കൈയില്‍ നിന്ന് ഈ നഗരത്തെ തട്ടിയെടുക്കാന്‍ ശ്രമിച്ചിരുന്നു.

പോണ്ടിച്ചേരിയിയിലെ തെരുവിലൂടെ നടക്കുമ്പോള്‍ കാണുന്ന കെട്ടിടങ്ങളിലെല്ലാം ഫ്രഞ്ച് വാസ്തുവിദ്യ കാണാനാകും. ക്രിസ്ത്യന്‍ പള്ളികളിലും മ്യൂസിയങ്ങളിലുമൊക്കെ ഇത് പ്രതിഫലിച്ചു കാണാനാകും. ഇളം നിറത്തിലുള്ള പെയിന്റുകളാണ് നല്‍കിയിരിക്കുന്നത്. ഇത് തനതായ ഒരു ശൈലി പോണ്ടിച്ചേരിക്ക് സമ്മാനിക്കുന്നു. ഫോട്ടോഗ്രാഫര്‍മാരുടെ ഇഷ്ടഫ്രെയിമുകള്‍ കൂടിയാണ് പള്ളികള്‍ അടക്കമുള്ള പോണ്ടിച്ചേരിയിലെ കെട്ടിടങ്ങള്‍.

Also read: ആയിരം വര്‍ഷം പഴക്കമുള്ള രാമാനുജന്റെ മൃതദേഹം ഇപ്പോഴും സൂക്ഷിക്കുന്നുണ്ട് ഇവിടെ

തിരക്കില്‍ നിന്നൊക്കെ മാറി സ്വസ്ഥമായി ഇരിക്കാന്‍ പറ്റിയ സ്ഥലമാണ് മത്രിമന്ദിര്‍. പുതുച്ചേരിയുടെ ഒരു ഐഡന്റിറ്റി കൂടിയായ ഒരു സ്ഥലമാണിവിടം. മണിക്കൂറുകളോളം ഇവിടെ ചെലവഴിക്കാനാകും. ചെടികള്‍ക്കിടയിലൂടെ നടക്കാനും ധ്യാനം ചെയ്യാനുമൊക്കെ പറ്റിയ സ്ഥലമാണ്.

യോഗ ചെയ്യാനും ധ്യാനം ചെയ്യാനും പറ്റിയ ഒരു നഗരം കൂടിയാണ് പോണ്ടിച്ചേരി. കടലിനെ അഭിമുഖീകരിച്ച് നില്‍ക്കുന്ന റിസോര്‍ട്ടുകള്‍ തെരഞ്ഞെടുക്കാം. ബഹളത്തില്‍ നിന്നൊക്കെ മാറി ധ്യാനത്തില്‍ മുഴുകാന്‍ ഇതില്‍പ്പരം നല്ല അന്തരീക്ഷം വേറെയുണ്ടാവില്ല.

Also read: ഊട്ടിപ്പട്ടണത്തില്‍ തന്നെ കറങ്ങാതെ ഈ സ്ഥലങ്ങളിലേക്കൊക്കെ ഒന്ന് പോയി വരാം

ഫ്രഞ്ച് ഭക്ഷണവിഭവങ്ങള്‍ പരീക്ഷിച്ചു നോക്കണമെന്ന് ആഗ്രഹമുള്ളവര്‍ക്ക് പുതുച്ചേരിയില്‍ അവസരമുണ്ട്. ക്രൊയിസന്റ്‌സ്, പാസ്ട്രികള്‍, ബാഗ്വറ്റുകള്‍ തുടങ്ങിയ ഫ്രാന്‍സിലെ തനതായ ഭക്ഷണവിഭവങ്ങള്‍ ഇവിടത്തെ ഫ്രഞ്ച് റെസ്റ്ററന്റുകളില്‍ ലഭിക്കും. മറ്റ് ഇന്ത്യന്‍ വിഭവങ്ങളും ലഭ്യമാണെങ്കിലും ഫ്രാന്‍സിലെ തനതായ രുചികള്‍ ആസ്വദിക്കാതെ മടങ്ങിയാല്‍ അതൊരു നഷ്ടമായിരിക്കും.

ഇന്ത്യയിലെ തന്നെ ഏറ്റവും മികച്ച സര്‍ഫിംഗ് സ്‌കൂളുകളിലൊന്നായ കല്ലിയാലയ് സര്‍ഫ് സ്‌കൂള്‍ പോണ്ടിച്ചേരിയിലാണ്. കടലില്‍ സര്‍ഫിങ് നടത്താനുള്ള ബാലപാഠങ്ങള്‍ ഇവിടെ നിന്ന് പഠിച്ചതിന് ശേഷം കടലില്‍ തിരകള്‍ക്കൊപ്പം ആര്‍ത്തുല്ലസിക്കാം.

Also read: ഒറ്റദിവസം കൊണ്ട് ബാംഗ്ലൂര്‍ നഗരത്തില്‍ കണ്ടുതീര്‍ക്കാന്‍ ഇതാ കുറച്ച് സ്ഥലങ്ങള്‍

പോണ്ടിച്ചേരിയുടെ തെരുവികളിലൂടെ സൈക്കിളില്‍ കറങ്ങി നടക്കുന്നത് ഒരു പ്രത്യേക സുഖമാണ്. മോട്ടോര്‍സൈക്കിളുകളും കാറുകളുമൊക്കെ ലഭിക്കുമെങ്കിലും സൈക്കിള്‍ ചവിട്ടിയുള്ള കറക്കം നല്‍കുന്ന അനുഭവം ഒന്നു വേറെ തന്നെയാണ്. വിദേശികളടക്കം ഇവിടത്തെ സൈക്കിള്‍ സവാരി ഇഷ്ടപ്പെടുന്നു. ഒരു ദിവസത്തേക്ക് 100 രൂപ എന്ന നിലയില്‍ സൈക്കിളുകള്‍ വാടകയ്ക്ക് ലഭിക്കും.

ഷോപ്പിങ്ങിന് അനുയോജ്യമായ സ്ഥലം കൂടിയാണ് പോണ്ടിച്ചേരി. ഇവിടത്തെ കരകൗശല വസ്തുക്കള്‍ വില്‍ക്കുന്ന കടകളിലാണ് സന്ദര്‍ശകര്‍ കൂടുതലായി എത്താറുള്ളത്. വിദേശ സഞ്ചാരികളും ഇവിടെ നിന്ന് ഇത്തരം വസ്തുക്കള്‍ ഷോപ്പ് ചെയ്യാറുണ്ട്. പുതുച്ചേരി സന്ദര്‍ശിച്ച ഓര്‍മ്മകള്‍ എന്നും നിലനില്‍ക്കാന്‍ ഈ ഷോപ്പിംഗ് സഹായിക്കും. അലങ്കാര വസ്തുക്കള്‍, വിളക്കുകകള്‍, ആഭരണങ്ങള്‍ തുടങ്ങിയവ ഇവിടെ നിന്ന് വാങ്ങാം.